बैतडीमा मालपोतका हाकिम कार्यकक्षमै घुस लिन्छन्

प्रदेश समाचार

Home
प्रदेश समाचार
बैतडीमा मालपोतका हाकिम कार्यकक्षमै घुस लिन्छन्

बैतडीमा मालपोतका हाकिम कार्यकक्षमै घुस लिन्छन्

बैतडी,
दर्ता गर्न छुट भएका जग्गा दर्ता गर्ने प्रक्रियामा बैतडीका मालपोत कार्यालय प्रमुख अशोक सार्कीले घुस लिने गरेको पाइएको छ ।
जग्गाधनीबाट विभिन्न बाहानामा सार्कीले घुस लिइरहेका हुन् । छुट भएका जग्गा दर्ता गर्ने प्रक्रियाको सुरुवातदेखि सेवाग्राहीबाट घुस लिइरहनेको खुलेको हो ।
कार्यालय प्रमुख सार्कीले सेवाग्राहीलाई फोन गरेर, भेटेर मात्रै होइन कार्यालयमै घुस लिइरहेको अवस्थामा फेला परेका छन् ।
बुधबार पाटन नगरपालिका–८ का सेवाग्राही नर बहादुर बिष्ट र धन सिंह बिष्ट दाजुभाईबाट घुस लिएका हुन् । बिष्ट दाजुभाईले आमा परु बिष्टको नाममा रहेको जग्गा दर्ता गर्नको लागि कार्यालय प्रमुख सार्कीले परु बिष्टका छोरा धन सिंह बिष्टको हातबाटै १० हजार रुपैया घुस लिएका हुन् ।
जग्गा दर्ताको काम गरिदिएको भन्दै सेवाग्राहीबाट कार्यकक्षमै घुस लिएपछि यसबारे हामिले बुझ्दा कार्यालय प्रमुख सार्कीले मिटिङ भत्ता वाफत रकम लिएको बताउछन् । ‘यो रुपैया मिटिङ वाफत लिएको हो,’ उनले छोटो जवाफ दिए ।
यसअघि पनि पटकपटक सेवाग्राहीबाट पैसा लिएका प्रमुख सार्कीले बुधबारपनि काम गरेवाफत १० हजार घुस रकम लिएको सेवाग्राही बिष्ट बताउछन् ।
बिष्टबाट यसअघि पनि फाइल दर्ता गर्नेदेखि लालपुर्जामा जग्गा दर्तागर्ने प्रक्रियासम्म आइपुग्दा करिब ५१ हजारभन्दा बढी लिएको पाइएको छ ।
आफु मार्फत नगद ५१ हजार रुपैया लगेको र यी मध्ये ३६ हजार २सय रुपैया लिएको अडियो तथा भिडियो प्रमाणहरु सुरक्षित राखेको नर बहादुर बिष्टले बताउछन् । कार्यालयमा लिएको १० हजार र यसअघि २० हजार रुपैया बजारमै भेटेर लिएको भिडियो समेत सुरक्षित राखिएको छ ।

सुरुमा कार्यालयमा फाइल दर्ता गर्दा सूचना जारी गर्नको लागि भन्दै ५ हजार, त्यसपछि फिल्ड सर्जिमिनका बखत फिल्ड भत्ता भन्दै १० हजार, त्यसपछि ६ हजार २ सय, त्यसपछि कार्यलयमा मिलाउनुपर्ने भन्दै २० हजार र अन्तिममा काम गरिदिएवाफत १० हजार कार्यालयमै लिएको बिष्टको भनाइ छ ।

कार्यालय प्रमुख सार्कीले पैसा बिना काम नहुने भन्न थालेपछि बेला बेला पैसा लिएको प्रमाणहरु राखेको बिष्ट बताउछन् । ‘पैसा बिना काम नहुने भन्न थाले, मैलेपनि पैसा लगेको प्रमाणहरु राखेको हु,’ बिष्ट भन्छन् ।
मालपोत कार्यालयमा पैसा बिना काम नहुने नजिर नै बसेकाले यसको पर्दाफास हुनुपर्ने बिष्ट बताउछन् ।
सेवाग्राही बिष्टलाई दुई महिना पहिले देखि नै बेलाबेला रकम लिइरहने गरेको खुलेका थिए ।
आफुले प्रक्रियागत तवरले कागजात पेश गर्दा पनि कार्यालय प्रमुख सार्कीले पैसा नदिए काम पनि नहुने भन्न थालेका बिष्टले बताएका छन् । जग्गा छुट दर्ताको काममा कुनै त्रुटी नभएपनि कार्यालय प्रमुख सार्कीले पैसा दिनैपर्ने भनेपछि कसैलाई जानकारी नगरी गोप्य प्रमाणहरु संकलनको लागि यो भिडियो बनाएको बताएका छन् ।
मालपोत नियमावली, २०३६ को नियम ४(क)मा ‘दर्ता गर्नसम्म छुट भएका जग्गा दर्ता गर्नुपर्ने’ व्यवस्था छ । उक्त नियममा नापनक्सा भएको तर दर्ता गर्नमात्रै छुट भएको जग्गा दर्ता गर्न पाउने व्यवस्था छ । सरकारले यस कार्यको लागि २ वर्षको समयावधि दिएको छ ।
सोही बमोजिम बैतडीमा पनि धेरै सेवाग्राहीले छुट जग्गा दर्ता लालपुर्जामा दर्ता गर्ने कामको लागि मालपोत कार्यालय धाइरहेका छन् । तर मालपोत कार्यालयमा यसरी खुल्लारुपमा घुस लिने गरेको घटना सार्वजनिक भएको हो ।

प्रकाशित मिति: बिहीबार, असोज १७, २०८१ १७:०८

प्रतिक्रिया दिनुहोस्