बैतडीमा महिलामाथी बलात्कार, गर्भ बसेपछि औषधी सेवन गराएर भ्रूण हत्या !

प्रदेश समाचार

Home
प्रदेश समाचार
बैतडीमा महिलामाथी बलात्कार, गर्भ बसेपछि औषधी सेवन गराएर भ्रूण हत्या !

बैतडीमा महिलामाथी बलात्कार, गर्भ बसेपछि औषधी सेवन गराएर भ्रूण हत्या !

बैतडीमा महिलामाथी बलात्कार गरी गर्भ बसाएर भ्रूण हत्या गरेको घटना बाहिरिएको छ । पुर्चाैडी नगरपालिकाकी २३ वर्षीया महिलामाथी बलात्कार गरी गर्भ बसाएको र गर्भ बसेको थाहा पाएपछि औषधी सेवन गराई भ्रूण हत्या गरेको घटना बाहिरिएको छ ।
पुर्चाैडी नगरपालिकाका २७ वर्षीय गोपाल सिंह महराले २३ वर्षीया महिलामाथी बलात्कार गरेको र बलात्कारपछि बसेको गर्भ जबरजस्ती औषधी सेवन गराएर तुहाएको आरोप लागेको हो । महिलाले जिल्ला प्रहरी कार्यालयमा जाहेरी दिइसकेकी छन् । घटनाबारे जाहेरी प्राप्त भएको र अनुसन्धानको प्रक्रियामा रहेको जिल्ला प्रहरी कार्यालय बैतडीका प्रमुख, प्रहरी नायव उपरिक्षक प्रेम बहादुर शाहीले जानकारी दिए ।

पिडित महिलाले जाहेरीमा मंसिर ६ गते स्याउला ल्याउन जगंल गएकाबेला महराले जंगलमा बलात्कार गरेको उल्लेख गरेकी छन् । प्रतिकार गर्दा आफुले बोकेको हसिया देखाएर परिवारका सदस्यलाई मार्ने धम्की दिएर करणी गरेको जाहेरीमा उल्लेख गरेकी छन् । ‘बलात्कार पछि घटना बाहिर ल्याए ठिक हुने छैन, तिम्रै बेज्जत हुन्छ, म नेता हु, तिम्रो कुरा कसैले सुन्दैन’ भन्ने धम्की दिने गरेको पिडित महिलाले जाहेरीमा उल्लेख गरेकी छन् ।
नियमित प्रक्रिया अनुसार पुस १ गते रजस्वला हुनुपर्ने भएपनि समयमा राजस्वला नभएपछि गर्भवती भएको थाहा पाएको पिडित महिलाले जाहेरीमा उल्लेख गरेकी छन् । गर्भवती भएपछि बलत्कार गर्ने पुरुषलाई उक्त जानकारी गराएपछि कसैलाई जानकारी नगराउन र आफैसित भागेर जाउ भन्ने अभिव्यक्ती दिने गरेको बताइएको छ । उक्त कुरा ती महिलाले इन्कार गरेको र पुस ५ गते साँझ साढे ५ बजेको समयमा आरोपीतले औषधी ल्याएर दिएको खुलेको छ । ५ वटा ट्याब्लेट भएको उक्त औषधी दिएको र औषधी खानपनि इन्कार गरेपछि आरोपीतले हतियार बोकेर आएको र मार्ने धम्की दिएको जाहेरीमा उल्लेख गरिएको छ । महिलाले ५ वटै ट्याब्लेट (गर्भपतन गर्ने औषधी) सेवन गरेको र सोही राती रक्तश्राप भएको बताइएको छ ।
उच्च रक्तश्रापपछि उपचारका लागि महिला आफन्तसँग डडेल्धुरा अस्पताल गएको र उपचारबाट फर्किएपछि जिल्ला प्रहरी कार्यालयमा जाहेरी दिएको खुलेको छ ।
यहि पुस २४ गते जिल्ला प्रहरी कार्यालयमा जाहेरी परेको जिल्ला प्रहरी कार्यालय बैतडीले जनाएको छ । पुरुषको नाममा किटानी जाहेरी परेको र उनको खोजी भइरहेको जिल्ला प्रहरी कार्यालय बैतडीका सूचना अधिकारी योगेश खत्रीले जानकारी दिए । घटनाबारे अनुसन्धान भइरहेको उनले बताए ।

प्रकाशित मिति: बुधबार, पुस २७, २०७९ २०:५२

प्रतिक्रिया दिनुहोस्