बैतडी
लामो समय देखि सामाजिक अभियानमा आवद्ध भएका जगदीश सिंह नायक बैतडीको मेलौली नगरपालिकामा नगर प्रमुखको दौडमा छन् ।
२०४८ सालमा अनेरास्ववियुको सदस्य हुदैँ राजनितिमा लागेका नायक अहिले नेकपा एमाले बैतडीको जिल्ला कमिटी सदस्य हुन् । भुमिहिन, हलिया, महिला, बालबालिका तथा पिछडिएको वर्गको क्षेत्रमा अभियान सञ्चालन गर्दै आएका नायक २०७७यता मेलौली धार्मिक सेवा समितिको अध्यक्ष समृत हुन् । उनले मेलौली धार्मिक क्षेत्रको गुरु योजना कार्यान्वयनमा पहल गरेकाछन् ।
नायकले २०५६ सालमा मेलौलीमा शौचालयको निर्माण अभियानको अगुवाई गरि ४४ पक्की शौचालय निर्माण गरे । उनले खानेपानी समस्याको दिर्घकालिन व्यवस्थापनका लागि सरोकारवाला निकायमा पहल गर्नुका साथै मेलौलिमा ग्रामिण अर्थ शास्त्रको सर्वेक्षण, तथ्याक संकलन र विश्लेषणमा सहभागी भइ काम गरे । यसैगरी उनले २०५५ सालमा हलियाहरुको तथ्यांक संकलनमा स्वयमसेवक भएर काम गरेको अनुभव छ । नायक जनचेतना आधारभुत विद्यालयको संस्थापक अध्यक्ष हुन् । उनि भुमि समस्या समाधान आयोग बैतडीका विज्ञ सदस्य भएर करिव ५बर्ष काम गरेका व्यक्ति हुन् । केपी ओली नेतृत्वको सरकारले गठन गरेको भुमि आयोग सेर बहादुर देउवा नेतृत्वको सरकार आएसंगै खारेज भएको थियो । अहिले बैतडीमा भुमि आयोगका अध्यक्ष माओवादी नेता धर्मसिंह ऐर छन् ।
नायकले सामाजिक, धार्मीक तथा शैक्षिक क्षेत्रमा खेलेको भुमिका समेत उनका लागी चुनाव जित्ने आधारका रुपमा रहनेछन् । नायक २०७४सालको निर्वाचनमा वर्तमान मेयर कृष्णसिंह नायक संग पराजीत भएका थिए । अहिले उनको भिडन्त नेपाली कांग्रेस जिल्ला सचिव प्रेम बहादुर चन्द र माओवादी नेता भिम बहादुर चन्द संग हुने छ ।
मुख्य एजेण्डा
मेलौली नगरपालिकामा मेयरका उम्मेदवार जगदीशसिंह नायकले युवा स्वरोजगारलाई आफ्नो प्रमुख एजेण्डा बनाएकाछन् । “सम्बृद्ध मेलौली, सुखि मेलौलीबासी” भन्ने नारा सहित चुनावमा होमिएका नायकले मेलौलीमा परिवर्तन र विकास गर्ने लक्ष्य रहेको बताए । उनले भने,‘हामीले प्रतिवद्धता पत्रमा उल्लेख गरेका सबै कुराहरु कार्यान्वयन गर्ने छौँ । खासगरी युवाहरुलाई स्वरोजगार बनाउने मुख्य एजेण्डा हो । हामीसंग रहेका सबै प्रकारका प्राकृतिक श्रोतहरुको पहिचान र प्रयोग गरी सम्भाव्यताका आधारमा आर्थिक उपार्जन गर्ने लक्ष्य छ । यसका लागि युवा जनशक्तिलाई आवद्ध गराई आत्मनिर्भर बनाउनेछौँ । परम्परागत रुपमा चलेका उद्योगहरुलाई आधुनिकिकरण गरि व्यवसायीहरुलाई आत्मनिर्भर बनाउने प्रतिवद्धता गरेका छौँ ।’
नायकले कृषि, पशुपालन, शिक्षा, स्वास्थ्य, यातायात तथा भौतिक पुर्वाधारहरुको निर्माणलाई पनि आफ्नो मुख्य एजेण्डा बनाएकाछन् ।
