बैतडीमा वन अतिक्रमण गरी विद्यालय भवन बनाएको भन्दै अख्तियारमा उजुरी

प्रदेश समाचार

Home
प्रदेश समाचार
बैतडीमा वन अतिक्रमण गरी विद्यालय भवन बनाएको भन्दै अख्तियारमा उजुरी

बैतडीमा वन अतिक्रमण गरी विद्यालय भवन बनाएको भन्दै अख्तियारमा उजुरी

तस्बिर सौजन्यः इन्फो खबर

बैतडी,
सामुदायिक वन अतिक्रमण गरेर विद्यालय भवन बनाउन लागिएको भन्दै अख्तियार दुरुपयोग अनुसन्धान आयोगमा उजुरी परेको छ । बैतडीको पाटन नगरपालिका–१ स्थित सरस्वती आधारभूत विद्यालय गुत्थडीको भवन निर्माणमा लमौती सामुदायिक वन अतिक्रमण गरेर विद्यालय भवन बनाउन लगिएको दावी गर्दै अख्तियारको कार्यालयमा उजुरी परेको हो ।
८० लाख लागतमा बन्ने भवन सामुदायिक वनको हातामा बनाउन लागिएको आरोपसहित उजुरी परेको हो । आगामी शैक्षिक सत्रदेखि कक्षा १० सम्मको पढाई गरी माविमा स्तरोन्नतीको तयारी भइरहेको थियो ।
यसबारे डिभिजन वन कार्यालयले परिपत्र गर्दै वास्तविकता सहितको विवरण पठाउन भन्दै सामुदायिक वनलाई पत्र पठाएको छ । सामुदायिक वनको जमिन भए÷नभएको, विद्यालय भवन निर्माण गर्दा जग्गा प्राप्ती लगायतका विषयमा भएका प्रक्रियागत जानकारी र वनको नोक्सानीबारे विवरण जिल्लामा जानकारी गराउन परिपत्र गरिएको डिभिजन वन कार्यालय बैतडीका प्रमुख दिलिप कुमार यादवले जानकारी दिए ।
स्थानीय मिन बहादुर चन्दले उक्त विद्यालय भवन निर्माणको लागि आफ्नो जग्गा रहेको भन्दै जग्गा दान गरेका थिए । यसैगरी केही समय अगाडी मात्रै उक्त सामुदायिक वनका एक सयभन्दा बढी उपभोक्ताहरुको भेलाबाट समेत सोही जमिनमा भवन निर्माण गर्ने सहमती सहितको निर्णय गरिएको पाइएको छ ।
तर उक्त सामुदायिक वनको जमिन नै भएको भए जग्गा प्राप्ति र भोगचलन सम्बन्धी प्रक्रिया नपु¥याएको पाइएको छ । उक्त जमिन स्थानीयको हो वा समुदायिक वनको भन्नेबारे अमिन लगाएर नाँपजाँच गरिने डिभिजन वन कार्यालयले जनाएको छ । यदी सामुदायिक वनकै भए वन अतिक्रमणको आधारमा कारवाही गरिने बताइएको छ ।
वडा नं १ वडा अध्यक्ष तर्क सिंह ठगुन्नाले स्थानीय चन्दले आफ्नो जमिन रहेका भन्दै विद्यालयलाई दान गरेको र सोही जमिनमा विद्यालय भवन बनाइन लागिएको बताए । सामुदायिक वनका सबै उपभोक्ताहरुको सहमतिमा भवन बनाइन लागिएको समेत अध्यक्ष ठगुन्नाले बताए ।
माध्यामिक तहको पढाइका लागि त्यहाका बालबालिकाहरु घण्टौ हिडेर विद्यालय पुग्ने गरेकाले तीनीहरुको सहजताको लागि विद्यालय स्तरोन्नती गरी कक्षा १० सम्मको अध्यापन गराउने तयारी भइरहको बताउदै अध्यक्ष ठगुन्नाले समाजको विकास नचाहानेले यसरी मुद्धामामिला गरेको धारणा राखे ।
त्यहाका स्थानीयहरु लगायत सबै वनका उपभोक्ताहरु समेत विद्यालय सोही ठाउँमा बनाउनुपर्छभन्नेमा सहमत रहेकाले यसपछिको जिम्मेवारी स्वयम उजुरीकर्ताले व्यहोर्नुपर्ने समेत सामुदायिक वनका पदाधिकारीहरुको भनाइ रहेको छ ।
सामुदायिक वनका अनुसार कुनै रुखक कटानी नगरेको समेत दावी गर्दै आएको छ । यद्यपी यसबारे डिभिजन वनले अनुसन्धान गरिरहेको जनाएको छ ।

प्रकाशित मिति: बिहीबार, चैत १, २०८० १५:२७

प्रतिक्रिया दिनुहोस्