बैतडी ।
नेकपा (एमाले) बैतडीका नव निर्वाचित अध्यक्ष नरेश कुमार विश्वकर्माले एमालेलाई बैतडेली जनताको प्यारो पार्टी बनाउने आधारमा कामगर्ने बताएकाछन् । बिहिबार जिल्ला पार्टी कार्यालय बैतडीमा पदभार ग्रहण गर्दै उनले आफ्नो कार्यकालमा पार्टीलाई हालको भन्दा थप उचाइमा पु¥याउने आधारमा काम गरेर मिसन ८४ सफल पार्ने दावी गरे ।
सम्बोधनको सुरुवातमा अग्रज तथा स्वर्गिय नेताहरुको स्मरण गर्दै भावुक बनेका अध्यक्ष विकले हालको जिल्ला कमिटीमा सबै उमेरका व्यक्तिहरुको प्रतिनिधित्व रहेकाले पार्टी ३ तरेलीको बन्न पुगेको बताए । उनले पार्टीमा युवा, वयस्क र जेष्ठ उमेरका व्याक्तिहरुको प्रतिनिधित्व रहेको बताए ।
पार्टीका केन्द्रीय कमिटी सदस्य तथा पुर्व सांसद लिलाधर भट्टले भरखरै सम्पन्न अधिवेशनले सबैको प्रतिनिधित्व हुने जिल्ला कमिटी बनाएको बताए । उनले अधिवेशनका क्रममा अध्यक्षका प्रत्यासीको रुपमा रहेका ७जनामध्ये ४जना पदाधिकारी भित्रै अटाउनु अत्यन्त सुखद पक्ष रहेको बताए । उनले भने,“अहिले बनेको जिल्ला कमिटीमा अनुभवी, इमान्दर र क्षमतावान नेताहरु आएकाछन्, नाम र योग्यताले निकै राम्रा छन् तर कामले राम्रो भएको देख्न पाइन्छ की पाइदैन् त्यो हेर्न बाँकी छ । तर पार्टीमा पद ओगटेर काम नगर्ने छुट कसैलाई हुनेछैन् ।”
बिहिबार भएको पदभार ग्रहण कार्यक्रममा नवनिर्वाचित अध्यक्ष नरेश विक, उपाध्यक्ष लोकेन्द्र भण्डारी, उपसचीव पार्वती भट्ट सहित सदस्यहरु उपस्थीत थिए । पदभार ग्रहण कार्यक्रममा सचीव हजारी साउद र उपसचीव हर्क धानुक अनुपस्थीत थिए । आगामी बैठकहरुमा सबैलाई अनिवार्य उपस्थीत हुन अध्यक्ष विकले निर्देशन दिएका छन् । उनले तीन बैठकमा सहभागी नहुने व्यक्तिलाई विधान अनुसार पदबाट बर्खास्त गरिने चेतावनी दिए । उनले आफु जति इमान्दर त्यत्तिनै कठोर समेत रहेको बताए । उनले सबै कार्यकर्ताहरुलाई कम्युनिष्ट आचरणमा बस्न निर्देशन दिएकाछन् ।
पार्टीका केन्द्रीय सदस्य भट्टले नवनिर्वाचित कमिटीमा दलित महिला र सबै उमेरका व्यक्तिहरुको अर्थपुर्ण सहभागीता रहेको बताए । नेकपा (एमाले)को नवौँ जिल्ला अधिवेशन मंगलबार पाटनमा सम्पन्न भएको थियो । अधिवेशनले ९०जनाको जिल्ला कमिटी सर्वसम्मत चयन गरेको थियो ।
