डडेल्धुरामा हिमालयन लाइफ इन्स्योरेन्सको विशेष कार्यक्रम सम्पन्न, उत्कृष्ट एजेन्सी म्यानेजर सम्मानित

प्रदेश समाचार

Home
प्रदेश समाचार
डडेल्धुरामा हिमालयन लाइफ इन्स्योरेन्सको विशेष कार्यक्रम सम्पन्न, उत्कृष्ट एजेन्सी म्यानेजर सम्मानित

डडेल्धुरामा हिमालयन लाइफ इन्स्योरेन्सको विशेष कार्यक्रम सम्पन्न, उत्कृष्ट एजेन्सी म्यानेजर सम्मानित

डडेल्धुरा — हिमालयन लाइफ इन्स्योरेन्स लिमिटेडको उपप्रादेशिक कार्यालय डडेल्धुराको आयोजनामा जीवन बीमाको महत्व, कम्पनीका बीमा योजना तथा व्यावसायिक अवस्थाबारे जानकारी दिने उद्देश्यले एकदिने विशेष कार्यक्रम सम्पन्न भएको छ।
डडेल्धुरास्थित रातो गुराँस रिसोर्टमा असोज २४ गते बिहान ११ बजे आयोजित कार्यक्रममा बैतडी, बझाङलगायत जिल्लाका शाखा प्रमुख तथा एजेन्सी म्यानेजरहरूको उपस्थिति रहेको थियो।

कार्यक्रममा हिमालयन लाइफ इन्स्योरेन्सका प्रदेश उपप्रमुख टेक राज आचार्यले कम्पनीको परिचय, जीवन बीमाको महत्व, उपलब्ध बीमा योजनाहरू तथा कम्पनीको वित्तीय र व्यावसायिक अवस्थाबारे जानकारी गराउनुभएको थियो।
कार्यक्रममा कम्पनीको चुक्ता पुँजी, बीमालेख संख्या, बीमा शुल्क संकलन, लाइफ फन्ड, लगानी तथा अभिकर्तामार्फत प्रवाह भइरहेका सेवाबारे समेत चर्चा गरिएको थियो। जीवन बीमाले भविष्यमा आइपर्न सक्ने आर्थिक जोखिम न्यूनीकरण गर्न, परिवारको आर्थिक सुरक्षा सुनिश्चित गर्न तथा नियमित बचत गर्ने बानीको विकास गर्न महत्वपूर्ण भूमिका खेल्ने विषयमा जोड दिइएको थियो।

कार्यक्रमका अवसरमा उत्कृष्ट कार्यसम्पादन गर्ने एजेन्सी म्यानेजरहरूलाई मायाको चिनो प्रदान गर्दै सम्मान गरिएको शाखा प्रबन्धक दिवाकर अवस्थीले जानकारी दिनुभयो।
उहाँका अनुसार अभिकर्ताहरूको मेहनत, लगनशीलता र कार्यसम्पादनको कदर गर्दै उनीहरूलाई थप प्रोत्साहित गर्ने उद्देश्यले सम्मान कार्यक्रम आयोजना गरिएको हो।
कार्यक्रमले बीमासम्बन्धी जानकारी विस्तार गर्नुका साथै अभिकर्ताहरूबीच अनुभव आदानप्रदान, व्यावसायिक सम्बन्ध सुदृढीकरण र जीवन बीमाको पहुँच विस्तारमा सहयोग पुग्ने अपेक्षा गरिएको छ।
हिमालयन लाइफ इन्स्योरेन्सले देशभरका विभिन्न शाखा तथा उपशाखामार्फत जीवन बीमा सेवा प्रदान गर्दै आएको छ।

प्रकाशित मिति: शनिबार, असोज २४, २०८३ १४:२२

प्रतिक्रिया दिनुहोस्