काठमाडौं स् स्थानीय निर्वाचन २०७९ का लागि निर्वाचन आयोगले मंगलबार राति १२ बजेपछि मौन अवधि शुरु हुने जनाएको छ।
आयोगले मंगलबार पत्रकार सम्मेलन गरी यसबारे जानकारी गराएको हो। आयोगका प्रवक्ता शालिग्राम शर्मा पौडेलले ३५५ जना विभिन्न पदाधिकारी निर्विरोध निर्वाचित भएको बताए। ६ वडाध्यक्षसहित ३५ जना स्वतन्त्र सदस्य समेत निर्विरोध निर्वाचित भएको जानकारी दिए।
उनले यो निर्वाचनमा १० हजार ७५६ मतदानस्थलका २१ हजार ९५५ मतदान केन्द्रबाट एक करोड ७७ लाख ३३ हजार ७२३ मतदाताले मत दिने बताए। उनले १ लाख ९ हजार ८८ कर्मचारी र ६५ हजार ८६५ जना स्वयंसेवक खटिएको जानकारी दिए। ७९ वटा राजनीतिक दलमध्ये जम्मा ६५ वटा दल चुनावी प्रतिस्पर्धामा रहेको बताए।
आयोगले मौन अवधिमा कुनै पनि माध्यमबाट निर्वाचन प्रचारप्रसार गर्न तथा मतदातालाई प्रभाव पार्ने किसिमका कुनै पनि गतिविधि गर्न नपाइने स्पष्ट पारेको छ। त्यस अवधिमा उम्मेदवार, दलका कार्यकर्ता तथा सम्बन्धित व्यक्तिका सम्बन्धमा निगरानी राखी त्यस्तो गतिविधि हुन नदिन प्रशासनलाई निर्देशन दिएको छ।
प्रवक्ता पौडेलले मतदानको समयभन्दा ४८ घण्टाअगाडि अर्थात् मंगलबार राति १२ बजेपछि शुरु हुनेछ। यस अवधिमा राजनीतिक दलका पदाधिकारी वा उम्मेदवार तथा भ्रातृ संगठन वा सम्बन्धित व्यक्तिले निर्वाचन प्रचारप्रसार लगायत तथा कुनैपनि प्रकारका छलफल, प्रचारप्रसारका सभा सम्मेलन, कार्यशाला गोष्ठी गर्न नहुने, प्रचारप्रसार सामग्री राखिएको भए तत्काल हटाउनुपर्ने बताइएको छ।
कुनै पनि प्रक्रिया वा माध्यमबाट मत माग्न वा निर्वाचन प्रचारप्रसार गर्न नहुने, सामाजिक सञ्जाल, अनलाइन, छापा वा कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै पनि सन्देश सूचना वा प्रचारप्रसारका सामग्री पोष्ट वा शेयर गर्न गराउन नहुने हुँदा यससम्बन्धी आचरण पालना गरिदिन सम्बन्धित सबैमा आयोगले आग्रह गरेको छ।
त्यस्तै मतदानको कार्य सम्पन्न नभएसम्मका लागि सबै अन्तरराष्ट्रिय सीमाबाट हुने आवतजावत र मतदान हुने दिन, आन्तरिक रूपमा सञ्चालन हुने सबै प्रकारका यातायात बन्द गरिनेछ। मतदान सम्पन्न नभएसम्मका लागि स्थानीय प्रशासनको समन्वयमा तोकेको क्षेत्रमा मादक पदार्थको बिक्री वितरण र सेवन गर्नसमेत निषेध गरेको जनाएको छ।
