बैतडीको पाटन नगरपालिका–१० स्थित सिद्धपुर स्वास्थ्य चौकीमा कार्यरत कर्मचारीहरुको आरोप प्रत्यारोपका कारण सेवा प्रभावित बनेको छ । कर्मचारीहरुको आरोप प्रत्यारोप कायमै रहेको र व्यवस्थापन पक्षले पनि विवादीत निर्णय गरेपछि थप समस्या शृजना भएको हो ।
साउन २९ गते सोही वडाको डुब्केबाट महिलालाई सुत्केरीका लागि स्वास्थ्य चौकी ल्याइएको थियो । तर स्वास्थ्य चौकीमा अनमी नभेटिएपछि आफन्तले डडेल्धुरा लगेका थिए । उक्त दिन अनमी इश्वरी जोशी पन्तको पालो रहेको बुझिएको छ ।
स्वास्थ्य चौकीमा तीन जना अनमी कार्यरत छन् । उनीहरुको लागि स्वास्थ्य चौकी व्यवस्थपान समितिको बैठकले यसअघि नै कार्यालय समय बाहेकमा छुट्टाछुट्टै समय तोकेको थियो । अनमी लक्ष्मी भट्ट बिदामा रहेको र मिना महरा घर गएको बुझीएको छ । घरमा हजुरआमा बिरामी भएकाले आफुले ड्युटीमा रहेकी अनमी इश्वरी जोशी पन्तको सम्पर्क नम्बर दिएको महराले बताइन् ।
यसअघि पनि स्वास्थ्य चौकी र व्यवस्थापन समितिको बैठकले कार्यालय समय बाहेक अन्य समयमा पालैपालो तिनै जना अनमीले ड्युटी गर्ने निर्णय गरेको थियो । स्वास्थ्यकर्मीहरुले कार्यसम्पदानमा चरम लापरवाही गरेको भन्दै सबै कर्मचारीहरुलाई सरुवा गरी अन्य कर्मचारीहरुलाई यस स्वास्थ्य चौकीमा कामकाजमा पठाउन आग्रह गर्दै नगरपालिकालाई निर्णयसहितको निवेदन पेश गरेको थियो ।
व्यवस्थापन समितिले काममा लापरवाही गर्ने कर्मचारीलाई नभइ सबैलाई सरुवाका सिफारीस गर्ने निर्णयप्रति अन्य कर्मचारीहरुले आपत्ती जनाएका छन् । समितिले यसअघि आफैले गरेको निर्णय कार्यान्वयन नै नगरी सबै कर्मचारीको सरुवा गरेपछि आफूहरुको आपत्ती रहेको सिअहेब महेन्द्र बोहराले बताए।
यसअघि पनि सेवाग्राहीबाट सेवा प्रवाहमा जिम्मेवार नबनेको भन्दै पटक पटक गुनासाहरु आउने गरेका थिए । कर्मचारीको सरुवा नगरी सबैले मिलेर स्वास्थ्य चौकीबाट प्रवाह हुने सेवालाई प्रभावकारी अघि बढ्नुपर्ने स्वास्थ्यचौकी इन्चार्ज दिपीका भट्टले बताइन् । आगामी दिनमा यसप्रकारका क्रुटीहरु नहुने गरी सबै मिलेर अघि बढ्नुपर्ने उनको धारणा छ ।
स्वास्थ्यचौकी व्यवस्थापन समितिले गरेको निर्णयप्रति सरोकारवाला निकायले ध्यानाकार्ण भएको जनाएका छन् । पाटन नगरपालिकाका स्वास्थ्य शाखा प्रमुख मदन सिह महराले एकै चोटी सबै कर्मचारीहरुलाई सरुवा गर्न नमिल्ने बताउनुभयो । गल्ती गर्ने र काममा लापरवाही गर्ने कर्मचारीलाई सचेत गराउने, स्पष्टीकरण सोध्ने र त्यसपछि पनि सुधार भएन भने मात्रै कारवाहीका लागि सिफारीस गर्न सकिने स्वास्थ्य शाखा प्रमुख महराले बताउनुभयो ।
बिहिबार बसेको स्वास्थ्य चौकी व्यवस्थापन समितिको बैठकले स्वास्थ्यकर्मीहरुले कार्यसम्पदानमा चरम लापरवाही गरेको अनमी लगायतका स्वास्थ्यकर्मीहरुले सुत्केरी हुन आएका महिलाहरुलाई सेवा नदिएको, प्रशासनिक काम सही ढंगबाट नगरेको, कर्मचारीहरु समयमा स्वास्थ्य चौकीमा उपस्थित नभएको, स्थानीय सरकारको नियम पनि नमानेको लगायतका विषय उल्लेख गर्दै सबै कर्मचारीहरुलाई सरुवा गरी अन्य कर्मचारीहरुलाई यस स्वास्थ्य चौकीमा कामकाजमा पठाउन आग्रह गर्दै नगरपालिकालाई निर्णयसहितको निवेदन पेश गरेको थियो।
