काठमाडौं ।
उद्योग, वाणिज्य तथा आपूर्ति मन्त्रालयले सत्यतथ्य बुझेर समाचार सम्प्रेषणगर्न सञ्चारमाध्यमलाई आग्रह गरेको छ । मन्त्री दामोदर भण्डारीका निजी सचिव सुमन धितालले आज एक प्रेस विज्ञप्ति जारी गर्दै मन्त्रालय र मन्त्रीका विषयमा आएका समाचारको खण्डन गरेका छन् । पछिल्लो समय मन्त्रीलाई बदनाम गर्ने आधारले आइरहेका समाचारहरु सत्य नभएको मन्त्रालयको दाबि छ । स्रोत उल्लेख नगरेरै लेखिएका उक्त समाचारमा कुनै सत्यता नभएको मन्त्रालयको भनाई छ ।
यहि वैशाख १६ गते दृष्टिन्युज डटकममा प्रकाशित “एमालेका मन्त्री नै सुपारी तस्करीमा संलग्न” शीर्षकको समाचारप्रति मन्त्रालयको गम्भीर ध्यानाकर्षण बताइएको छ । मन्त्रालयले समाचारमा उठाइएका सबै दावीहरू निराधार, भ्रामक र चरित्रहत्या गर्नका नियतका रहेको जनाएको छ ।
विज्ञप्तिमा भनिएको छ, “उद्योग, वाणिज्य तथा आपूर्ति मन्त्री माननीय दामोदर भण्डारीको नाम उल्लेख गरी तथ्यहीन, प्रमाणविहीन, भ्रामक, कपोकल्पित र स्रोत समेत उल्लेख नगरी देश र जनताको उन्नतिको लागि समृद्ध नेपाल सुखी नेपाली निर्माणमा अविचलित रूपमा कार्य गरिरहनुभएका मन्त्रीज्यूको चरित्र हत्या हुने गरी गरिएका यस्ता गलत तथा अविश्वसनीय समाचारले आम नागरिकमा अविश्वास पैदा गराई लोकतन्त्र प्रति भ्रम सिर्जना गर्ने कार्यको माननीय मन्त्री ज्यूको सचिवालय घोर भत्र्सना गर्दछ । आर्थिक तथा व्यवसायी वातावरणको सुधारले गलत क्रियाकलाप मार्फत आफ्नो व्यक्तिगत फाइदा लिन पल्केका तस्कर तथा बिचौलियाहरूको मर्ममा चोट पुगेको कारण सुधारको कार्यलाई गलत देखाउन भ्रामक, कपोलकल्पित समाचार प्रकाशन गरी मन्त्री सरकार प्रति अनास्था फैलाउने कार्यको घोर निन्दा समेत गर्दछौ ।”
उक्त विज्ञप्तिमा सञ्चार माध्यमको मर्यादा, पत्रकार आचारसंहिता र तथ्य जाँचको जिम्मेवारी विपरीत लेखिएको उक्त समाचारमा प्रयुक्त भाषा शैली, शङ्का, आरोप र प्रस्तुत शैली पत्रकारिताको सामान्य मूल्य मान्यता विपरीत रहेको बताइएको छ । “सञ्चारमाध्यमले प्रकाशन गर्ने यस्ता गैर जिम्मेवार समाचारले न त पत्रकारिताको गरिमा जोगाउँछ, न जनताको विश्वास पाउँछ । खुला अर्थ व्यवस्थामा बजारलाई सहज बनाउने, उद्योग कलकारखाना निर्वाध रूपले सञ्चालन हुने वातावरण निर्माण गर्ने र नेपाली कृषकले उचित मूल्य प्राप्त गर्ने वातावरण बनाउन नीतिगत तथा कानुनी सुधारमा मन्त्रालय लागि रहेको छ । आयात तथा निर्यात सहज बनाई देशको औधौगिक वातावरण निर्माण गर्न गरिएको सुधारको कार्यलाई अनदेखा गरी भए गरेका यस प्रकारका भ्रामक सामग्रीको विरुद्ध कानुनी उपचारका लागि आवश्यक कदम चालिने समेत जानकारी गराउँदछौ । यसरी एकतर्फी रूपमा सम्बन्धित व्यक्ति वा संस्थाको जानकारी विना प्रकाशित समाचारको खण्डन प्रकाशित गर्न वा स्रोतसहित स्पष्टता दिन र आगामी दिनमा यस्ता भ्रामक समाचार प्रकाशित नगर्न सम्बन्धित सञ्चार माध्यमलाई सचेत समेत गराउन चाहन्छौं ।” प्रेस विज्ञप्तिमा उल्लेख छ ।
मन्त्रालयले मिडियाले यस्ता भ्रामक, पुष्टि नभएका र नियतवश लेखिएका समाचारहरू प्रकाशित नगर्न र प्रेस आचारसंहिताको पालना गर्न आग्रह गरेको छ ।
