बैतडी ।
नेकपा (एमाले) बैतडीले ११औँ राष्ट्रिय महाधिवेशनका लागि जिल्लाबाट सर्वसम्मत रूपमा प्रतिनिधि छनोट गरेको छ । निर्धारण गरिएको मापदण्डअनुसार जिल्लाबाट खुला ६, दलित ४, महिला ४ र युवा १ जना गरी कुल १५ जना प्रतिनिधि निर्विरोध निर्वाचित भएका छन् ।
प्रतिनिधि छनोट हुने व्यक्तिहरुमा खुलातर्फ सुरेन्द्र पाल, नरेन्द्र बिष्ट, चक्र कार्की, पुष्करराज जोशी (लख्खाभाई), लोकेन्द्र भण्डारी र रामसिंह पुजारा रहेका छन् । युवातर्फ गोविन्द गिरी चयन भएका छन् भने दलिततर्फ नरेश विक, बलभद्र दयाल, सरस्वती नेपाली, कमल भूल चयन भएका छन् ।
यसैगरी महिलातर्फ पार्वति कार्की, सकुन्तला साउद, धाना धामी र सरस्वती कोली सर्वसम्मत रूपमा चयन भएका छन् ।
पार्टीको आन्तरिक जीवनलाई सुव्यवस्थित र संस्थागत बनाउने महायज्ञका रूपमा रहेको ११औँ राष्ट्रिय महाधिवेशनका लागि सर्वसम्मत प्रतिनिधि चयन गरिएको पार्टी जिल्ला अध्यक्ष नरेश विकले बताए ।
जिल्ला बाट निर्वाचित सबै प्रतिनिधिहरू केपी शर्मा ओलीलाई पुनः अध्यक्ष निर्वाचित गराउने पक्षका रहेका छन् । “देशको वर्तमान राजनीतिक परिस्थिति, मुलुकको अस्तित्व रक्षा तथा समृद्ध भविष्यको दिशालाई मध्यनजर गर्दै जिल्ला प्रतिनिधिहरूले पुनः पार्टी अध्यक्षका रूपमा श्रद्धेय कमरेड केपी शर्मा ओलीलाई नै चयन गर्ने दृढ प्रतिवद्धता जनाएका छन्,” अध्यक्ष विकले भने ।
उनले समावेशीताको दृष्टिले मापदण्डभन्दा बढी संख्या—युवा १ को सट्टा ७ जना र दलित ४ को सट्टा ५ जना निर्वाचित हुनु उदाहरणीय भएको बताए ।
