काठमाडौँ । टी–२० विश्वकप अन्तर्गत आफ्ना खेलहरू भारतबाहिर सार्न बंगलादेशले गरेको अनुरोधलाई अन्तर्राष्ट्रिय क्रिकेट परिषद् (आइसीसी) ले अस्वीकार गरेको छ । मङ्गलबार भएको भर्चुअल वार्तामा आइसीसीले बंगलादेश क्रिकेट बोर्ड (बिसिबी) ले राखेको प्रस्ताव खारेज गरिदिएको हो ।
क्रिकइन्फोका अनुसार सुरक्षा चिन्तालाई आधार बनाउँदै आइसीसीले बंगलादेशका खेल भारतबाहिर सार्न नसकिने स्पष्ट पारेको छ । साथै, भारतमा टोली नपठाए बंगलादेशले अंक गुमाउने चेतावनीसमेत आइसीसीले दिएको बताइएको छ ।
यद्यपि, बीसीबीले भने आइसीसीबाट औपचारिक रूपमा यस्तो कुनै अल्टिमेटम नआएको दाबी गरेको छ । मङ्गलबारको वार्ताबारे बीसीसीआई र बीसीबी दुवैले हालसम्म कुनै आधिकारिक विज्ञप्ति जारी गरेका छैनन् । बीसीबीले भारतबाहिर खेल सार्न प्रस्तावसहित पत्र पठाएपछि आइसीसीले यो बैठक आयोजना गरेको थियो ।
२० टोली सहभागी प्रतियोगिता फेब्रुअरी ७ बाट भारत र श्रीलङ्कामा सुरु हुँदैछ । प्रतियोगिता सुरु हुन एक महिना बाँकी रहँदा यस्तो जटिलता देखिएको हो । समूह चरणमा रहेको बंगलादेशले आफ्ना सुरुवाती तीन खेल कोलकातामा खेल्ने तालिका छ । तालिकाअनुसार बंगलादेशले फेब्रुअरी ७ मा वेस्ट इन्डिजसँग, फेब्रुअरी ९ मा इटालीसँग, फेब्रुअरी १४ मा इङ्ल्यान्डसँग कोलकातामा तथा अन्तिम समूह खेल फेब्रुअरी १७ मा मुम्बईमा नेपालसँग खेल्नुपर्नेछ ।
यदि बंगलादेशले भारतमा आएर खेल्न अस्वीकार गरेमा समूह चरणका सबै खेलहरू गुमाउनेछ । त्यस अवस्थामा बंगलादेशसँग खेल्नुपर्ने नेपालसहित चारै टोलीले यत्तिकै २–२ अंक पाउनेछन् । बंगलादेश नखेल्दा समूह चरणमा नेपालको एउटा प्रतिस्पर्धी कम हुनेछ, तर एक टेस्ट राष्ट्रसँग प्रतिस्पर्धा गर्ने अवसर भने गुम्नेछ ।
बंगलादेश नखेलेको अवस्थामा नेपालका प्रतिस्पर्धीहरू इङ्ल्यान्ड, इटाली र वेस्ट इन्डिज रहनेछन् । यीमध्ये इटाली नेपालभन्दा कमजोर मानिन्छ । इटालीलाई हराएर वेस्ट इन्डिजविरुद्ध ‘सरप्राइज जित’ निकाल्न सके नेपालका लागि सुपर–८ मा पुग्ने ढोका खुल्न सक्ने विश्लेषण गरिएको छ । बंगलादेश खेलेमा भने समूह प्रतिस्पर्धा थप पेचिलो हुनेछ ।
यसबीच, भारतीय क्रिकेट बोर्ड (बीसीसीआई) ले बंगलादेशी फास्ट बलर मुस्तफिजुर रहमानलाई रिलिज गर्न कोलकाता नाइट राइडर्सलाई निर्देशन दिएपछि बंगलादेश असन्तुष्ट बनेको बताइएको छ । फ्रेन्चाइजले डिसेम्बरमा भएको आईपीएल लिलामीमा मुस्तफिजुरलाई ९.२ करोड भारतीय रुपैयाँमा किनेको थियो ।
बीसीसीआई सचिव देवजित सैकियाले मुस्तफिजुरलाई रिलिज गर्न भनिएको जानकारी दिए पनि त्यसको कारण खुलाएका छैनन् । मुस्तफिजुर २०२६ सिजनका लागि विकेका एकमात्र बंगलादेशी खेलाडी हुन् । आईपीएल गभर्निङ काउन्सिलले यस विषयमा औपचारिक बैठक नगरेको बुझिएको छ, जसका कारण निर्णय प्रक्रियामाथि प्रश्न उठिरहेका छन् ।
