बैतडी, २१ जेठ
बैतडीमा जिल्ला समन्वय समितीको निर्वाचन २४ जेठमा हुदैँछ । निर्वाचनका लागि शनिबार मनोनयन दर्ता भएको छ । जिससमा जम्मा ९ पदका लागि १७ जनाको मनोनयन दर्ता भएको मुख्य निर्वाचन अधिकृतको कार्यालयले जनाएको छ ।
जिसस प्रमुखका लागि नेपाली कांग्रेस, नेकपा माओवादी केन्द्र र स्वतन्त्रले गठबन्धन गरेकाछन् भने एमाले एक्लैले उम्मेदवारी दर्ता गरेको छ ।
गठबन्धनबाट प्रमुखमा नेपाली कांग्रेसका खगेन्द्रसिंह धामीको उम्मेदवारी दर्ता भएको छ भने एमालेबाट मोहनबहादुर थापाले उम्मेदवारी दिएकाछन् । यस्तै उपप्रमुख पदका लागि गठबन्धनबाट नेकपा माओवादी केन्द्रका दमनबहादुर कुँवरको उम्मेदवारी दर्ता भएको छ भने एमालेबाट हेमा भट्ट (कपाडी)को उम्मेदवारी दर्ता भएको छ ।
खुल्ला तीन सदस्यका लागि गठबन्धनबाट नेपाली कांग्रेसका करनसिंह कठायत र दानबहादुर बिष्ट तथा माओवादी केन्द्रबाट प्रेमसिंह भाटको उम्मेदवारी दर्ता भएको छ । यस्तै एमालेको तर्फबाट ईश्वरबहादुर बोहरा, कालुसिंह जोशी र दिपेन्द्रबहादुर धानुकको मनोनयन दर्ता भएको छ ।
यस्तै खुला तीन महिला सदस्यमा गठबन्धनबाट नेपाली कांग्रेसका यशोदा चन्द, माओवादी केन्द्रबाट निर्मला भट्ट र स्वतन्त्रबाट हरना पार्कीको उम्मेदवारी दर्ता भएको छ । यस्तै एमालेबाट महिला सदस्यमा चन्द्रा जोशी (पाण्डेय) र यशोदा महरा गरेर दुई जनाको मात्रै उम्मेदवारी दर्ता भएको छ ।
यस्तै दलित सदस्यमा नेपाली कांग्रेसबाट हरु नेपाली र एमालेबाट द्रोपती दयालको उम्मेदवारी दर्ता भएको छ ।
जिससमा पालिकाका प्रमुख तथा उपप्रमुख मतदाता रहने प्रावधान छ । जिल्ला समन्वय समितिको नयाँ नेतृत्व चयनका लागि जेठ २४ गते बिहान ७ बजेदेखि ९ बजेसम्म मतदानको समय तोकिएको छ ।
१० स्थानियतहका २० भोट रहेको बैतडीमा ९ भोट नेपाली कांग्रेस संग छ भने, २भोट नेकपा माओवादी केन्द्र संग छ । एमाले एक्लै संग ८ भोट हुदाँ स्वतन्त्र संग एक भोट रहेको छ । यसरी गठबन्धनको जित हुने निश्चीत जस्तै देखिन्छ ।
