बैतडीमा हिंसाका घटनामा बृद्धी, प्रहरी सचेतना फैलाउदै

प्रदेश समाचार

Home
प्रदेश समाचार
बैतडीमा हिंसाका घटनामा बृद्धी, प्रहरी सचेतना फैलाउदै

बैतडीमा हिंसाका घटनामा बृद्धी, प्रहरी सचेतना फैलाउदै

२०७९ वैशाख २३ गते खानेपानीको विषयमा विवाद हुँदा डिलासैनी गाउँपालिका–७ मनकुडाका २७ वर्षीय श्यामबहादुर ऐरको हत्या भयो। सोही ठाउँका दाइ नाता पर्ने वीरेन्द्र ऐरले श्यामको छातीमा कोदालोले हिर्काएपछि उपचारका लागि अस्पताल लैजाने क्रममा उनको बाटोमै ज्यान गयोे। श्यामलाई प्रहरीले नियन्त्रणमा लिई कारबाही प्रक्रिया अघि बढाएको छ।

गत असार २५ गते पुर्चाैडी नगरपालिका–३ ढुंगाविसौनाका ४५ वर्षीय गोविन्द पार्कीको कुटपिटबाटै मृत्यु भयो। सोही ठाउँका ४६ वर्षीय पुरनबहादुर बोहराको कुटाइबाट उनको उपचारका क्रममा ३ दिनपछि स्थानीय गोकुलेश्वर अस्पतालमा मृत्यु भयो। त्यस्तै, साउन १३ गते डिलासैनी–५ सेराका ६८ वर्षीय अन्तराम जोशीको २४ वर्षीय छोरा लोकेन्द्र जोशीले बन्चरो प्रहार गरी हत्या गरे। जिल्ला प्रहरी कार्यालयका अनुसार बैतडीमा गत साउनदेखि हालसम्म ८ जनाको हत्या भएको छ। समाजमा आफन्तबाटै हत्या जस्तो जघन्य अपराधका घटनाहरू घटिरहँदा चिन्ताको विषय बनेको छ। हत्याको मात्रै नभई महिलामाथि हुने हिंसाका घटना पनि बढ्दो छ।

गत आर्थिक वर्षमा मात्रै १२ वटा बलात्कारका घटना घटेका छन् भने ४ वटा जबरजस्ती करणी उद्योगका घटना दर्ता भएको जिल्ला प्रहरी कार्यालयले जनाएको छ। घरायसी हिंसा र लैंगिक हिंसाका घटना पनि गत आर्थिक वर्षमा ४९ वटा दर्ता भएका छन्। हत्या, बलात्कार, जबरजस्ती करणी जस्ता जघन्य अपराधका घटनाहरू बढीजासो आफन्तकै संलग्नता रहेको प्रहरीको भनाइ छ। समाजमा हुने हिंसाका घटना न्यूनीकरण गर्ने लक्ष्यका साथ बैतडीमा प्रहरीले सचेतना अभियानलाई तीव्रता दिएको छ। प्रहरी गाउँ टोलमै पुगेर सर्वसाधरणहरूमा सचेतना फैलाउन थालेको हो। घरेलु हिंसा, लैंगिक हिंसा न्यूनीकरण, बालविवाह अन्त्य, समाजिक सञ्जालको प्रयोग, विद्युतीय अपराध र सामाजिक अपराध नियन्त्रण र कानुनी व्यवस्थाबारे सचेतना दिन थालिएको जिल्ला प्रहरी कार्यालय बैतडीका सूचना अधिकारी लोकराज जोशीले बताए।

लागूऔषध दुव्र्यसनीबाट हुने बेफाइदा वा विकृतिबारे सचेतना फैलाउन थालिएको उनले बताए। जिल्ला प्रहरी कार्यालयसहित २७ वटै प्रहरी चौकीबाट सचेतनाको अभियान जारी रहेको जिल्ला प्रहरी कार्यालयले जनाएको छ। समाजमा हुने अपराधिक घटना न्यूनीकरण र कानुनी व्यवस्थाबारे जानकारी भइरहेकाले यसले सकारात्मक सोचको विकास हुने पनि सरोकारवाला निकायले बताएका छन्।

प्रकाशित मिति: शुक्रबार, साउन २०, २०७९ ०९:३९

प्रतिक्रिया दिनुहोस्