बैतडी
बैतडीको दशरथचन्द नगरपालिका वडा न.१ गुरुखोलामा जन्मीएका भुपेन्द्र चन्द २०६१ सालदेखी भलिवल खेलमा सक्रिय छन् । उनले भलिवल खेलमा दमदार सटहरु हान्दा दर्शकको हल्ला र तालीले वाहवाही पाउँछन् ।
उनले २ दर्जन बढी खेलहरुमा उत्कृष्ट खेलाडीको उपाधी जितेका छन् भने, १सय बढी नयाँ खेलाडी उत्पादन गरेकाछन् । चन्द ५ पटक बैतडी जिल्लाबाट क्षेत्रीय टिमको कप्तानी सम्हालेका व्यक्ति हुन् । उनको कप्तानीमा रहेको बैतडीको टिम हरेक पटक क्षेत्रीय प्रतियोगीतामा प्रथम वा द्वितिय भएको चन्द सुनाउछन् ।
उनले बुटवल र नवलपरासीमा गरी २ पटक राष्ट्रिय भलिवल प्रतियोगीता खेलेकाछन् ।
चन्दले भारतको पिथौरागढ स्थीत डिग्री कलेजबाट क्षेत्रीय खेल खेल्दा उत्कृष्ट प्रतिभा देखाएका थिए । उक्त खेलमा उनले बेष्ट स्पाईकरको उपाधी पाउदैँ राष्ट्रीय खेलका लागी छनोट भए । यद्धपी उनले प्राविधिक कारणले भारतमा राष्ट्रीय प्रतियोगीता भने खेलेनन् ।
भुपेन्द्रले ३बर्ष राष्ट्रपती रनिङ्ग शिल्ड प्रतियोगीताका लागी निङ्गलाशैनी मावी देहिमाण्डौँका खेलाडीहरुलाई निशुल्क प्रशिक्षण गरेका थिए भने मणिलेक मावी गुरुखोलामा पनि खेलकुद प्रतियोगीताका लागी सहयोग गर्दै आएकाछन् ।
बैतडी जिल्लामा हुने अन्य खेलकूद प्रतियोगीताहरुमा पुरुस्कार राशी घोषणा गर्दै अनुशासीत र उत्कृष्ट खेलाडीहरुलाई पुरुस्कार दिदैँ आएकाछन् ।
बैतडीमा हुने भलिवल, फुटवल, क्रिकेट, व्याडम्यान्टन लगायतका प्रतियोगीताहरुमा व्यवस्थापकीय भुमिका खेल्दै आएकाछन् ।
चन्दले २०७३ सालमा प्रदेश रेफ्रीको ७दिने तालिम प्राप्त गरी लाइसेन्स प्राप्त गरेका हुन् । उनले दर्जनौँ प्रतियोगीताहरुमा रेफ्री संयोजक बसेर प्रतियोगीताहरु सम्पन्न गरेका छन् । आफु सहभागी भएको कुनैपनी खेलमा कहिल्यै पनी विवाद नआएको उनको भनाई छ ।
चन्दले कलाकारीतामा समेत चासो राख्छन् । उनले रामलिला महोत्सवहरुमा विभिन्न पात्रको भुमिका निर्वाह गर्दै आएका छन् । कुम्भकर्ण, दुषण, अही रावण लगायतका पात्र र सोराडी राजाको भुमिका निर्वाह गरिरहेका छन् । उनले खेल प्रतियोगीताहरुमा समेत डेउडा तथा दोहोरी गीत गाउदैँ खेलाडीहरुलाई मनोरञ्जनका साथै हौशला प्रदान गर्दै आएकाछन् ।
उनि यातायात व्यवसायी समेत भएकाले आर्थीक अवस्था कमजोर भएका खेलाडीहरुलाई गाडीभाडा निशुल्क गर्ने गर्दछन् । चन्दको देहिमाण्डौँ बजारमा विगतमा चर्चीत क्यासेट सेन्टर थियो । उनले खेलाडीहरुलाई पुरुस्कारमा समेत उत्कृष्ट गीतहरु समेटिएका क्यासेट वितरण गर्ने गर्दथे ।
बैतडी जिल्ला भलिवल संघका वर्तमान कोषाध्यक्ष रहेका चन्द अहिले दशरथचन्द नगरपालिका अन्तरगत नगर खेलकूद विकास समिती अध्यक्ष हुन् । आगामी दिनमा जिल्ला स्तरमै खेलकूद क्षेत्रको नेतृत्व गर्न पाएमा बैतडी जिल्लालाई उत्कृष्ट खेलाडीहरुको जिल्ला भनेर चिनाउने रहर छ ।
