अन्योलमा सडक हस्तान्तरण

प्रदेश समाचार

Home
प्रदेश समाचार
अन्योलमा सडक हस्तान्तरण

अन्योलमा सडक हस्तान्तरण

पाटन–पञ्चेश्वर सडकखण्डमा पर्ने जेरो पोइन्टको रुपमा रहेको पाटन लोर्खा सडक हस्तान्तरणको प्रक्रिया अन्योलमा परेको छ । सडक डिभिजन कार्यालय मातहत रहेको उक्त सडकखण्ड प्रदेश मातहत रहेको पूर्वाधार विकास कार्यालयलाई हस्तान्तरण गर्ने भनिएपनि हालसम्म हुन सकेको छैन ।

पाटनदेखि लोर्खासम्म तीन किलोमिटर सडकको स्तरोन्नती नहुदा बर्षायाममा हिलाम्मे र हिउँदमा धुलाम्मे हुँदा सवारी साधन सञ्चालन तथा पैदल यात्रीहरुलाई समेत आवतजावत गर्न समस्या हुने गरेको पाटन नगरपालिका ६ का राजेश पन्तले बताए । बर्खाको समयमा सडकमा पानी जमेर हिलो हुने गरेको स्थानीयहरुलाई आउजाउ गर्न समस्या भइरहेको उनको भनाइ छ ।

‘साँघुरो सडक छ । पैदल यात्रूहरुको आउजाउ भइरहेको हुन्छ । त्यसकारण दुर्घटनाको पनि जोखीम रहेको छ’,उनले भने ।लोर्खादेखि पञ्चेश्वरसम्मको सडक सुदूरपश्चिम प्रदेशको भौतिक विकास मन्त्रालय अन्तर्गतको पुर्वाधार विकास कार्यालयको जिम्मा रहेको छ । लोर्खादेखि मेलौली सम्म कालोपत्रेको काम सम्पन्न भइसकेको छ । उक्त सडकखण्डमा स्तरोन्नतीका काम धमाधम भइरको भएपनि पाटनदेखि लोर्खासम्मको तीन किलोमिटर सडक स्तरोन्नती नहुदा दुर्घटनाको जोखिम बढेकोे जीप चालक राम बहादुर चन्दले बताए । ‘गाडीहरुको चौविसै घण्टा आउजाउ भइरहेको हुन्छ, ब्याक गर्न समेत समस्या छ’ उनले भने ‘मालवाहक गाडीहरु हिलोमा फस्ने गरेका छन् ।’

सडकका खाल्डाखुल्डी र हिलोका कारण स्थानीय एवम् सवारी धनी सास्ती भोग्दै आएका छन् । संघीय सरकार मातहत रहेको सडक डिभिजन कार्यालयले प्रदेश पुर्वाधार विकास कार्यालयलाई हस्तान्तरण गर्ने भने पनि संघीय सरकारबाट पत्र नआउँदा हस्तान्तरणको काम अलपत्र परेको सडक डिभिजन कार्यालयका सूचना अधिकारी राहुल राज पाण्डेयले जानकारी दिए । सडक हस्तान्तरणमा ढिलाई हुँदा स्तरोन्नतीको लागि बजेट पनि नआएको उनले बताए ।

प्रकाशित मिति: शनिबार, माघ २८, २०७९ ०८:३५

प्रतिक्रिया दिनुहोस्