शिलान्यासको दुई वर्षः बैतडीका पालिका अस्पतालको जग समेत बसेन

प्रदेश समाचार

Home
प्रदेश समाचार
शिलान्यासको दुई वर्षः बैतडीका पालिका अस्पतालको जग समेत बसेन

शिलान्यासको दुई वर्षः बैतडीका पालिका अस्पतालको जग समेत बसेन

नागरीकका लागि गाउँमै चिकित्सकीय स्वास्थ्य सेवा प्राप्त होस भनेर २०७७ मंसिरमा सरकारले ३ सयभन्दा बढी स्थानीयतहमा एकै पटक अस्पतालको शिलान्यास गरेको थियो । दुई वर्षभित्रै निर्माण सम्पन्न गर्ने महत्वकांक्षी योजनासहित ५, १० र १५ शैयाको अस्पताल निर्माण गर्ने भन्दै एकैपटक शिलान्यास गरिएको भएपनि अस्पतालको निर्माण प्रगती शून्य छ । सर्बसाधारणले गाउँमै स्तरीय स्वास्थ्य सेवा प्राप्त गर्ने आस गरेको भएपनि निर्माण कम्पनीको लापरवाही र स्थानीयतहले तदारुकता नदेखाउदा अस्पताल निर्माण कार्यमा चरम ढिलाई भइरहेको छ ।
बैतडीको दशरथचन्द नगरपालिका बाहेकका ९ वटै स्थानीयतहमा १० र १५ शैयाको अस्पताल निर्माण गर्ने योजना थियो । तर केहि पालिकामा निर्माण प्रक्रिया सुरु भएको छैन भने निर्माण सुरु भएका पालिकामा पनि प्रगति शून्यप्राय छ । मेलौली नगरपालिकामा जग्गा बिवादले अस्पताल निर्माणको कुनै प्रक्रिया अघि बढ्न सकेको छैन । अन्य पालिकामा पनि कुनै प्रगति छैन । शिलान्यास गरिएको २ वर्ष पुरा हुदापनि हालसम्म यहाँका अधिकांस अस्पताल निर्माणमा जग समेत बसाल्न सकिएको छैनन् ।
जिल्लाको सुर्नया गाउँपालिकामा ५ मा बन्ने भनिएको १० शैयाको अस्पतालको काम समेत शुरु भएको छैन । गतवर्ष नै ठेक्का प्रक्रिया भई काम शुरु हुने भनिएको भएपनी हालसम्म कुनै काम भएको छैन । ‘गत वर्षनै निर्माणस्थलमा जग खन्ने काम भएको थियो, त्यसपछि कुनै काम अघि बढेन,’ । सुर्नया गाउँपालिकाका स्वास्थ्य साखा प्रमुख राम सिंह महराले भने । ठेकेदारको लपरवाहीले काम अघि बढ्न नसकेको र केहिदिनदेखि काम शुरु हुने सुर्नया गाउँपालिकाका योजना साखा प्रमुख, इन्जिनियर कपीलदेव भट्टले बताए ।
पाटन नगरपालिकाले निर्माण सम्पन्न गर्न निर्माण कम्पनीसँग सम्झौता भएको डेढ वर्ष पुग्नै लागेको छ । तर निर्माणको प्रगती शून्यप्राय छ । सिनर्जी प्रधान जेभीले १४ करोडमा निर्माण सम्पन्न गर्नेगरी सम्झौता गरेको भएपनि अस्पताल संरचनाको फिल्ड कटिङ र वाल मात्रै निर्माण भएको छ भने जग समेत बसेको छैन । निर्माण कम्पनीले २ करोड २० लाख रुपैया पेस्की बुझी सकेको छ । साउन महिनायता काम ठप्प छ । तीन पटक पत्राचार गरेर ताकेता गर्दापनि निर्माण कम्पनीले अटेरी गर्दै आएको पाटन नगरपालिकाका प्रशासन साखा प्रमुख राजेन्द्र प्रशाद भट्टले जानकारी दिए ।
पुर्चाैडी नगरपालिकामा पनि निर्माण व्यावसायीसँग सम्झौता भएको २ वर्ष पुग्नै लागेको छ । निर्माण सम्पन्न गर्ने म्याद ६ महिनामात्रै बाकी रहदा काम सुरु भएको छ । जग्गा विवाद लगायत निर्माण कम्पनीका लापरवाहीले काम रोकिएको भएपनि केहिदिनदेखि काम सुरु भएको पुर्चाैडी नगरपालिकाका नगर प्रमुख दीपक बहादुर बमले जानकारी दिए ।
सिगास गाउँपालिकामा पनि १५ शैयाको अस्पताल निर्माण गर्ने भनिएको भएपनि प्रक्रिया अघि बढेको छैन । हालै डिपिआर सम्पन्न भएको र रिर्पाेट मन्त्रालयमा पेस गर्ने तयारी भइरहेको स्वास्थ्य साखा प्रमुख घनश्याम सिंह बोहराले जानकारी दिए । १८ करोड लागतमा सिगास–८मा अस्पताल बन्ने उनले बताए ।
जग्गा विवादका कारण अस्पताल निर्माण प्रक्रिया अघि नबढेको पञ्चेश्वर गाउापापिलकामा पनि गत वर्षदेखि आन्तरिक प्रक्रिया सुरु भएको छ । पञ्चेश्वर गाउँपालिकाको केन्द्र वडा नं ४ को आमचौरामा बन्ने १० शैयाको अस्पतालको लागि डिपिआर तयार पारिएको र टेण्डर खोल्ने तयारी भइरहेको गाउँपालिकाका उपाध्यक्ष बिना भट्टले जानकारी दिइन् । ‘जग्गा विवादले ढिलाई भएको थियो, गत वर्षमात्रै जग्गा विवाद सुल्झायौँ, अब निर्माण सुरु गर्ने तयारीमा छौँ,’ उनले भनिन् ।
जिल्लाको दोगडाकेदार गाउँपालिकामा केहि प्रगति भएको छ । गत वर्षदेखि निर्माण प्रक्रिया सुरु भएको र पहिलोतला ढलानको तयारी भइरहेको प्रमुख प्रशासकीय अधिकृत रविन्द्र बहादुर धामीले बताए । दोगडाकदारमा १० शैयाको अस्पताल बन्न लागेको हो ।
निर्माण व्यावसायीको लापरवाही र स्थानीयतहहरुले तदारुकता नदेखाउदा अस्पताल निर्माणमा ढिलाई भइरहेको स्वास्थ्य कार्यालय बैतडीका प्रमुख योगेश प्रशाद भट्टले बताए । स्थानीय तहकै जिम्मेवारीमा बन्न लागेका अस्पताल निर्माणको प्रगति निकै सुस्त रहेको उनले बताए ।

प्रकाशित मिति: आइतबार, फागुन १४, २०७९ ०८:३८

प्रतिक्रिया दिनुहोस्