बैतडी,
बैतडीको मेलौली नगरपालिकामा रहेको केशरपुर प्राथमिक स्वास्थ्य केन्द्र न्यूनतम सेवा मापदण्डमा मेलौली नगरपालिकाकै उत्कृष्ट भएको छ । नगरपालिकाको स्वास्थ्य शाखाले गरेको अनुगमनका क्रममा पालिकाकै उत्कृष्टमा पर्न सफल भएको हो ।
स्वास्थ्य चौकीले दिने सेवाको गुणस्तर, भौतिक ब्यवस्थापन, सरसफाइका हिसाबले तल्लो स्वराड क्षेत्रकै रेफरल अस्पतालका रुपमा रहेको केशरपुर प्राथमिक स्वास्थ्य केन्द्रले ९३.६ प्रतिशत अंक ल्याएर पहिलो नम्बरमा परेको मेलौली नगरपालिका स्वास्थ्य संयोजक नारायण चन्दले जानकारी दिए ।
अनुगमनका क्रममा सलेना स्वास्थ्य चौकीले ९०.९१ प्रतिशत, बिशालपुर स्वास्थ्यचौकीले ८६ प्रतिशत, महारुद्र स्वास्थ्य चौकीले ८३.३ प्रतिशत, र दुर्गास्थान स्वास्थ्य चौकीले ७५ प्रतिशत अंक प्राप्त गरेका छन् । पछिल्लो समयमा नगरपालिका भित्र रहेका स्वास्थ्य चौकीहरुले प्रवाह गर्ने सेवाहरुलाई प्रभावकारी बनाउदै लगेका स्वास्थ्य सह संयोजक राज बहादुर चन्दले बताए।
लामो समयदेखी दरबन्दीअनुसार कर्मचारी नहुँदा सास्ती खेप्दै आएको केशरपुर प्राथमिक स्वास्थ्य केन्द्रले पछिल्लो समय भने दरबन्दी अनुसारका स्वास्थ्यकर्मी रहेका छन् ।
एक जना मेडिकल अधिकुत, एक जना जनस्वास्थ्य निरिक्षक, दुई जना अहेब, चार अनमी, एक ल्याब टेक्नीसियन र चार जना कार्यालय सहयोगि गरि १३ जनाको जनशक्ति रहेको जनस्वास्थ्य निरिक्षक मुकेश कान्त दयालले जानकारी दिनुभयो ।
मेडिकल अधिकृतले दिने सेवाहरु निरोगिताको प्रमाणपत्र, पोष्टमाटम र अपाङग परिचय पत्र लिन जिल्ला धाउनुपर्ने बाध्यताको अन्त्य भएको दयालले बताए । केन्द्रमा डिजिटल एक्सरे लगायत प्रयोगशालामा केही आधुनिक उपकरणहरु जडान गरीएकाले सेवा प्रवाहमा सहज भएको उहाँको भनाइ छ ।
