बझाङको बित्थडचिर गाउँपालिकामा कमल बोहरा स्मृति भलिबल तथा डेउडा प्रतियोगिताको सुरु भएको छ ।नेकपा एमाले बित्थडचिर गाउँ कमिटीको आयोजनामा प्रथम स्मृति भलिबल तथा डेउडा प्रतियोगिता मंगलबार बाट देउलेखमा सुरु भएको हो ।
प्रतियोगिताको उद्घाटन एमालेका केन्द्रिय सदस्य तथा पुर्व मन्त्री प्रकाशबहादुर शाहले गरेको हुन । प्रतियोगिता उद्घाटन समारोहका प्रमुख अतिथि शाहले खेलाडी राष्ट्रका गहना भएको बताए । उनले खेलाडी अनुशासित हुने भन्दै सबैले सिक्नुपर्ने बताए ।
यस्तै कार्यक्रमका बिशिस्ट अतिथि नेकपा एमाले केन्द्रिय सदस्य लिलाधर भट्टले स्वर्गीय कमल बोहराको स्मृतिमा श्रद्धाञ्जली व्यक्त गर्दै उहाँको नाम अक्षय कोष स्थापना गर्नुपर्ने बताए । साथै एमालेले सञ्चालन गरेको ग्रास रुट अभियानले सार्थकता पाइरहेको बताए ।
नेकपा एमाले बझाङ जिल्ला अध्यक्ष दमन भण्डारीले खेलकुद तथा डेउडा प्रतियोगिताले स्थानीय कला संस्कृतिको जगेर्ना हुने बताए । यस्तै नेकपा एमालेले युवाहरूका क्षेत्रमा निरन्तर काम गरिरहेको बताए ।
यस्तै कार्यक्रमका अध्यक्ष तथा एमाले बित्थडचिर गाउँपालिका अध्यक्ष दिपेन्द्र बोहराले स्थानीय कला संस्कृतिको संरक्षण तथा खेलकुदको विकासको लागि प्रतियोगिता आयोजना गरिएको बताए ।
उनले देवेश्वरी माध्यमिक विद्यालयका अनेरास्ववियु प्रारम्भिक कमिटी अध्यक्ष कमल बोहराको प्रथम स्मृति दिवसको अवसरमा आयोजित प्रतियोगिताले निरन्तरता पाउने र अक्षय कोष समेत स्थापना गरिने बताए ।
प्रतियोगिताको विजेताले ३१ हजार १११ रुपैयाँ तथा तथा उपविजेताले २१ हजार १११ रुपैयाँ प्राप्त गर्नेछन् । यस्तै तेस्रो हुने टोलीले नगद ११ हजार १११ रुपैयाँबाट पुरस्कृत हुनेछन ।खेल देवेश्वरी मावि देउलेखको खेलमैदानमा भइरहेको छ ।
यस्तै `स्थानीय कला र संस्कृति, संरक्षण गरौं हटाएर विकृति´ शीर्षकमा वडा स्तरीय महिला पुरुष डेउडा प्रतियोगिता समेत भइरहेको छ ।
डेउडा प्रतियोगितामा विजेताले १५ हजार, उपविजेताले १० हजार प्राप्त गर्नेछन् । यस्तै तेस्रो हुने टोलिले ५ हजार पुरस्कार प्राप्त गर्ने अध्यक्ष बोहराले बताए ।
