बैतडी
बैतडीमा पसलै पिच्छे म्याद नाघेका अखाद्य बस्तु भेटिने गरेका छन् । स्थानीय तहहरुले बजार अनुगमनमा चासो नदेखाउँदा जिल्लाका स्थानीय बजारमा सञ्चालनमा रहेका पसलहरुमा म्याद नाघेका अखाद्य बस्तु भेटिने गरेका हुन् । जिल्लाका अधिकांश पालिकाहरुले आफ्नो क्षेत्राधिकार भित्र पर्ने स्थानीय बजारहरुको अनुगमन नगरेको पाइएको छ ।
शनिवार संयुक्त बजार अनुगमन टोलीले गोकुलेश्वर बजारका २१ पसलहरुको अनुगमन गरेकोमा अधिकांस पसलहरुमा म्याद नाघेका अखाद्य बस्तु भेटिएको जिल्ला प्रशासन कार्यालय बैतडीमा प्रशासकीय अधिकृत एवं सूचना अधिकारी शंकरबहादुर बोहराले जानकारी दिनुभयो । अनुगमनका क्रममा प्रायजसो सबै पसलहरुमा म्याद नाघेका खाद्य सामानहरु राखेको पाइएको उहाँले बताउनुभयो ।
अनुगमनका क्रममा झन्डै २४ हजार ६ सय २६ रुपैँया बराबरका अखाद्य बस्तु बरामद गरी नष्ट गरिएको बोहराले जानकारी दिनुभयो । ‘बजार अनुगमनको जिम्मेबारी स्थानीय तहहरुको पनि हो, उहाँहरुले अनुगमनमा चासो देखाएका छैनन्’ सूचना अधिकारी बोहराले भन्नुभयो ‘स्थानीय पसलहरुमा म्याद नाघेका अखाद्य बस्तुहरु जताजतै भेटिने गरेका छन् ’
म्याद नाघेका अखाद्य बस्तुहरु बिक्री वितरण गर्ने, नविकरण नगर्ने र दर्ता नगरी सञ्चालनमा रहेका ९ पसलबाट ६० हजार असुल गरिएको छ । ६ ओटा पसलहरुबाट ५÷५ हजारका दरले ३० हजार जरिवान असुल गरीएको छ भने बाँकी ३ पसलहरुलाई १०÷१० हजारका दरले ३० हजार जरिवाना गरीएको घरेलु तथा साना उद्योग कार्यालय बैतडीका सूचना अधिकारी लक्षमण कुमार साउँदले जानकारी दिनुभयो ।
खाद्य बस्तु खरिद गर्दा उपभोक्ताहरुले सजक बन्नु पर्ने खाद्य प्रविधि तथा गुण नियन्त्रण डिभिजन कार्यालय बैतडीका प्रमुख एवं खाद्य अनुसन्धान अधिकृत प्रविण कुमार अधिकारीले बताउनुभयो । बजारबाट खाद्यबस्तु खरिद गर्दा उत्पादन तथा उपभोग्य मिति, उत्पादक कम्पनी लगायतका कुराहरु राम्ररी हेरेर मात्रै खरिद गर्न अधिकारीले आग्रह गर्नुभयो ।
यसअघि पनि पटकपटक बजार अनुगमन क्रममा म्याद नाघेका अखाद्य बस्तु भेटिने गरेका थिए । बजार अनुगमनको अधिकार स्थानीय तहहरुलाई भएपनि पालिकाहरु चासो देखाएका छैनन् । डिलाशैनी गाउँपालिकाका प्रवक्ता यज्ञ भट्टले आगामी दिनमा बजार अनुगमनलाई तिव्रता दिने बताएका छन् । पालिका भित्र ठुलो बजार क्षेत्र नपर्ने भएकाले बजारको अनुगमन नगरीएको र स्थानीय बजारमा सञ्चालनमा रहेका पसलहरुको अनुगमन गरीने बताउनुभयो ।
चाउचाउ बिष्कुट नम्कीन लगायतका तयारी खानेकुराहरु बढी मात्रामा म्याद नाघेको अवस्थामा भेटिने गरेका छन् । ‘मानव स्वास्थ्यका लागि तयारी खानेकुराहरु फाइदाजनक हुदैनन्’ स्वास्थ्य कार्यालय बैतडीका प्रमुख योगेशप्रशाद भट्टले भन्नुभयो ‘त्यसमाथी म्याद नाघेका अखाद्य बस्तुहरु सेवनले मानव स्वास्थ्यका हानिकारक हुने गर्दछन्’ । झाडापखालजन्य समस्या निम्तीने तथा पछि गएर दिर्घकालीन समस्या आउन सक्ने जोखीम रहेकाले उपभोक्ता र पसल सञ्चालक दुवैले सजक हुनेपर्ने उहाँले बताउनुभयो ।
घरेलु तथा साना उद्योग कार्यालय बैतडीको संयोजकत्वमा जिल्ला प्रशासन कार्यालय र खाद्य प्रविधि तथा गुण नियन्त्रण डिभिजन कार्यालय बैतडीको संयुक्त बजार अनुगमन टोलीले शनिवार जिल्लाको डिलाशैनी गाउँपालिका–५ र ६ का डडीया र गोकुलेश्वर बजारमा सञ्चालनमा रहेका बिभिन्न पसलहरुमा अनुगमन गरेको हो ।
