बैतडी ।
बैतडीको दशरथचन्द नगरपालिकाका जनप्रतिनिधि र कर्मचारीहरुले खैनी, चुरोट र मदिरापान नगर्ने प्रतिवद्धता गरेका छन् । उनिहरुले दैनिक व्यायाम गर्नुका साथै हिड्ने बानीको समेत विकास गर्ने प्रतिवद्धता गरेका हुन् ।
आइतबार स्वास्थ्य कार्यालय बैतडीले नगरपालिकामा आयोजना गरेको नसर्ने रोगको जोखीम न्यूनिकरण सम्बन्धी अन्तरक्रियामा नगर प्रमुख पुष्कर राज जोशी लख्खाभाई सहितका जनप्रतिनिधीहरुले उक्त प्रतिवद्धता व्यक्त गरेका हुन् । उनिहरुले एकै स्वरमा भने, “आजदेखी जाडरक्सी र सुर्ति चुरोट खान्नौँ ! खान्नौँ !! दैनिक हिड्ने र व्यायाम गर्ने बानी बसाउछौँ ! बसाउछौँ !!”
नसर्ने रोग न्युनिकरण अभियानका अभियन्ता डाक्टर प्रज्वल प्याकुरेलले जनप्रतिनिधी र कर्मचारीहरुलाई प्रशिक्षण गरेका थिए । प्रशिक्षणका क्रममा डाः प्याकुरेलले हरेक व्यक्तिले दैनिक हिड्नु र व्यायाम गर्नु जरुरी रहेको बताए । उनले हरेक व्यक्तिले लागुऔषध, धुम्रपान तथा मध्यपान गर्नै नहुने बताए ।
हरेक व्यक्तिले दैनिक खानपानमा ध्यान दिनुपर्नेमा स्वास्थ्य कार्यालय बैतडीका प्रमुख योगेश प्रसाद भट्टको जोड छ । उनले दैनिक खानेकुराको साथमा फलफुल अनिवार्य खानुपर्ने बताए । प्याकेटका खानेकुरा बालबालिकाहरुका लागि अस्वस्थकर भएकाले स्कूल नजिक प्याकेटका खानेकुरा बिक्रिमा रोक लगाउन आग्रह गरे । उनले सबै वडाअध्यक्षहरुलाई स्कूल नजिकका पसलमा जंक फुड नबेच्ने निर्णय गर्न अनुरोध गरेकाछन् । उक्त कुराको प्रयास गरिने वडा अध्यक्षहरुको प्रतिवद्धता छ ।
नगर प्रवक्ता समेत रहेका दशरथचन्द नगरपालिका–३ का वडाअध्यक्ष अजव पाण्डेले भने,‘हामीले बालबालिका र उनिहरुका अविभावकहरुलाई प्याकेटका खानेकुरा स्वस्थकर नभएको बिषयमा स्वास्थ्यकर्मी मार्फत प्रशिक्षण गराउछौँ र व्यापारीहरुलाई समेत त्यस्ता खानेकुरा नबेच्न आग्रह गर्छौ ।’
नगर प्रमुख पुष्कर राज जोशी लख्खाभाईले भने,‘म आजैका मितिदेखी खानपानको बानी व्यहोरामा सुधार गर्छु, दैनिक १० किलोमिटर हिड्ने गरेको छु यसलाई अझै बढाउँछु र सबै जनप्रतिनिधि तथा कर्मचारीहरुलाई पनि खानपानमा सुधार गर्न आग्रह गर्छु, सबैभन्दा बढी तनाव हामी जनप्रतिनिधहिरुलाई हुन्छ, खानपानमा ध्यान नदिई व्यायाम पनि नगर्ने हो भने, भविष्य नसर्ने रोगहरुको जोखीममा छ । त्यसैले सबैजना आफ्नो बानी व्यवहार सुधार गरौँ ।’
बैतडी सदरमुकाम गोठलापानी स्थीत निर्माणाधिन जगन्नाथ बहुमुखी क्याम्पसको खेल मैदानमा दैनिक दौड र व्यायाम गर्ने व्यवस्था समेत गरिने नगरप्रमुख जोशीले बताए ।
आइतबार दशरथचन्द नगरपालिकामा नसर्ने रोग सम्बन्धी अन्तरक्रिया कार्यक्रम संगै निशुल्क स्वास्थ्य परिक्षण समेत गरिएको छ ।
