बैतडी,
बैतडीको पञ्चेश्वर गाउँपालिकाका स्वास्थ्य संयोजक राम सागर शाहले अवैधानिक रुपमा क्लिनिक चलाउँदै आएको पाइएको छ । यतिमात्रै होइन क्लिनिकमा गैर स्वास्थ्यकर्मीले बिरामी जाँच गर्ने देखि औषधी समेत विक्रि गर्ने गरेको पाइएको हो । स्वास्थ्य शाखा प्रमुख शाहकै श्रीमती श्यामा शाहले औषधी बिक्री गर्नेदेखि बिरामी समेत जाँच्ने गरेको पाइएको हो । उहाँ मेडिकल सञ्चालन सम्बन्धी कुनै शिक्षा हासिल नगरेकी गैर चिकित्सा व्यक्ति हुन् । तर नीति नियमको धज्जी उडाउँदै शाहले वर्षौँदेखि निजी क्लिनिक सञ्चालन गरिरहेको पाइएको हो । यतिमात्रै होइन गैर चिकित्सा व्यक्तिले बिरामी जाँच देखि औषधी बिक्री गरी जनस्वास्थ्यमाथि गम्भिर लापरवाही गरिरहेको पाइएको हो ।
यसअघि पनि गाउँपालिकामा उक्त क्लिनिकबारेमा छानबिनको गर्न माग गर्दै निवेदन समेत परेको थियो । त्यसबेला पनि पालिकाले गरेको छानविनमा उक्त क्लिनिक गैरकानुनीरूपमा सञ्चालन रहेको भेटिएको थियो । तर उक्त क्लिनिक सञ्चालनमै रहिरह्यो । स्वास्थ्य शाखा प्रमुख शाहले भने सिएमए सङ्घबाट अनुमति लिएर क्लिनिक सञ्चालन गरेको बताउँछन् । तर सिएमए संघ क्लिनिक सञ्चालन गर्न अनुमति दिने निकाय नै होइन ।
सम्बन्धित स्थानीय तहले मापदण्ड बनाएर क्लिनिक सञ्चालनको अनुमति दिने गर्दछ । त्यसमा पनि क्लिनिकमा आवश्यक पर्ने पूर्वाधार, जनशक्ति, उपकरणको उपलब्धता लगायत धेरै प्रक्रिया पुर्याएर मात्रै अनुमति पाउने स्वास्थ्य कार्यालय बैतडीका प्रमुख योगेश प्रशाद भट्टले बताए । ‘यस विषयमा जिल्लास्तरमा पनि कुराकानी भएको छ, त्यो गैरकानुनी छ, अब आवश्यक प्रक्रिया अघि बढ्छ’ उनले भने ।
स्वास्थ्य शाखा प्रमुख शाहले भने स्वास्थ्य उपचारमा टेवा पुर्याउन क्लिनिक सञ्चालन गरेको बताएका छन् । ‘यहाँका बिरामीहरूका समस्यालाई मध्यनजर गर्दै क्लिनिक सञ्चालन गरेको हु, कार्यालय समयभन्दा अघिपछिको समयमा म आफै क्लिनिकमा बस्छु,’ । उनले भने ।
कार्यालय समयभन्दा बाहेकको समयमा आफु नै क्लिनिकमा बस्ने गरेको शाहको दाबी छ । तर उहाँकै श्रीमतीले औषधि बिक्री गरेको र बिरामीको स्वास्थ्य जाँच गरिरहेको देखिन्छ । बुधबार मात्रै एक जना सेवाग्राहीबाट दोब्बर मूल्यमा सिटामोल बिक्री गरको भिडियो नै सार्वजनिक भएको थियो ।
यसअघि पनि बेलाबेला म्याद नाघेका औषधी बिक्री भइरहेको आरोप समेत लाग्दै आएको उक्त क्लिनिकका विषयमा सम्बन्धित निकायले चासो नदिएको गुनासो छ ।
प्रमुख जिल्ला अधिकारी सुरेश पन्थीको नेतृत्वमा गरिएको अनुगमनमा समेत पसल बन्द गर्न निर्देशन दिएको बताइएको छ । ‘स्वास्थ्य शाखा प्रमुखले क्लिनिक सञ्चालन गर्न पाइदैन, दोहोरो भयो, बन्द गर्नुहोला भनेका हौँ, हामिले त पहिलो पटक देखेका हौँ, त्यसैले बन्द गर्न सुझाव दिएका थियौँ,’ प्रमुख जिल्ला अधिकारी पन्थीले भने । ‘यसअघि कसैले उजुरी गरेको थिएन, त्यहाँबाट फर्किदा केही स्थानीयले फोन गरेर गैह्रकानुनी रहेको बताएका थिए, हामी बुझ्दैछौँ, आवश्यक प्रक्रियामा गएर तुरुन्तै बन्द गर्छौ’ ।
यसैगरी पञ्चेश्वर गाउँपालिकामा गरिएको बजार अनुगमनमा थुप्रै लापरवाही भएको समेत भेटिएको थियो । केही मदिरा पसलहरूमा समेत भेटेनरीको औषधी विक्रि गरिरहेको पाइएपछि जरिवानासहित कारवाही प्रक्रिया अघि बढाइएको जिल्ला प्रशासन कार्यालय बैतडीले जनाएको छ ।
अवैधानिक रुपमा सञ्चालनमा रहेका केही मदिरा पसलहरूलाई समेत जरिवानासहित कारवाही गरिएको थियो ।
बन्द रहेको घाट सञ्चालनको लागि विशेष पहल सुरु
प्रमुख जिल्ला अधिकारी सुरेश पन्थीको नेत्तृत्वमा रहेको अनुगमन टोलीले पञ्चेश्वर स्थित महाकालीमा बन्द रहेको घाट सञ्चालनको लागि पनि आवश्यक पहल सुरु गरिएको छ ।
भारतीय पक्षले अनुमति नदिदा बन्द रहेको विनायक घाट सञ्चालनका लागि भारतीय पक्षसँग समन्वय भइरहेको छ भने पिथौरागढका डिएमसँग छलफलका लागि प्रतिनिधि पनि पठाइएको प्रमुख जिल्ला अधिकारी पन्थीले बताए ।
