बैतडी,
जिल्ला ट्राफिक कार्यालय बैतडीले २१ लाख बढी राजस्व संकलन गरेको छ । चालु आर्थिक वर्ष २०८९÷०८०को असार मसान्तसम्म ३९ सय ८ वटा सावरीसाधन कारवाहीमा परेकोमा २१ लाख २३ हजार ५ सय राजस्व संकलन गरिएको जिल्ला ट्राफिक कार्यालय बैतडीका प्रमुख, प्रहरी सहायक निरिक्षक तेज बहादुर रावलले जानकारी दिए ।
गत आर्थिक वर्ष २०७८÷७९ मा २१ लाख १८ हजार ५ सय राजस्व असुल गरिएको थियो ।
जिप, मोटरसाइकल, ट्याक्टर, टिप्पर, बस, ट्रक लगायतका सावारी साधनबाट ट्राफिक नियमको उल्लङ्घन गरेबाफत उक्त राजस्व संकलन गरिएको जनाइएको छ । सवारी कागजात नविकरण नगरेको, इजाजतपत्रबिना सावारी चलाएको, मापसे गरी सवारी चलाएको, क्षमता भन्दा बढी यात्रु बोकेको जस्ता ट्राफिक नियमको उल्लङ्घन गरेबाफत जरिवना गरि राजस्व संकलन गरिएको हो ।
जिल्ला सदरमुकाम क्षेत्र, सत्बाज, पाटन र खोडपेमा ट्राफिक प्रहरीको उपस्थिति रहेको छ ।
जिल्लाको मेलौली र गोकुलेश्वरमा पनि ट्राफिक प्रहरीको उपस्थिति अनिवार्य भइसकेको छ । यसका लागि जिल्ला ट्राफिक प्रहरी कार्यालय र जिल्ला प्रहरी कार्यालयको पहलमा थप आवश्यक दरबन्दी पनि माग गरिएको छ ।
प्रदेश ट्राफिक प्रहरी कार्यालयसँग दरबन्दी मागको लागि बेलाबेला छलफल भइरहने गरेको जिल्ला प्रहरी कार्यालय बैतडीका प्रमुख, प्रहरी नायब उपरिक्षक प्रेम बहादुर शाहीले बताए । ‘हामिले ट्राफिक प्रहरी कार्यालयको माथिल्लो निकायमा यसबारे माग गरीरहेका छौँ,’ । उनले भने ।
जिल्ला ट्राफिक प्रहरी कार्यालय बैतडीका प्रमुख प्रहरी सहायक निरिक्षक तेज बहादुर रावलका अनुसार यस वर्ष मेलौलीमा ट्राफिक प्रहरीको अस्थायी पोष्ट स्थापनको विशेष पहल भइरहेको बताए । ‘यसवर्ष मेलौलीमा ट्राफिकको उपस्थिति हुन्छ, माथिल्लो निकाय सकारात्मक छ’ । उनले भने ।
जिल्लामा अहिले ११ जना मात्रै ट्राफिक प्रहरी रहेका छन् । १६ जनाको दरबन्दी आवश्यक हो ।
