बैतडी,
पाटन क्रिकेट क्लबले पाटन प्रिमियर लिग सिजन–३ (पिपिएल–३) क्रिकेट प्रतियोगिताको आन्तरिक तयारी सुरु भएको छ । दशँै र तिहारको मध्य समयमा प्रतियोगिताको आयोजना गर्ने तयारी थालिएको हो ।
गत वर्ष टेनिस बलले प्रतियोगिताको आयोजना गरिएको थियो । यस वर्ष ड्यूज बलले प्रतियोगिता आयोजना गर्ने निर्णय भएको पाटन क्रिकेट क्लबका उपाध्यक्ष अशोक बिष्टले जानकारी दिए । प्रतियोगिताको आन्तरिक तयारी सुरु भएको बिष्टले बताए ।
गत वर्षको भन्दा केहि फरक तरिकाले प्रतियोगिता सञ्चालन गर्नेबारे छलफल भएको पाटन क्रिकेट क्लबका अध्यक्ष किरन चन्दले बताए । जिल्ला भित्रकै टिमलाई प्रतियोगितामा सहभागिता गराउने उनले बताए । यसैगरी कुनै एक टिममा जिल्ला बाहिरका बढीमा चार जना खेलाडीलाई मात्रै सहभागिता जनाउन पाउने व्यवस्था गर्नेगरि छलफल भइरहेको क्लबका अध्यक्ष चन्दले बताए ।
गत वर्ष टेनिस बलले प्रतियोगिताको आयोजना गरिएको थियो भने प्रथम पुरस्कार १ लाख ११ हजार १११ रुपैयासहित ट्रफि, मेडल र प्रमाणपत्र प्रदान गरिएको थियो । दोश्रो हुने टिमलाई ५५ हजार ५५५रुपैयासहितट्रफि, मेडल र प्रमाणपत्र प्रदान गरिएको थियो । गत वर्ष भीमदत्त बहुप्राबिधिक शिक्षालयले उपाधि जितेको थियो ।
यस वर्षको पुरस्कार राशी पनि गत वर्षकै यथावथ राख्नेबारे पनि छलफल हुने छ । यहि साउन अन्त्यतिर बस्ने अर्काे बैठकबाट बाकी विषयको टुंगो लाग्ने क्लवले जनाएको छ ।
गत वर्ष जिल्ला बाहिरका मात्रै होइन भारतका खेलाडीलाई समेत प्रतियोगितामा सहभागिता जनाउने अवसर दिएको थियो । यसवर्ष बैतडीको क्रिकेटको विकासको लागि भन्दै जिल्लाभित्रका टिमलाई मात्रै प्रतियोगितामा भाग लिन पाउने व्यवस्था गर्न लागिएको हो ।
राज्यस्तर र निजिस्तरबाट समेत सहयोगको अपलि गरिएको छ । बैतडीको क्रिकेट विकासमा पिपिएल प्रतियोगिता आयोजना गरिरहेकाले सबै क्षेत्रबाट आवश्यक सहयोग पाएको अवस्थामा यस प्रतियोगितालाई राष्ट्रियस्तरबाट समेत मान्यता पाउने सम्भावना रहेको छ । सम्बद्ध सबै निकायबाट आवश्यक सहयोगको खाँचो रहेको छ ।
पाटन नगरपालिकाको साझा क्लबको रुपमा रहेको पाटन क्रिकेट क्लबलाई १० वटै वडाबाट प्रतिनिधित्व हुनेगरी सदस्यता वितरण गरिन लागिएको छ । पाटन नगरपालिका र मातहतका १० वटै वडाबाट पनि खेलकुद क्षेत्रको लागि आवश्यक सहयोगको अपिल गरिएको छ ।
