बैतडी ।
ग्लोवल एन्टि रेसिज्म अवार्ड २०२३बाट सम्मानीत बैतडीकी मानव अधिकारीकर्मी सरस्वती नेपालीलाई बुधबार गृह जिल्ला बैतडीमा भव्य सम्मान तथा अभिनन्दन गरिएको छ ।
जिल्ला स्थीत राजनितिकदल, सरकारी तथा गैरसरकारी कार्यालयका प्रमुखहरु र अधिकारकर्मीहरुले उनलाई सम्मान गरेका हुन् ।
दलित समाज विकास मञ्चले आयोजना गरेको सम्मान कार्यक्रममा बोल्दै नेकपा एमालेका केन्द्रीय कमिटी सदस्य लिलाधर भट्टले बैतडीकी चेलीले विश्व समुदायमा नेपालको नाम चिनाएको बताए । विश्वका ६ च्याम्पीयन अभियन्ताहरु मध्येमा बैतडीकी अभियन्ताको नाम पर्नु गौरवको बिषय भएको बताए ।
उनले भने,“सरस्वती जी को सामाजिक अभियानको भुमिकालाई अमेरिकाले चिन्न सक्नु र नेपाल सरकारले चिन्न नसक्नु दुःखद कुरा हो । उहाँले अवार्ड प्राप्त गरि नेपाल पुग्ने बित्तिकै संघीय सरकारको मन्त्रीमण्डलबाट निर्णय गरि सम्मान गर्नुपर्दथ्यो, त्यो गरेन्, तर अमेरिकाले उहाँको भुमिकालाई चिन्यो, उहाँले सामाजिक अभियानमा लाग्दैगर्दा कयौँ ठाउँमा कुटपीट सहनुभयो, अहोरात्र अभियनमा खटिनुभयो, कामको सहि मुल्यांकन यसरी नै हुन्छ । उहाँले यो अवार्ड पाएपछि अझ आगामी दिनमा आफ्नो अभियान शसक्त रुपमा अगाडी बढाउनुपर्छ ।”
प्रमुख जिल्ला अधिकारी सुरेश पन्थीले अमेरिकी सरकारबाट प्राप्त अवार्डलाई ठुलो उपलब्धीका रुपमा लिई काम गर्नुपर्ने सुझाव दिए ।
उनले भने,“सरस्वती नेपालीले यसरी पुरुष्कार पाउदैँ गर्दा र अमेरिकाले ठुलो फोरममा नेपालको झण्डा फहराउदाँ हामीले आफैले पुरुस्कार पाएको महशुस गरिरहेका थियौँ, उहाँले अवार्डका लागि छनोट हुनुपुर्व हामिबाट पनि गोप्य रुपमा केहि सुचना लिइएको थियो । उहाँको अभियानमा हामि कर्मचारीहरुको सधैँ साथ सहयोग रहदैँ आएको छ र रहनेछ ।”
अवार्ड विजेता नेपालीले सामजिक क्षेत्रमा काम गर्ने व्यक्तिलाई पुरुष्कृत गर्न अक्षयकोष स्थापना गर्ने घोषणा गरेकी छन् । उनले सन् २०१८मा अन्तराष्ट्रिय दर्नाल अवार्ड प्राप्त गर्दा अक्षयकोष स्थापना गरेकोमा रकम थप गरेर अक्षयकोष स्थापना गर्ने घोषणा गरिन् ।
नेपालीले अमेरिकी डिपार्टमेण्ट अफ स्टेट बाट ९ अगस्त २०२३मा ग्लोवल एन्टि रेसिज्म अवार्ड प्राप्त गरेकी थिईन् । उनि अमेरिकामा अवार्ड थापेर मंगलबार मात्रै गृह जिल्ला पुगेकी हुन् ।
नेपालीलाई जिल्ला प्रशासनको सम्मान
ग्लोवल एन्टि रेसिज्म अवार्ड विजेता सरस्वती नेपालीलाई जिल्ला प्रशासन कार्यालय, जिल्ला सुरक्षा समिति र कर्मचारी मिलन केन्द्रले सम्मान गरेको छ ।
जिल्ला प्रशासन कार्यालय बैतडीमा आयोजना गरिएको कार्यक्रममा प्रमुख जिल्ला अधिकारी सुरेश पन्थीले आगामी यात्रा अझ शसक्त हुनुपर्ने बताए । पुरुष्कारले काम गर्ने हौसला प्रदान गर्नुका साथै थप जिम्मेवार बनाएकाले समाजिक विकृतिका विषयवस्तु अझ शसक्त रुपले उठान गर्नुपर्ने सुझाव दिए ।
कर्मचारी मिलन केन्द्रका अध्यक्ष नरेन्द्र अवस्थीले सरस्वती नेपालीले विश्वकै अभियन्ताका रुपमा चिनिनु गौरवको विषय भएको बताए । उनले कर्मचारीहरु पनि नागरिक नै भएकाले सरस्वतीको गर्ने हरेक समाजिक काममा सहयोग गर्ने बताए ।
