बैतडी।
घरेलु हिंसा र सामाजिक कु–संस्कारका रुपमा स्थापीत हानिकारक प्रचलनहरुको अन्त्य गर्न बैतडीमा “जोडी सम्वाद” नामक कार्यक्रम सञ्चालन गरिएको छ ।
जोडी सम्वादमा हिंसा जोखीम रहेको समुदायमा रहेका पती–पत्नीका जोडीहरुलाई बोलाएर प्रशिक्षण गर्ने गरिएको छ । जनचेतनाको अभाव र प्रचलीत कानुनहरुको ज्ञान नभएका व्यक्तिहरुलाई जोडी सम्वाद मार्फत सचेत गराइएको पीसवीन नामक सस्ंथाका जिल्ला कार्यक्रम संयोजक माधव भट्टले बताए ।
उनले भने, “हामीले गत बर्ष र यस बर्ष गरी ३सय ६६जोडीहरुलाई प्रशिक्षण गरेका छौँ, यस कार्यक्रमबाट जनचेतना अभिवृद्धि भएको पाएका छौँ ।”
जोडी सम्वादमा पती–पत्नी बिच एक्लै र जोडीमा सम्वाद गराइन्छ । यसैगरी एकदिन पारिवारीक सम्वाद भन्दै ४जना परिवारका सदस्यलाई समेत बोलाएर सम्वाद गराइन्छ ।
पतिपत्नी बिचको सम्वन्धमा सन्तुलन कायम गर्ने, महिला र पुरुषको असमान शक्तिमा समानता ल्याउने, सम्मानीत जीवनयापन गर्न सघाउने, परिवारलाई खुसी बनाउने, प्रजनन स्वास्थ्यबारे सचेत गराउनुका साथै बालबिवाह, बहुबिवाह, महिला हिंसा, घरेलु हिंसा, लगायतका हानिकारण प्रचलनहरु हटाउने उद्देश्यले उक्त कार्यक्रम सञ्चालन गरिएको हो ।
जोडी सम्वादबाट आफ्नो समाज र कानुनलाई बुझ्ने मौका पाएको प्रशिक्षार्थीहरुको भनाई छ । दशरथचन्द नगरपालिका–४ जर्गका चन्द्र लोहारले भने,“हामी यसअघि महिलाले मात्रै सबैकामहरु गर्नुपर्छ भन्ने समाजबाट हुर्केका मान्छे हौँ, समाज र कानुनका बिषयमा अहिले थाहा भयो । जोडी सम्वादमा सहभागी भएपछि हिंसा के हो ? भनेर चिन्न सक्यौँ र हिंसा गर्नपनि छाडेका छौँ ।”
जोडी सम्वादले पती–पत्नी र परिवारको व्यवहारमा सन्तुलन कायम गरेको प्रशिक्षार्थी पवित्रा लोहियाले बताइन् । “परिवारमा देखिने स–साना समस्याहरु एक अर्काले सुनिदिए मात्रैपनि समस्याको समाधान हुनुका साथै सन्तुष्टी मिल्ने रैछ । जोडी सम्वादले हामीलाई अशल व्यवहार गर्न सिकाएको छ । परिवारमा आउने समस्याका कारणहरु चिन्न सक्दा सम्मानीत जीवनयापनको तरिका समेत थाहापायौँ ।”
जोडी सम्वादमा एक जोडीलाई १० दिनसम्म प्रशिक्षण गरी एकदिन पारिवारीका अन्य व्यक्तिहरु संग समेत सम्वाद गराइन्छ । जोडी सम्वादका लागि २९बर्ष मुनिका बिवाहित महिला र तिनका पतीहरुलाई छनोट गर्ने गरिएको छ । उनिहरुलाई स्वयंसेवक र विज्ञ व्यक्तिहरुबाट प्रशिक्षण दिइन्छ ।
एसडिसि र नर्वेजियन दुतावासको सहयोगमा गरिएको जोडी सम्वाद कार्यक्रम युएनएफपिए, भिएसओ र पिसवीनको साझेदारीमा बैतडीको दशरथचन्द नगरपालिका र पाटन नगरपालिकामा सञ्चालन गरिएको हो । दशरथचन्दका एक देखी ५ वडा सम्म र पाटन नगरपालिकाका वडा न.१,६,८,९,१०मा सञ्चालन गरिएको छ ।
जोडी सम्वाद कार्यक्रमलाई निरन्तरता दिन सकेमा घरेलु हिंसाका साथै हानिकारक प्रचलनहरु हटाउन सकिने युएनएफपीएका कार्यक्रम संयोजक खगेन्द्र भट्टले बताए ।
