बैतडीका चार पालिकाका ‘हाकिम’एक महिना नपुग्दै सरुवा

प्रदेश समाचार

Home
प्रदेश समाचार
बैतडीका चार पालिकाका ‘हाकिम’एक महिना नपुग्दै सरुवा

बैतडीका चार पालिकाका ‘हाकिम’एक महिना नपुग्दै सरुवा

बैतडी,
बैतडीका स्थानीय तहमा हालै खटाईएका नयाँ हाकिमहरु धमाधम सरुवा भएका छन् । संघीय मामिला तथा सामान्य प्रशासन मन्त्रालयले भदौ ५ गते यहाँका पाँच स्थानीय तहमा एकै पटक नयाँ कार्यकारी खटाएको थियो । तर स्थानीय तहमा हाजिर हुन नपाउदै धमाधम सरुवा भइरहेका छन् ।
सिगास गाउँपालिकामा प्रमुख प्रशासकीय अधिकृतको रुपमा असोज १ गते हाजिर भएका कृष्ण प्रशाद घिमिरे सरुवा भएका छन् । उनलाई मन्त्रालयले नुवाकाटको लिखु गाउँपालिका सरुवा गरिदिएको छ ।
यसैगरी जिल्लाको शिवनाथ गाउँपालिकामा पनि हालै हाजिर भएका सुशिल कुमार साह सरुवा भएका छन् । उनलाई कहाँ खटाइएको छ भन्ने खुलाइएको छैन । शिवनाथ गाउँपालिकाका अध्यक्ष कर्ण साउँदले सरुवा भएको अनौपाचारिक जानकारी आएको बताए । यस विषयमा प्रमुख प्रशासकीय अधिकृत साहले अनविज्ञता प्रकट गरे ।
पञ्चेश्वर गाउँपालिकामा आउने भनिएका नयाँ प्रमुख प्रशासकीय अधिकृत उज्जल आनन्द गाउँपालिकामा हाजिर हुन नपाउदै सरुवा भएका छन् ।
गाउँपालिकामा हाजिर हुन आउने तयारीमा रहेका प्रमुख प्रशासकीय अधिकृत आनन्द यहाँ पुग्न नपाउदै सरुवा हुनु भएको निमित्त प्रमुख प्रशासकीय अधिकृत कृष्ण बहादुर बोहराले जानकारी दिए । ‘उहाँ आउने भन्ने थियो, यहाँ हाजिर हुन नपाउदै सरुवा भइसके,’ उनले भने ।
डिलासैनी गाउँपालिकाका प्रमुख प्रशासकीय अधिकृत रन्जय पटेल पनि हाजिर भएको ८ दिनमै सरुवा भएका छन् । उनि यही असोज ८ गते पालिकामा हाजिर भएका थिए । उनि पनि मंगलबार सरुवा भएर गएका छन् ।
मन्त्रालयले भदौ ५ गते जिल्लाको सिगास गाउँपालिकामा कृष्ण प्रशाद घिमिरे, शिवनाथ गाउँपालिकामा सुशिल कुमार साह, पञ्चेश्वर गाउँपालिकामा उज्जल आनन्द, डिलासैनी गाउँपालिकामा रंजय पटेललाई कार्यकारीको रुपमा खटाएको थियो । दोगडाकेदार गाउँपालिकामा गजेन्द्र प्रकाश थारुलाई नयाँ हाकिमको रुपमा खटाएको हो । दोगडाकेदार गाउँपालिकामा रहेका थारु बाहेक नयाँ हाकिमको रुपमा आएका सबैको सरुवा भएको छ ।
यसरी हाजिर हुन नपाउदै सरुवा भएपछि कार्यसम्पादनमा समस्या सिर्जना भएको स्थानीय तहका जनप्रतिनिधिहरुले बताएका छन् ।

प्रकाशित मिति: बिहीबार, असोज १८, २०८० ०८:२९

प्रतिक्रिया दिनुहोस्