बैतडीको प्रसिद्ध उदयदेव मन्दिरमा पशुबलि सहित आज भव्य जात्रा लाग्दै , २५ जना स्वयंसेवक खटाइयो

प्रदेश समाचार

Home
प्रदेश समाचार
बैतडीको प्रसिद्ध उदयदेव मन्दिरमा पशुबलि सहित आज भव्य जात्रा लाग्दै , २५ जना स्वयंसेवक खटाइयो

बैतडीको प्रसिद्ध उदयदेव मन्दिरमा पशुबलि सहित आज भव्य जात्रा लाग्दै , २५ जना स्वयंसेवक खटाइयो

Baitadi-Udayadev-Temple11697977684.jpg

बैतडीको पाटनस्थित प्रसिद्ध उदयदेव मन्दिरमा आज भव्य जात्रा लाग्दै छ । जिल्लाको पाटन नगरपालिका वडा नं ६ स्थित उदयदेव मन्दिरमा हिजो जात्रा शुरु भएकोमा आज पशुबलि सहित भव्य जात्रा लाग्दै छ । महाअष्टमी देखि सुरु भएको जात्रा आज पशुबलि सहित सम्पन हुने पाटन नगरपालिका वडा नं ६ का वडा अध्यक्ष राजेन्द्र सिंह विष्टले जानकारी दिए ।

मन्दिरहरुमा आज महानवमीका दिन बोका तथा रांगाको बलि दिने चलन रही आएको उनले बताए । महाष्टमीका दिन मन्दिरमा रांगा लग्ने र महानवमीका दिन रांगा काट्ने चलन रही आएको वडा अध्यक्ष विष्टले बताए । यसैबीच मन्दिरमा लाग्ने मेलालाई मध्यनजर गरेर मेलास्थललाई मदिरा निषेधित क्षेत्र घोषणा गरिएको छ ।

दुई दिन मदिराको विक्रि वितरणमा रोक लगाइएको बताइएको छ । उदयदेव मन्दिरमा महाष्टमी र महानवमीका दिन बिशेष जात्रा लाग्ने गर्दछ । महानवमीका दिन राँगाको बलिसहित मन्दिरमा जात्रा हुने गरेको बताइएको छ । स्थानीय भाषामा मैतडको जात भनिने उदयदेव मन्दिरको दर्शनका लागि टाढाका भक्तजनहरु समेत मन्दिरमा आउने गरेको पण्डित लवदेव जोशीले बताए ।

पाटनस्थित मैतड जातमा देउडा खेल समेत हुने गरेको छ । महाअष्टमीको राति र महानवमीका दिन देउडा खेल खेलेर भक्तजनहरु रमाइलो गर्ने गर्दछन् । मेलालाई भव्य रुपमा सम्पन्न गर्न स्वंयम सेवक सहित सुरक्षा कर्मींहरु परिचाल गरिएका छन् ।

मेलालाई भव्य रुपमा सम्पन्न गर्न उदयदेव मन्दिरमा २५ जना स्वयंसेवक खटाइएको छ । कृष्ण माविमा रहेका एनसिसि तालिमका सहभागी १५ जना र मेला व्यवस्थापन समितिको तर्फबाट १० जना गरि २५ जना स्वयंसेवक खटाइएको हो । सिद्धनाथ उदयदेव धार्मिक पर्यटन क्षेत्र विकास समितिका कार्यबाहक अध्यक्ष चमन कुमार भण्डारीका अनुसार मेलामा खटाइएका स्वयंसेवकले मेलालाई भव्य र सभ्यरूपमा सम्पन्न गर्न भुमिका खेल्नेछन् ।

जिल्लाका विभिन्न शक्तिपीठहरुमा लाग्ने मेलालाई शान्तपूर्ण रुपमा सम्पन्न गर्न जिल्ला प्रहरी कार्यालयले सुरक्षा योजना बनाएर काम गरिरहेको जिल्ला प्रहरी कार्यालयका प्रवक्ता एवं प्रहरी निरीक्षक योगेश खत्रीले जानकारी दिए ।

प्रकाशित मिति: सोमबार, कात्तिक ६, २०८० ०७:४८

प्रतिक्रिया दिनुहोस्