बैतडी ।
बैतडीको दशरथचन्द नगरपालिकाका नगर प्रमुख पुष्करराज जोशी ‘लख्खाभाई’ले बालविवाह न्युनिकरणको मुख्य बाधक पुरातन संस्कारका साथै समाजिक सञ्जाल समेत भएको बताएकाछन् ।
सोमबार पीसवीन नेपालको सहजीकरणमा भएको बालबिवाह अन्त्यको लागि बनेको बजेट सहितको रणनितिक योजना बिषयक छलफलमा नगर प्रमुख जोशीले पुरातन सोच, हानिकारक प्रथा तथा पराम्परागत मुल्यमान्यता र धर्म संस्कृतीका कारण हुने बालबिवाह केहि हदसम्म न्युनिकरण भएपनि सामाजिक सञ्जालको प्रयोगका कारण हुने भागी बालबिवाह न्युनिकरणमा झन् चुनौती भएको बताए ।
उनले भने,‘अहिलेका बालबालिकाहरुको खानपानका आधारमा छिटै शारीरिक विकास हुनेगर्छ, उनिहरुसंग समाजिक सञ्जालको अत्यन्त सहज पहुँच छ, त्यसकारण कच्चा उमेरमै केटाकेटी विपरीत लिंग प्रति आक्रसित हुने गर्दछन् र यावत रुपमा भागी बालबिवाह बढेको देखिन्छ । यसका साथै धेरथोर मात्रामा पुरातनवादी सोचका कारण पनि बालविवाह हुन्छ, यसको न्युनिकरणका लागि रणनैतिक योजना बनाएका छौँ, यसले कस्तो भुमिका निर्वाह गर्छ हेरौँ, बालबिवाहको अन्त्य गर्ने हाम्रो लक्ष्य छ ।’
बालबिवाह अन्त्यका लागी दशरथचन्द नगरपालिकामा बनाइएको बजेट सहितको रणनैतिक योजनाका बिषयमा छलफल गरिएको थियो । उक्त छलफलमा विवाह गर्नुअघी स्थानिय सरकारबाट सिफारिस लिनुपर्ने नियम लगाउने बिषयमा समेत छलफल भएको छ । उक्त नियम भागी विवाहमा सम्भव नभएपनि मागी विवाहमा लागउनुपर्ने सहभागीहरुको सुझाव थियो । उक्त बिषयमा अन्य पालिकाहरुको अभ्यासको नतिजा हेरेर निति निर्माणका लागि अघि बढ्ने मेयर जोशीको भनाई छ ।
रणनैतिक योजना बारेको छलफल कार्यक्रममा नगर प्रमुख जोशीका साथै उप प्रमुख कौशिला चन्द लगायतका जनप्रतिनिधि, शाखागत कर्मचारीहरुको उपस्थीति रहेको पीसवीन नेपालका कार्यक्रम संयोजक माधव भट्टले बताए । आज ४वटा समूहहरुमा भएको छलफलबाट बालबिवाहको अन्त्य गर्नका लागि नगरपालिकाले आगामी ५बर्षको अनुमानित बजेट सहितको रणनैतिक योजना तय गरिएको उनले बताए ।
