बैतडी ।
नेपाल विद्युत प्राधिकरण शाखा कार्यालय बैतडीले १हप्ता विद्युत लाइन काटेर १०लाख बढी रकम राजश्व संकलन गरेको छ । विद्युत वितरण केन्द्र बैतडीका कार्यालय प्रमुख जर्नादन पौडेलको निर्देशनमा जिल्लाका १सय ८५ ग्राहकको विद्युत लाइन काटिएको हो ।
महशुल नतिरेको ग्राहकको विद्युत लाइन काटिएसंगै रकम तिरेपछि मात्रै पुनः जडान गरिएको छ । मंगलबारसम्म ९लाख ९४ हजार रकम बक्यौता रहेका ग्राहकको विद्युत लाइन काटेपछि उनिहरुबाट ९लाख ८हजार रकम संकलन भएकोमा पुनः अन्य ग्राहकको लाइन काटेपछि जम्मा १०लाख बढी रकम संकलन भएको छ । रकम बुझाउने ग्राहकको लाइन पुनः जडान गरिएको छ ।
विद्युत लाइन काट्ने क्रम अझैपनि जारी रहेको छ । विद्युत लाइन काटिने ग्राहकहरुमा केहि सरकारी कार्यालय, पार्टी कार्यालय तथा सञ्चारगृह समेत रहेका छन् ।
२ महिना सम्मको महशुल नतिर्ने ग्राहकको लाइन काट्ने नियम रहेकाले बेलैमा आफ्नो बक्यौता महशुल बुझाउन वितरण केन्द्र प्रमुख पौडेलको आग्रह छ । उनले भने भने,‘अहिलेसम्म निकै कम रकम तिर्न बाँकी ग्राहकको लाइन काटेका छैनौँ, तर लामो समयसम्म नतिर्ने र धेरै रकम बक्यौता रहेकाहरुको लाइन काटिरहेका छौँ । तिन महिनासम्म रकम नतिरेपछि भने हाम्रो सिस्टममा उनिहरुको लाइन काटिन्छ तर बत्ति जोडिएकै हुन्छ तरपनि लापरवाहि गरेमा घरमै गएर लाइन काट्ने र महशुल बुझाएपछि मात्रै जोडिदिने गरेका छौँ ।’
बैतडीमा हालसम्म २ करोडबढी रकम विद्युत महशुल वक्यौता रहेको विद्युत प्राधिकरण वितरण केन्द्र बैतडीले जनाएको छ । केन्द्रको निर्देशन अनुसार आफुहरुले जिल्ला स्थीत महशुल नबुझाउने ग्राहकको नियमानुसार लाइन काटेर महशुल संकलन गर्दै गएको प्राधिकरणले जनाएको छ ।
१ सातापछी समेत बक्यौता रकम नतिर्ने ग्राहकको लाइन काट्ने काम जारी रहेको वितरण केन्द्र प्रमुख पौडेलको भनाई छ । कतिपय ग्राहकको बक्यौता रकम १लाख भन्दा बढी भएको खण्डमा किस्तामा समेत तिर्ने व्यवस्था मिलाइएको छ ।
