बझाङको बित्थडचीर गाउँपालिका–१ का मोहन बहादुर बोहराको सिम यही माघ २३ गते एक्कासी बन्द भयो । ९८६५६७**** नम्बरको यो सिम उनकै नाममा थियो । केही सामान्य कारणल होला भनेर सोचेका बोहराको दिउँसो बैंक खाता पनि रित्तयो, अनि बोहरा झस्किए ।
सोही मोवाइल नम्बरबाट नविल बैंकको मोवाइल एप चलाएका बोहराको नाम र प्रमाणपत्र दुरुपायोग गरी अज्ञात व्यक्तिले नेपाल टेलिकमको कार्यालय डडेल्धुराबाट सिम निकालेको र सोही सिमबाट नबिल बैंकको खाता सञ्चालन गरी खातामा रहेको ७२ हजार एक सय रुपैया इ–सेवा वालेटमा ट्रान्सफर भएको देखिएको छ ।
अहिले बोहरा समस्यामा छन् । भएभरको रकम सिमको दुरुपायोग गरी अज्ञात व्याक्तिले रकम लुटेपछि उनी समस्यामा परेका हुन् । बोहराको अनलाइनमा प्रविष्ट रहेको मतदाता नामावली परिचयपत्र डाउनलोड गरी टेलिकम डडेल्धुराको कार्यालयमा गएका ती अपरिचित ब्याक्तिले सिम निकालेको भेटिएको हो ।
प्रयोगमा रहेकै सिम हराएको भएपनि सोही नम्बरको नयाँ सिम निकाल्ने क्रममा सक्कलै नागरिकता र स्वयम व्याक्ति उपस्थित भएर सिमकार्ड लिन सकिने प्रावधान भएपनि टेलिकमको कार्यालय डडेल्धुराले अनलाईनमा प्रविष्ट मतदाता नामावलीको विवरणका आधारमा सिम उपलब्ध गराएको छ ।
टेलिकम कार्यालय डडेल्धुराका सूचना अधिकारी सिरिश श्रेष्ठले कार्यालयबाट कमजोरी भएको स्वीकार गरेका छन् । ‘ ती व्याक्तिले फोटोकपी मात्रै उपलब्ध गराए, त्यसै आधारमा हामिले सिम दिनु थिएन, त्रुटी भयो,’ श्रेष्ठले भने ।
टेलिकम कार्यालयमा ती अपरिचित व्यक्तिले माक्स प्रयोग गरी मतदाता परिचयपत्रको विवरण पेस गरी सिम निकालेको सिसिटिभी क्यामेरको पर्दामा भेटिएको हो ।
यता पिडित मोहन बहादुर बोहराले टेलिकम कार्यालय र जिल्ला प्रहरी कार्यालय डडेल्धुरामा धाइरहेका छन् । टेलिकम कार्यालयसँग आफ्नो सिम एक्टीभ हुदाहुदै अनलाईबाट लिइएको मतदाता परिचयपत्र नक्कली विवरण कै आधारमा सिमकार्ड दिएको गुनासो गरेका छन् ।
मोवाइल नम्बर एक्टीभ रहेको अवस्था र बिना परिक्षण मेरै नामको सिम दिइएको भन्दै टेलिमको पनि कमजोरी रहेको बोहराको गुनासो छ ।
७२ हजारको रुपैयाका रिचार्ज किनिएको खुलासा
प्रमाणपत्र दुरुपायोग गरी सिम निकालेका अपरिचित व्याक्तिले डडेल्धुरास्थित मित्र मोवाइल ग्यालरीबाट रिचार्ज कार्ड खरिद गरेको खुलेको पिडित बोहराले बताए । मित्र मोवाइल ग्यालरीबाट रिचार्ज किनिएछ, पसलका सञ्चालकसँग बुझ्दा उनले मास्क लगाएर आएका ती ब्याक्तिले रिचार्ज कार्ड मागेको र त्यसको पैसा इ–सेवामा ट्रान्सफर गरेको जनाएको पिडित बोहराले बताए ।
नेपाल टेलिकमको कार्यालय डडेल्धुराले नियम विरितका प्रमाणपत्र पेश गरेकै आधारमा सिम उपलब्ध गराएपछि ७२ हजार रुपैया लुटिएको पिपिडत बोहराको गुनासो छ ।
