पाटनमा गुणस्तरीय शिक्षाका लागि विज्ञ सरोकारवालाहरुसँग अन्तरक्रिया

प्रदेश समाचार

Home
प्रदेश समाचार
पाटनमा गुणस्तरीय शिक्षाका लागि विज्ञ सरोकारवालाहरुसँग अन्तरक्रिया

पाटनमा गुणस्तरीय शिक्षाका लागि विज्ञ सरोकारवालाहरुसँग अन्तरक्रिया

बैतडी
बैतडीको पाटनमा गुणस्तरीय शिक्षा तथा शैक्षिक नीति सम्बन्धी विज्ञ सरोकारवालाहरुसँगको शैक्षिक बहस तथा अन्तरक्रिया कार्यक्रम सम्पन्न भएको छ । पाटन नगरपालिकाको आयोजनामा शिक्षाका लागि राष्ट्रिय अभियान नेपाल(एनसिइ नेपाल)को सहकार्य र भुमेश्वर सामुदायिक विकास संघको समन्वयमा बहस तथा अन्तरक्रिया कार्यक्रम गरिएको हो ।
नगरपालिकाका सामुदायिक विद्यालयका प्रअ, विव्यस अध्यक्ष जनप्रतिनिधि र सरोकारवाला निकायको सहभागिता थियो ।
शिक्षा विज्ञ एवं प्रा.डा.विद्यानाथ कोइरालाले सार्वजनिक शिक्षा सुधारका लागि अपनाउन सकिने उपायका बारेमा जानकारी गराएका थिए । शैक्षिक गुणस्तर सुधारको लागि शिक्षक, अविभावक र स्थानीय तहबाट गर्न सकिने कार्यका बारेमा क्रमागतरुपमा अवगत गराएका हुन् ।

सार्वजनिक शिक्षाको सुधारको लागि ‘शिक्षाका लागि राष्ट्रिय अभियान नेपाल’ले विभिन्न कार्यक्रम संचालन गर्दै आएको कार्यकारी निर्देशक राम गैरेले बताए ।
यस अभियानले राज्यसङ्ग समन्वय गर्दै शैक्षिक गुणस्तर सुधारको समन्वय गर्ने गरेको राष्ट्रिय अभियान नेपालका सचिव टेकराज अवस्थीले बताए ।

पाटन नगरपालिकाका सामाजिक विकास समिती सयोजक एवं वडा न ८ का वडा अध्यक्ष हरिश बिष्टले नगरपालिकामा रहेका सामुदायिक विधालयको समस्या समाधानको लागि नगरपालिकाको तर्फबाट हरसम्भव प्रयासहरु भइरहेको बताए । विद्यालय समायोजन तथा शिक्षक दरबन्दी मिलान देखि कक्षा मुल्यांकनलाई थप प्रभावकारी बनाउन काम भइरहेको अवगत गराए । वडास्तरीय र नगरस्तरीय परीक्षा संचालन गरिएको उहाको भनाइ थियो । शिक्षामा गुणस्तर सुधारको लागि नगरपालिकाले एकतर्फी सहयोगले मात्रै नहुने भएकाले सबैतिरबाट सहयोगको समेत अपेक्षा राखे ।

यसैगरी विद्यालय व्यवस्थापन समिति महासङका केन्द्रीय उपाध्यक्ष एवं जिल्ला समन्वय समितीका सदस्य प्रेम सिंह भाटले विद्यालयको व्यवस्थापकीय पक्ष सुधार गर्नुपर्नेमा जोड दिए । कक्षा कोठाको सुधारसँगै अभिभावक शिक्षाको विकास गर्नुपर्ने भनाइ राखे ।
यसैगरी पाटन नगरपालिकाका उपप्रमुख कमल सिंह बोहराले शिक्षामा सुधार ल्याउनको लागि सिकाइ आदानप्रदान गर्नुपर्नेमा जोड दिए । सस्थागत विधालयबाट समेत शैक्षिक गतिविधिमा अनुभव साटासाट गर्न सकिने धारणा राखे । अभिभावकहरुले पनि आफ्ना बालबालिकाको शिक्षाको अवस्था बुझ्नको लागि सक्रिय हुनुपर्नेमा जोड दिए । आगामी वर्षमा शैक्षिक सुधारको लागि थप प्रभावकारी कार्यक्रम ल्याउने समेत प्रतिबद्धता व्यक्त गरे ।

नगरप्रमुख गौरी सिंह रावलले प्रविधिमैत्री शिक्षाको लागि नगरपालिकाले पहल गरिरहेको अवगत गराए । नगरपालिकाले नगरपालिकाको आफ्नै बजेटबाट आगामी आर्थिक वर्षमा विषेश कार्यक्रम ल्याउने रावलको भनाइ छ । कार्यक्रममा सहभागी पाटन–१०स्थित सरस्वती मावीका विव्यस अध्यक्ष धर्मराज भट्टले शिक्षालाई प्रविधिसँग जोड्नुपर्ने र नगरपालिकाले पनि पन्चवर्षीय योजना बनाएर अघि बढ्नुपर्नेमा जोड दिए ।

प्रकाशित मिति: शनिबार, चैत १७, २०८० १८:१४

प्रतिक्रिया दिनुहोस्