बैतडीको खोड्पेमा सार्वजनिक शिक्षाका विभिन्न मुद्धाहरुमा नागरिक समाजले भेला तथा प्रदर्शन गरेका छन् । सोमबारबाट सुरु भएको शिक्षाका लागि विश्वव्यापी कार्यसप्ताह २०२४ को अवसरमा नागरीक समाजले खोड्पेमा ¥याली समेत निकालेको हो ।
शिक्षाका लागि राष्ट्रिय अभियानको सहयोगमा भुमेश्वर सामुदायिक बिकास संघ (बिसिडिओ) को आयोजना तथा फोर्स नेपाल र सामुदायिक विद्यालय व्यवस्थापन समिति महासंघ नेपालसंगको सहकार्यमा कार्यक्रम गरेको बिसिडिओका अध्यक्ष मानबहादुर ऐरले जानकारी दिए । तीनै तहका सरकारसंग निःशुल्क, गुणस्तरिय तथा सर्वसुलभ, व्यवहारिक, सहभागितामुलक शिक्षा र प्रविधिमैत्रि शिक्षाको व्यवस्था हुनुपर्ने माग गर्दै कार्यक्रम गरिएको ऐरले बताए ।
‘सामुदायिक बिद्यालयको शैक्षिक गुणस्तर खस्किदो अवस्थामा छ’ उनले भने ‘ती विद्यालयहरुमा पढ्ने हाम्रा बालबालिकाहरुको पनि समयानुसारको शिक्षामा पुहँच हुनुपर्छ भनेर स्थानीय तथा प्रदेश संघिय सरकारलाई दबाब दिन कार्यक्रम गरिएको हो ।’
कार्यक्रममा बोल्ने वक्ताहरुले शिक्षा क्षेत्रमा हुने राजनिति बन्द गर्नुपर्नेमा पनि जोड दिएका थिए । सामुदायिक विद्यालय ब्यवस्थापन समिति महासंघ नेपालका केन्द्रीय उपाध्यक्ष प्रेम सिंह भाटले सरकारले सामुदायिक बिद्यालयहरुको गुणस्तर सुधार दक्ष जनशक्ति र पुर्वाधारको व्यवस्थापन गर्न सके मात्रै हुने बताए ।
निशुल्क र गुणस्तरीय शिक्षाको कार्यान्वयन,जीवन उपयोगि शिक्षामा लगानी वृद्धि गर्नुपर्नेमा तीनै तहका सरकारलाई दबाब दिन जरुरी रहेको सरस्वती मावि सल्लेवासाका विद्यालय व्यवस्थापन समितिका अध्यक्ष धर्मराज भट्टले बताए ।
अप्रिल २२ देखी २६ तारिख सम्म यो अभियान सञ्चालन हुने गरेको छ । यस वर्ष रुपान्तरणकारी शिक्षा भन्ने नारा कायम गरिएको हो छ । यो कार्यक्रम नेपालसहित विश्वका १५० भन्दा बढी राष्ट्रका नागरीक समाजहरुले मनाउने गरेका छन् ।
बैशाख ११ गते देखी १३ गते सम्म् विभिन्न विद्यालयहरुबाट रुपान्तरणकारी शिक्षाका लागि विद्यार्थीहरुबाट पत्र संकलन गरिने र १४ गते प्रमुखजिल्ला अधिकारी मार्फत ति पत्रहरुलाई प्रधानमन्त्रीलाई बुझाइने कार्यक्रम रहेको बिसिडिओका अध्यक्ष मान बहादुर ऐरले जानकारी दिए ।
खोड्पे तल्लो बजारबाट सुरु भएको दबाबमुलक ¥याली चौराहमा कोण सभामा परिणत भएको थियो । नागरीक समाजका अगुवा,जनप्रतिनिधी, शिक्षक, विद्यार्थी तथा सरोकारवालहरुको कार्यक्रममा उपस्थीति रहेको थियो ।
