बैतडी: बैतडीको सुर्नया गाउँपालिका–२ स्थित नेपाल राष्ट्रिय मावि सिउडेका प्रद्यानाध्यापक राजेन्द्र बिष्टले विद्यार्थीहरुलाई भर्ना नगरी फर्काइदिएका छन् । सुर्नया–२ का नरेन्द्र बिष्टका छोरा सुमन बिष्ट र छोरी सिर्जना बिष्टलाई भर्ना नगरी फर्काइदिएका हुन् ।
यसअघि पनि नेपाल राष्ट्रिय मावि मै अध्यान गर्दै आएका सुमन र सिर्जनालाई शैक्षिक सत्र २०८० मा पत्ताल भुवनेश्वर आधारभूत विद्यालयमा भर्ना गरिएको थियो । पाठ्यपुस्तक समेत मिलेको अवस्थामा पत्ताल भुवनेश्वर आविमा भर्ना गरेको भन्दै नेपाल राष्ट्रिय माविले पुस्तक फिर्ता गर्न पत्र काटेको थियो ।
तर नरेन्द्रले पाठ्यपुस्तक फिर्ता नगर्ने बताएका थिए । राज्यबाट आफ्नै छोराछोरीले पाएको भन्दै ती पाठ्यपुस्तक प्रयोग गरी पत्तालभुवनेश्वर आविमा अध्यान गराउदै आएका थिए ।
यस वर्ष भने पत्ताल भुवनेश्वर आवि समायोजनमा परेपछि ती बालबालिकाहरुलाई पनि अर्काे विद्यालयमा भर्ना गर्नुपर्ने अवस्था आएको हो । पालिकाले समेत नेरा माविमा भर्ना गर्न भनेको भएपनि यस विद्यालयले विद्यार्थीहरुको भर्ना रोकेको अभिभावक नरेन्द्र बिष्टले बताए ।
पत्ताल भुवनेश्वर आविमा भर्ना गरेपछि पुरानो पाठ्यपुस्तक नदिएको र उल्टै विद्यालयको आग्रहको समेत अवज्ञा गरेको भन्दै प्रद्यानाध्यापक राजेन्द्र बिष्टले भर्ना नगरी विद्यार्थीहरुलाई फर्काइदिएका हुन् ।
विद्यालय र अभिभावकबीचको आपसी द्धन्द्धका कारण दुई जना बालबालिकाको शैक्षिक मनोविज्ञानमा असर परेको छ ।
अभिभावक(नरेन्द्र)ले हिजोका दिनमा गल्तीहरु नदोहोर्याउने बाचा गरेको अवस्थामा विद्याथीप्ृहरुलाई भर्ना गर्न सकिने प्रद्यानाध्यापक राजेन्द्र बिष्टले अडान लिएका छन् ।
‘हामिले त्यतीबेला विद्यार्थीहरु कता गए, पाठ्यपुस्तक फिर्ता गर्नुस भनेर ३ पटक परिपत्र गरेका थियौँ, तर पत्रको अवज्ञा गरे,’ प्रद्याध्यापक बिष्टले भने, ‘यसवर्ष पनि गत वर्षको शैक्षिक अवस्थाको बारेमा बुझ्न अभिभावकहरुलाई विद्यालयमा आउन भनेको भएपनि उनका अभिभावकहरु नआएपछि भर्ना नगरेको हो,’ प्रअ बिष्टले स्टार बुलेटिनसँग भने । विद्यालयको शैक्षिक कार्यक्रममा वाधा पुर्याएको समेत उनले बताए ।
यस विषयमा अभिभावक नरेन्द्र बिष्टले विगतका वर्षहरुमा बालबालिकाहरु ७ बजे लाग्ने विद्यालयमा ८ नबज्दै घर आउने र विद्यार्थीहरुप्रति शिक्षकहरु जिम्मेवार नदेखेपछि बाध्य भएर अर्काे विद्यालयमा भर्ना गरेको बताए ।
सुर्नया गाउँपालिकाका शिक्षा शाखा प्रमुख टंक प्रशाद अवस्थीले विद्यार्थीहरुको पढ्ने अधिकार हनन गर्न नहुने बताएका छन् । ‘बालबालिकाको पढ्न पाउने अधिकार कसैले खोस्न पाउँदैनन्, विद्यार्थीहरुलाई तुरन्त भर्ना गर्नुपर्दछ, यस विषयमा विव्यस, शिक्षक र अभिभावकले जिम्मेवार ढंगले समाधान गर्नुपर्दछ,’ शिक्षा शाखा प्रमुख अवस्थीले भने । व्याक्तिगत इगोले विद्यार्थीहरुको मनोविज्ञानमा मसर गर्न नहुने उनको जोड छ ।
