बैतडी ।
१८ औँ जातिय भेदभाव तथा छुवाछुत उन्मुलन राष्ट्रिय दिवस सोमबार बैतडीमा भव्य रुपले मनाइएको छ । दिवसको अवसरमा बिहान ९ बजे गोठलापानी बजारबाट प्रभातफेरी निकालिएको थियो ।
जातिय भेदभाव तथा छुवाछुत सहित हानिकारक प्रचलन अन्त्य सम्बन्धीका प्ले कार्ड बोकेका सुरक्षाकर्मीहरुको साथमा प्रमुख जिल्ला अधिकारी भिमकान्त शर्मा, सुरक्षा निकायका प्रमुखहरु तथा जिल्ला स्थीत अधिकारकर्मीहरु सहभागी थिए ।
उक्त प्रभातफेरी गढी स्थीत जिल्ला प्रशासन कार्यालय अगाडी पुगेर समापन भयो भने बिहान ११बजे जिल्ला प्रशासन कार्यालयको हलमा दिवसको मुल समारोह आयोजना गरियो । १सय बढी व्याक्तिहरुको उपस्थीतिमा मनाइएको दिवस मुल समारोहमा दलित समाज विकास मञ्चका सचीव बलभद्र दयाल तथा नेकपा(एमाले) केन्द्रीय कमिटी सदस्य एंव निवर्तमान प्रदेश सांसद लिलाधर भट्ट प्रमुख अतिथी रहेका थिए ।
उक्त कार्यक्रममा जातीय भेदभाव र बालबिवाहका विषयमा कानुनी प्रावधान बारे प्रहरी नायव उपरिक्षक दीपक गिरिले प्रशिक्षण गरेका छन् । यसैगरी लक्षित वर्गको योजना तर्जुमाका बिषयमा दशरथचन्द नगरपालिकाका प्रमुख प्रशासकीय अधिकृत जगदीश प्रसाद जोशीले प्रशिक्षण दिएकाछन् ।
कार्यक्रमका प्रमुख अतिथी भट्टले जातीय भेदभाव तथा छुवाछुत विरुद्ध आवाज उठाउने बिषयमा दलित समुदायको मात्र नभई सबै वर्ग समुदायको भएको बताए ।
उनले २०६३ सालमै जातिय भेदभावको मुक्त राष्ट्र घोषणा भएपनि समुदाय स्तरमा विभेदजन्य क्रियाकलापहरु अझै कायम रहेको बताए । जिल्लामा जातीय विभेद, बालबिवाह, लौगिंक हिंसा लगायतका हानिकारक प्रचलनहरुको अनत्य गर्न जिल्ला स्थीत सरोकारवाला निकायले भुमिका निर्वाह गर्नुपर्नेमा उनको जोड छ ।
प्रमुख जिल्ला अधिकारी भिमकान्त शर्माले जातिय भेदभाव तथा छुवाछुतको कसुर गर्ने जोकोहीलाई कानुन अनुसार कारवाहीको दायरामा ल्याइने बताए । नेकपा(एमाले) बैतडीका अध्यक्ष नरेश कुमार विश्वकर्माले जातीय भेदभाव दलित समुदायको मुद्धा मात्रै नभई सबै वर्ग समुदायको मुद्धा भएकाले यसको अन्त्यका लागि सबैले आ–आफ्नो तर्फबाट भुमिका निर्वाह गर्नुपर्नेमा जोड दिए ।
