बैतडी
बैतडीको पाटन नगरपालिका–८ को नवनिर्मित भवनको उद्घाटन गरिएको छ । एक भव्य कार्यक्रमकाबीच उद्घाटन गरिएको हो ।
वडा अध्यक्ष हरिश बिष्टको सभाध्यक्षतामा आयोजनाा गरिएको भवन उद्घाटन समारोमा सुदूरपश्चिम प्रदेश सरकारका सामाजिक विकास मन्त्री ओम बिक्रम भाट(सरल) प्रमुख अतिथि रहेका थिए ।
कार्यक्रममा विशिष्ट अतिथिकोरुपमा पाटन नगरपालिकाका नगर प्रमुख गौरी सिंह रावल, उपप्रमुख कमल सिंह बोहरा, वडा नं ६ का वडा अध्यक्ष राजेन्द्र सिंह बिष्ट, वडा नं ९ का वडा अध्यक्ष कालु सिंह भाट, वडा नं १० का वडा अध्यक्ष धन बहादुर कुवँर रहेका थिए ।
भवन उद्घाटन समारोहका प्रतिनिधिहरुले प्रदेश सरकार र स्थानीय सरकारबाट हुने कामकारवाहीका विषयमा आ–आफ्नो धारणा राखेका थिए ।
वडा नं ९ का वडा अध्यक्ष कालु सिंह भाटले प्रदेश सरकारबाट योजनाहरु झ्यालबाट आउने घटना बढेको बताउदै यस्तो प्रवृती रोक्नुपर्नेमा जोड दिए । राजनितिक पहुँचका भरमा आउने योजनाहरु रोक्नुपर्ने समेत आग्रह गरे ।
वडा नं १० का वडा अध्यक्ष धन बहादुर कुवँरले स्थानीय सरकारसँग कुनै समन्वय नै नगरी राजनितिक पहुँचको भरमा आएका योजनाले गाउँमा कलह बढेको बताए । स्थानीय सरकारसँग समन्वय गरेर मात्रै योजनाहरु कार्यान्वयनमा लैजानुपर्ने उनको धारणा थियो ।
नगर उपप्रमुख कमल सिंह बोहराले प्रदेश सरकारले महिला, बालबालिका र स्वास्थ्यका क्षेत्रमा कार्यक्रम गर्न थप आवश्यक रहेको औँल्याए ।
नगर प्रमुख गौरी सिंह रावलले पाटन नगरपालिकाले प्रदेश सरकारसँग आवश्यक समन्वय गर्न तयार रहेको बताए । प्रदेश र स्थानीय सरकारको सहयोगमा थप प्रभावकारी कार्यक्रम सञ्चालन गर्न सकिने बताए ।
वडा नं ८ का वडा अध्यक्ष हरिश बिष्टले वडाभित्र देखिएका खानेपानीका समस्या, ट्रमा सेन्टर सञ्चालनको हुन नसकेको लगायतका समस्याहरुको बारेमा जानकारी र समाधानको आवश्यक पहल गरिदिन माग गर्दै मन्त्री भाटसमक्ष ज्ञापनपत्र समेत पेश गरेका थिए । उच्च पहाडी क्षेत्रमा रहेका बस्तीहरु बढीरहेकाले खानेपानीको मुहानको समस्या रहेको जानकारी गराउदै प्रदेश सरकारले लिफ्ट खानपानी योजना कार्यान्वयन गरी सहयोगगर्नुपर्ने ज्ञापनपत्रमा उल्लेख गरिएको थियो ।
सामाजिक विकास मन्त्री भाटले प्रदेश सरकारको सामाजिक विकास मन्त्रालय, शिक्षा स्वास्थ्य, महिला तथा बालबालिकाको क्षेत्रमा आवश्यक काम गरिरहेको अवगत गराएका थिए । सामाजिक विकास मन्त्रालयले प्रदेशका १० हजार किशोरीहरुलाई आत्मरक्षा तालिमको व्यवस्था गर्न लागेको समेत अवगत गराए । हानिकारक प्रचलन अन्त्य गरी महिला, दलित र बालबालिकाको क्षेत्रमा प्रदेशले नितिगत सुधार गरिरहेको पनि बताए ।
बैतडी जिल्ला क्रिकेटको उर्वर भूमी रहेको बताउदै मन्त्री भाटले पाटन नगरपालिकामै एक स्तरीय खेलमैदान निर्माणका लागि प्रदेशले सहयोग गर्ने समेत प्रतिवद्धता जनाए ।
यसैगरी मन्त्री भाटले प्रदेश सरकारले राजनितिक पहुँचको भारमा योजना नल्याएको दावी गरे । पहुँचको भरमा र झ्यालबाट योजनाहरु नआएको बताए ।
कार्यक्रमका सभाध्यक्ष समेत रहेका भएका वडा अध्यक्ष हरिश बिष्टले राज्यले प्रत्याधूत गरेका अधिकारहरु स्थानीय सरकारले गरिरहेको अवगत गराउदै प्रभावकारी सेवाका लागि प्रतिवद्ध रहेको बताए । विकासमा आफुले कहिले राजनिति नगरेको बताउदै सबैपक्षसँग आवश्यक सहकार्य गर्न तयार रहेको अध्यक्ष बिष्टले बताए । वडा भवन निर्माणका क्रममा आवश्यक सहयोगगर्ने सबैमा धन्यवाद समेत ज्ञापन गरे ।
वडा कार्यालय भवन निर्माणको लागि जग्गा दान गर्नुहुने राम सिंह बिष्ट, वडा भवन समयमै निर्माण सम्पन्न गर्नुहुने निर्माण व्यवसायी हिम्मत चन्दलाई दोसल्लासहित प्रमाणपत्र प्रदान गर्दै सम्मान गरिएको थियो ।
वडा कार्यालयको उद्घाटन कार्यक्रममा वडास्तरीय महिला सञ्जाल र विभिन्न समुह तथा संस्थामा आवद्ध महिलाहरुले देउडा गितबाट सरकारलाई शुसासनका लागि सुझाव दिएका थिए ।
कार्यक्रममा हास्य कलाकार शिक्षक बलदेव सिंह केसीको समुहले पनि नाटक प्रस्तुती प्रदर्शनी गरेका थिए । शिक्षा, स्वास्थ्य, बालबिवाह न्युनिकरण, भ्रष्टाचार अन्त्य गर्नुपर्ने लगायतका विषयमा प्रस्तुतीकरण गरिएको थियो ।
विभिन्न राजनितिक दलका प्रमुख एवं प्रतिनिधि, वडास्तरीय टोल विकास संस्थाका प्रमुख एवं प्रतिनिधि, वडास्तरीय महिला सञ्जालका प्रतिनिधि, युवा तथा बालसञ्जालका प्रमुख एवं प्रतिनिधिहरुको पनि सहभागिता थियो । वडास्तरका सामुदायिक विद्यालयका विव्यस प्रतिनिधि, शिक्षक र विद्यार्थीहरुको सहभागिता थियो ।
