बैतडी,
भौगोलिक तथा सञ्चारका दृष्टिले दुर्गम मानिएका गाउँघरमा पुगेर प्रहरीले सचेतना कार्यक्रम सञ्चालन गरिरहेको छ । बैतडीको तल्लो स्वराडको पञ्चेश्वर गाउँपालिकामा पर्ने महाकाली किनारका बस्तीहरुमा पुगेर प्रहरीले सचेतना जगाउन थालेको हो ।
शुक्रबार लागु औषध बिरुद्धको महा–अभियान २०८० र समुदाय–प्रहरी साझेदारी कार्यक्रम अन्तर्गत पञ्चेश्वर गाउँपालिका स्थित कुलाउँ, महाकाली, धर्मघाट र हल्दुबिनायक प्रहरी चौकीबाट खटिएको प्रहरी टोलीले आ–आफ्नो वडा क्षेत्रमा पर्ने गाउँ, टोल र घरसम्म पुगेर सचेतनाका कार्यक्रम गरेको हो ।
गाउँ समुदाय, विद्यालय, स्थानीय समाजसेबी, अग्रज, शिक्षक, बिद्यार्थी, सर्बसाधारणको सहभागिता गराइ लागु औषध दुर्व्यसन तथा ओसारपसार नियन्त्रण, घरेलु हिंसा, जबरजस्ती करणी र मानव बेचबिखन तथा ओसारपसार न्युनिकरण सम्बन्धी सचेतनामुलक प्रशिक्षण तथा अन्तरक्रिया कार्यक्रम गरिएको जिल्ला प्रहरी कार्यालय बैतडीका प्रबक्ता, प्रहरी निरीक्षक बलराम पण्डेयले जानकारी दिए ।
शान्त समाज निर्माणका लागि नयमित कार्यक्रम अन्तरगत सचेतनाका कार्यक्रम गरिएको प्रहरी निरीक्षक पाण्डेले बताए । ‘सामाजमा शान्ती, सुरक्षा, अमनचयन र अपराध न्युनिकरण गर्नका लागि जनासँत सहकार्य र साजेदारी गरेर अपराध हुन नदिने यस कार्यक्रमको मुख्य ध्येय हो,’ प्रहरी निरिक्षक पाण्डेले भने ।
समुदाय प्रहरी साजेदारी कार्यक्रम शान्त तथा हिंसामुक्त समाज निर्माणको लागि निकै प्रभावकारी मानिएकोले यस कार्यक्रमलाई थप प्रभावकारी बनाउन पालिकाले पनि सहजीकरणमा सहयोग गर्ने गाउँपालिका उपाध्यक्ष बिना भट्टले बताइन् । ‘यो कार्यक्रम निकै प्रभावकारी छ, यसले महिला हिंसा तथा घरेलु हिंसा न्युनिकरणको लागि सहयोग गरेको छ, उपाध्यक्ष भट्टले भनिन्, यस कार्यक्रमलाई थप सशक्त बनाउन सहयोग गर्छाैँ, ।’
यस कार्यक्रमले सामाजिक सचेतनामा सहयोग पुगेको गाउँपालिकाको ठहर छ । जिल्ला प्रहरी कार्यालय मातहत रहेका प्रहरी चौकीहरुले गाउँमा पुगेर सचेतनाका कार्यक्रम सञ्चालन गर्ने गरेको छ ।
