काठमाडौं
नेपाली कांग्रेस बैतडी–काठमाडौं सम्पर्क समितिको समानान्तर समिति गठन गरिएको छ । १२ साउनमा भान बहादुर चन्द(भास्कर)को अध्यक्षतामा गठन भएको सम्पर्क समितिलाई अस्वीकार गरेका दिवाकर बोहारको अध्यक्षतामा नयाँ कार्यसमिति गठन गरिएको छ ।
बिहिबार गठन गरिएको समानान्तर समितिको उपाध्यक्षमा नगेन्द्र भट्ट र ई. महादेव साउद चयन भएका छन् । त्यसैगरि सचिवमा महेश बहादुर बोहोरा र दिनेश प्रसाद भट्ट, सहसचिवमा हेमन्त नेगी, सहसचिवमा हरिकृष्ण जोशी र कोषाध्यक्षमा धनबहादुर बोहोरा रहेका छन् । त्यसै गरि सदस्यहरुमा अमृत केसी, हेमराज जोशी, सरस्वती कार्की, मनोज चन्द, मोहनसिंह धामी, यज्ञराज अवस्थी, यज्ञराज पाण्डे र सरस्वती कुमारी धामी रहेका छन् ।
यता नेपाली कांग्रेस बैतडीले पार्टीको आधिकारिक समितिलाई अस्वीकार गरि नयाँ समिति बनाउनेलाई अनुसासनको कारवाही गर्ने जनाएको छ । पार्टी जिल्ला सचिव देवराज जोशीले भने,‘नयाँ बनेको भनिएको समिति समानान्तर पनि होइन् । उनिहरुले पार्टीको लेटरप्याडको दुरुपयोग गरि सामाजिक सञ्जालमा पोष्ट्याएका कुराहरुको कुनै अर्थ छैन् । यसअघि नै अधिवेशनले गठन गरेको भान बहादुर चन्दको नेतृत्वमा बनेको समिति नै आधिकारीक हो ।’
चन्दको अध्यक्षतामा बनेको सम्पर्क समितिको अधिवेशनमा पार्टी प्रदेश कावा अध्यक्ष लोकराज अवस्थी, बैतडी जिल्ला सभापति चतूर बहादुर चन्द लगायत पदाधिकारीहरु र जिल्लाका अधिकांश नेताहरु सहभागी थिए । तर बिहिबार गठन भएको नयाँ समितिको अधिवेशनमा भने महासमिति सदस्य उत्तर बहादुर ऐर, पुर्व जिल्ला कोषाध्यक्ष रमेश पाण्डेय, नेवि संग नेता कपिल केसी लगायतका व्याक्तिहरु उपस्थीत थिए ।
हिजो गठीत समानान्तर समिति नै आधिकारिक भएको महासमिति सदस्य उत्तर बहादुर ऐरको दावी छ । १सय जना कृयाशील सदस्यको उपस्थीतिमा सम्पर्क समिति गठन गरि पार्टी केन्द्रीय कार्यालयमा पेश गरेको नेता उत्तर बहादुर ऐरको भनाई छ । यसअघि गठन गरिएको समिति पार्टीका एकदुई जना नेताको आदेशमा बनेकाले त्यो मान्य नहुने उनको दाबी छ । लोकतन्त्र र स्वतन्त्रताको लागि लडेका नेता कार्यकर्ताले हुकुमी शैली स्वीकार्न नसक्ने हुदाँ समानान्तर समिति गठन गरिएको उनको दावी छ ।
