बैतडी
बैतडीको पाटन नगरपालिका–३ घर भई अध्यायनको सिलसिलामा जापानमा रहेका जनकप्रसाद अवस्थीको निधन भएपछि सञ्चालन भएको सहयोग अभियान अन्तर्गत संकलन रकम सार्वजनिक गरिएको छ । आइतबार सहयोग अभियान सञ्चालन गरेका अभियानकर्मी तथा केही दाताहरुको उपस्थितिमा सहयोग रकम सार्वजनिक गरिएको हो ।
अध्ययनका लागि गत वैशाखमा जापान गएका अवस्थीको गत साउन ८ गते त्यहाँको स्थानीय नदीमा डुबेर मृत्यु भएको थियो । ऋण निकालेर अध्ययनका लागि जापान गएको छोरा उतै अस्ताएपछि अवस्थी परिवारलाई समस्या भएको थियो ।
स्वर्गीय जनक अवस्थीको परिवारलाई दुःखको समयमा साथ दिने उद्देश्यले अभियान अभियानकर्मी एवं सामाजसेवीको सक्रियाामा सञ्चालन गरिएको सहयोग अभियान अन्तर्गत संकलन भएको रकम आज एक कार्यक्रमको आयोजना गरेर सार्वजनिक गरिएको अभियान्ता प्रेमसिंह भाटले जानकारी दिए । यो सामाजिक कार्यमा सहयोग गर्ने सबैमा धन्यावद ज्ञापन गरे । अभियान्ता भाटले यस अभियानमा आर्थिक, भौतिक, नैतिकरुपमा सहयोग गर्ने सबैप्रति कृतज्ञता प्रकट गरे ।
स्वर्गीय अवस्थीको परिवारलाई विभिन्न व्यक्ति तथा संघसंस्थाबाट १६ लाख ३ हजार ९०३ रुपैयाँ संकलन भएको जानकारी गराइएको छ ।
स्थानीय जनप्रतिनिधि, सरोकारवालाहरुलाई राखेर संकलन भएको रकम सार्वजनिक गरिएको अर्का अभियान्ता नरेन्द्रप्रसाद भट्टले बताए । दुःखदघडीमा मृतक अवस्थीको परिवारलाई सहयोग गरेकोमा सबैलाई धन्यवाद ज्ञापन गरे । आगामी दिनमा सहयोग अभियान सञ्चालन गर्न मद्दत पुग्ने भएकाले सहयोग रकमको सार्वजनिकीकरण गरएको अभियान्ता भट्टले बताए ।
अभियान अन्तर्गत ८ सय २१ जनाबाट व्यक्तिगत रुपमा ११ लाख ३ सय ९२ रुपैयाँ, ६ ओटा संघसंस्थाबाट ४८ हजार ६०६ रुपैयाँ र जापानबाट विभिन्न व्यक्ति र संस्थाबाट ४ लाख ५४ हजार ९०५ रुपैयाँ संकलन भएको छ ।
अवस्थी परिवारलाई समस्या परेको समयमा सहयोग गर्ने व्यक्ति र संघसंस्थाको नामावलीसहितको पुस्तिका बनाएर स्वर्गीय अवस्थीका बुवा लक्ष्मीदत्त अवस्थीलाई हस्तान्तरण गरिएको छ ।
दुःख परेको बेला गरेको सहयोगले आफ्नो परिवारलाई ठूलो गुन लगाएको भन्दै स्वर्गीय अवस्थीका बुवा लक्ष्मीदत्त अवस्थीले सबैलाई धन्यवाद दिएका छन् ।
