बैतडी,
बैतडीको पाटन नगरपालिकाका पूर्व मेयर केशवबहादुर चन्दले आफू नेपाली कांग्रेसमै रहेको बताएका छन् । २०७९ सालको निर्वाचनमा कांग्रेस र माओवादीको गठबन्धन विरुद्ध स्वतन्त्र उम्मेदवार बनेका चन्दले आफू नेपाली कांग्रेसमै रहेको दाबी गरेका हुन् ।
चुनाव भएको झण्डै दुई बर्षपछि चन्दले शनिबार बैतडीको पाटनमा कांग्रेसका नेता र कार्यकर्ताहरुसंग अन्तरक्रिया गरेर आफू कांग्रेसमै रहेको बताएका हुन् । अन्तरक्रियामा बोल्दै चन्दले आफूले पार्टी विरुद्ध नभइ गठबन्धनविरुद्ध उम्मेदवारी दिएको बताए ।
नेपाली कांग्रेसको केन्द्रीय कार्यसमितिले अब चुनावमा गठबन्धन नगर्ने निर्णय समेत गरिसकेको बताउँदै चन्दले आफूले पहिला नै सो कुरा उठाएको दाबी गरे । उनले भने ‘म डेमोक्र्याकिटक मान्छे हुँ । नेपाली कांग्रेसले चुनावको बेला बैतडीमा संघीय संसदको उम्मेदवार उठाएन् त्यसको विरुद्ध मैले उम्मेदवारी दिएको हुँ । कांग्रेसको उम्मेदवारको विरुद्ध म कहिले लागेको छैन् ।’
पाटनमा नेपाली कांग्रेसका नेताहरु विष्णुदत्त जोशी,सिद्धराज भट्ट, करनसिंह कठायत, गौरीसिंह रावल, राजेन्द्रसिंह बिष्ट लगायतलाई साथमा राखेर चन्दले आफू कांग्रेसको संगठन विस्तारमा लाग्ने बताए । उनले भने,‘मैले लामो समय नेपाली कांग्रेसमा काम गरेको हुँ । अहिले पनि म नेपाली कांग्रेसमै छु । अब पार्टीको संगठन विस्तारको काममा लाग्छु ।’
अन्तरक्रिया कार्यत्रलममा सहभागि ट्रेड युनियन बैतडीका अध्यक्ष बसन्त बिष्टले कांग्रसमा प्रतिशोधको भावनाले नभई एक ढिक्का भएर अघि बढ्नु पर्ने बताएका छन् ।
नेपाली कांग्रेसको केन्द्रीय कार्यसमितिले कांग्रेसको उम्मेदवार नभएका ठाउँमा गठबन्धन विरुद्ध उम्मेदवारी दिएकाहरुको कारवाही फुकुवा गरेकाले कांग्रेस नेता चन्दमाथिको कारवाही फुकुवा भइसकेको नेविसंघका केन्द्रीय सदस्य कपील केसीले बताए ।
अन्तरक्रिया कार्यक्रममा सहभागी कांग्रेसका नेता कार्यकर्ताहरुले केशवबहादुर चन्द कांग्रेसमै फर्केको खुसी व्यक्त गरेका छन् । चन्दले कांग्रेसमा आएपछि संगठन विस्तारमा सहज हुने उनीहरुको भनाइ रहेको छ ।
केशवबहादुर चन्द लामो समयदेखि कांग्रेसको राजनीतिमा रहेका र तत्कालिन परिस्थितीमा केही कमजोरी भएपनि फेरि कांग्रेसमै फर्केकाले खुसी लागेको जिल्ला समन्वय समितिका पूर्व प्रमुख एवं कांग्रेस नेता सिद्धराज भट्टले बताए ।
यस्तै पूर्व जिविस उपसभापति एवं कांग्रेस नेता विष्णुदत्त जोशीले चन्द जहिले पनि प्रजातान्त्रिक विचारका व्यक्ति भएकाले उनी कांग्रेसमा फर्किनु निकै सुखद भएको टिप्पणी गरे ।
२०७४ सालको स्थानीय तहको निर्वाचनमा नेपाली कांग्रेसबाट पाटन नगरपालिकाको नगर प्रमुख बनेका चन्द २०७९ सालको आम निर्वाचनमा पार्टीको निर्णय विरुद्ध उभिएका थिए ।तत्कालिन समयमा पार्टीले बैतडीको वस्तुस्थिती नबुझेर निर्णय गरेको र अहिले पार्टी आफ्नै लाइनमा आएको बताउँदै चन्दले आफू जहिले पनि कांग्रेसमै रहेको दाबी गरेका छन् ।
