बैतडीको पाटन नगरपालिका–१ बयालाचौरमा रहेको सरस्वती माविको नयाँ भवनको अगाडी निर्माण गरिएको बरण्डा भासीएपछि विरोध सुरु भएको छ ।
गत वर्ष ठेक्का भएको ४ कोठे भवन निर्माण असारमै सम्पन्न भएको हो । भवन निर्माण सम्पन्न भएको भवनको अगाडी निर्माण गरिएको बरण्डाको विषयलाई लिएर विव्यसले बिरोध जनाएको छ । निर्माण सम्पन्न गरेको ४ महिनामै बरण्डा चर्किएपछि पुनः निर्माणको माग गरिएको हो । विद्यालय जोखिममा परेकाले यो बरण्डा पुनः निर्माण गरिनुपर्ने विद्यालय व्यवस्थापन समितिका अध्यक्ष शेर बहादुर चन्दको माग छ । ‘यो भवन निर्माण हुदा अनुगमन पनि खासै भएको छैन, कसरी भुक्तानी भएछ, विद्यालयमा धेरै समस्या छ, कसैले हेर्दैनन्,’ विव्यस अध्यक्ष चन्द भन्छन् ।
यो बरण्डा स्टमेटमा नभएको काम रहेको नगरपालिकाले जनाएको छ । स्टमेटमा भवनसँगै जोडिएको बरण्डा रहेको तर भवनभन्दा बाहिरको बरण्डा स्टमेटमा नभएको जनाएको छ ।
भवन निर्माणको जिम्मा पाएको आयुश बिल्डर्सले स्टमेटभन्दा बाहिर रहेको काम भएको बताएको छ । स्टमेटमा भवन निर्माणको मात्रै काम रहेको र केही निर्माण सामाग्री बचेकाले आफुले भवन अगाडीको बरण्डा बिना रकम नै बनाएको निर्माण कम्पनीको दावी छ ।
‘यो भवन निर्माण सम्पन्न भइसकेपछि सबैले बरण्डा बनाइदिन भनेका हुन, मैले स्टमेटमै नभएको काम व्याभारीक रुपमा बनाइ दिएको हो, स्टमेटमा भएको भए, बेस बलियो बनाएर बनाउने थिए, खाली पानी बगाउनको लागि यो बनाइदिन भनेको हुन्, यसको कुनै भुक्तानी लिएको छैन, दिएको पनि छैन,।’ निर्माणको जिम्मा पाएको आयुश बिल्डर्सका सञ्चालक नरेश चन्द भन्छन् । विद्यालयको भवनमा २१ पिल्लरको ठेक्का रहेकोमा २४ वटा पिल्लर ठड्याएर भवन निर्माण गरिएको समेत उनले बताएका छन् ।
अहिले बिरोधका लागि बिरोध भइरहेको उनको गुनासो छ ।
नगर उपप्रमुख एवं योजना अनुगमन समितिका संयोजक कमल सिंह बोहराले भवन निर्माण देखि सम्पन्न भई भुक्तानी हुदासम्म प्रक्रिया अनुसार नै भएको बताएका छन् । भवन अगाडी निर्माण गरिएको बरण्डा मर्मत गरिदिन निर्माण कम्पनीलाई भनिएको बताएका छन् ।
निर्माण कम्पनीले भने पुनः अनुगमन गरिदिन आग्रह गरेका छन् ।
