बैतडी,
बैतडीको पाटन नगरपालिकाले विद्यालय समायोजन र नगर शिक्षक व्यवस्थापनका विषयमा छलफल गरेको छ । शिक्षासँग सरोकार राख्ने पक्षका प्रतिनिधिहरुलाई बोलाएर छलफल गरेको हो ।
छलफलमा सहभागिहरुले नगरपालिकाले यसअघि गरेको निर्णयमा पुनरबिचार गर्नुपर्ने धारणा राखेका छन् ।
विधालय नक्साङ्कन गर्नु पर्ने र पुनः स्थलगत निरीक्षण गरेर विद्यालय समायोजन प्रक्रिया अघि बढाउनुपर्ने सरस्वती माविका प्रद्यानाध्यापक लोकराज भट्टले आग्रह गरे । विद्यालयहरुमा पूल दरबन्दी कायम गर्न सकिएमा उपयुक्त हुने समेत धारणा राखे । भट्टले नगर शिक्षकहरुलाई उचित विकल्प दिएरमात्रै विस्थापित गर्न समेत आग्रह गरे ।
नगर शिक्षकको पेशागत सुनिश्तता गर्नुपर्ने, पुर्नताजकी तालिमको प्रवन्ध मिलाउनु पर्ने कृष्ण माविका शिक्षक गोपालदत्त भट्टले आग्रह गरे । विद्यायल समायोजन गर्दापनि औचित्य पुष्टि गरेर मात्रै अघि बढ्नु पर्ने र विधालय सुधार रणनीति बनाएर अघि बढ्न सुझाव दिए ।
विद्यालय व्यवस्थापन समिति अध्यक्ष, प्रद्यानाध्यापक र अविभावकहरुलाई बोलाएर खुल्ला छलफल गरेर आवश्यक निर्णय गर्न सकेमा उपयुक्त हुने ज्ञानेश्वर नमुना माविका सहायक प्रद्यानाध्यापक धन बहादुर महराले सुझाव दिए । शिक्षक दरबन्दी मिलानको लागि नगरपालिकाले आवश्यक प्रक्रिया अघि सार्नुपर्ने धारणा पनि राखे ।
पुनः स्थलगत निरीक्षण र व्यापक छलफलगरेर मात्रै विद्यालय समायोजक गर्नुपर्ने जनपृय माविका प्रद्यानाध्यापक केशवदत्त भट्टले आग्रह गरे ।
वडा नं १ का वडा अध्यक्ष तर्क सिंह ठगुन्नाले कक्षागत विद्यार्थी संख्या यकिन गरेर मात्रै दरबन्दीको पदपुर्ती गर्न सकिने बताए । कक्षागत, तहगत बिद्यार्थि सङ्ख्या को आधारमा स्थायी, राहत ,अनुदानका दरबन्दी पनि मिलान गरि दरबन्दी पदपूर्ति गर्नु पर्ने अध्यक्ष ठगुन्नाले बताए ।
वडा नं ६ का वडा अध्यक्ष राजेन्द्र सिंह बिष्टले विद्यालय समायोजन गर्नुपर्ने बाध्यता आइलागेको बताए ।
वडा नं ३ का वडा अध्यक्ष करुणाकर भट्टले निष्पक्ष ढंगले मात्रै विद्यालय समायोजन गर्नुपर्ने र कसैलाई काखा कसैलाई पाखा गर्न नहुने बताए । हालै नगरपालिकोले गरेको निर्णयमा उनले बिरोध गरे । यो कार्यान्वयनमा निकै चुनौती रहेको पनि बताए ।
वडा नं ५ का वडा अध्यक्ष फुनि सिंह बोहराले नगरपालिबाट गरिएको निर्णयमा पुनरबिचारको माग व्यापक आएकाले नगरसभाबाट फिर्ता गर्न सकिने धारणा राखे ।
वडा नं ४ का वडा अध्यक्ष दिपक बिष्टले नगर शिक्षक व्यवस्थापनमा नगरपालिकाले कन्ज्युसाई गर्न नहुने बताए । समुदायको सहजताको लागि विगत देखि नै निजिश्रोतका शिक्षकको व्यवस्थापन पालिकाले गरिरहेको र अहिले उनिहरुलाई हटाउन नहुने धारणा राखे । शिक्षामा गरिएको लगानीबाट आएको बेरुजुले कुनै फरक नपर्ने धारणा पनि राखे । अन्य कामकाजमा सुशासन कायम गर्नुपर्ने र नगर शिक्षक स्वयमसेवकका नाममा बजेटमा घाटा भएको भन्न नहुने बताए ।
सामाजिक विकास समिति संयोजक एवं वडा नं ८ का वडा अध्यक्ष हरिश बिष्टले सबै पक्षबाट आएका सुझावहरु ग्रहण गरि अघि बढ्ने बताए । नगरपालिकाले २०७९ देखि नै शिक्षामा अमूल परिवर्तनको लागि आवश्यक प्रक्रियाहरु अघि बढाएर कार्यान्वयन गरिरहेको बताए । २०७९ सालमै पनि एक पटक विद्यालय समायोजक गर्ने प्रक्रिया थाल्नेक्रममा व्यापक छलफल र अनुगमन गरेर मात्रै अघि बढ्ने विषयमा आफु अडिक रहेर सोही अनुसार कार्यान्वयन गरेको समेत बिष्टले अवगत गराए । अझैपनि छलफल गरि आगामी कदम चाल्न तयार रहेको बताए ।
सामाजिक विकास समिति संयोजक बिष्टले वडा अध्यक्षको अध्यक्षतामा रहेको वडास्तरीय शिक्षा समितिले पनि वडा माहतका विद्यालयको गुणस्तर सुधारको लागि काम गर्नुपर्ने अवगत गराएका थिए ।
नगर शिक्षकको दरबन्दी कटौती गर्नु रहर नभएर बाध्यता भएको नगर उपप्रमुख कमल सिंह बोहराले बताए । शैक्षिक सत्रको बिचमा नभई शैक्षिकसत्रको सुरुवातदेखि विद्यालयहरुलाई समायोजनको मापदण्डका बारेमा पत्राचार गरिएको समेत उपप्रमुख बोहराले अवगत गराए ।
बैशाख, असार र असोजमा गरी ३ पटक विद्यालयहरुमा पत्राचार गरिएको बताए । नगर शिक्षकको पारीश्रमिक दिदा सैद्धान्तिक बेरुजु आएकाले यस विषयमा पुनरबिचार गर्न नसकिने बताए ।
उपप्रमुख बोहराले नगरपालिकाले कार्यपालिकाबाट भएको निर्णयबाट पछाडी फर्कन नसकिने समेत अवगत गराए । सबै कार्यपालिका सदस्यहरुले गरेको निर्णयमा पुनरबिचार गर्न नसकिने उनको भनाइ छ।
केही कार्यपालिका सदस्यहरुले यस निर्णयका बिरुद्धमा धारणा राख्दा कार्यपालिकामा सहमति जनाएर अहिले बिरोध गर्नुको तूक नरहेको बताए । ‘कार्यपालिकामा निर्णय गर्दा सहमती जनाउने तर अहिले सर्वपक्षिय छलफलमा फरक मत राखेर के भन्ने खोजेको ? असहमती भएको भए त्यहाँ बहिस्कार गर्नुपर्ने नि,’ उपप्रमुख बोहराले भने ।
नगर प्रमुख गौरी सिंह रावलले यस छलफलबाट आएका सुझावहरुमाथि कार्यपालिकामा छलफल गरिने बताए ।
नगर प्रमुख गौरी सिंह रावलको सभाध्यक्षतामा भएको छलफलमा उपप्रमुख कमल सिंह बोहरा, प्रमुख प्रशासकीय अधिकृत अम्मरराज जोशी, सामाजिक विकास समितिका संयोजक एवं वडा नं ८ का वडा अध्यक्ष हरिश बिष्ट, वडा नं १ का वडा अध्यक्ष तर्क सिंह ठगुन्ना, वडा नं २ का वडा अध्यक्ष महेश प्रशाद पन्त, वडा नं ३ का वडा अध्यक्ष करुणाकर भट्ट, वडा नं ४ का वडा अध्यक्ष दिपक बिष्ट, वडा नं ५ का वडा अध्यक्ष फुनि सिंह बोहरा, वडा नं ६ का वडा अध्यक्ष राजेन्द्र सिंह बिष्ट लगायत, शिक्षा शाखा प्रमुख ललित पाण्डेय, शिक्षा समितिका प्रतिनिधि, शिक्षक, तथा विभिन्न राजनितिक दलसँग आबद्ध शिक्षक संगठनका प्रतिनिधिहरुले छलफलमा सहभागिता जनाएका थिए ।
