बैतडी,
बैतडीको पाटन नगरपालिका वडा नं ३ स्थित गुजर स्वास्थ्य चौकीमा अनमीको अटेरीका कारण स्वास्थ्य सेवा प्रभावित बनेको छ । पाटन नगरपालिकाले कार्यपालिकाबाट निर्णय गरि एक महिना पहिले नै नेहा भट्टलाई गुजर स्वास्थ्य चौकीमै काज फिर्ता गर्ने निर्णय गरेको थियो ।
यसअघि नगरपालिकामै हाजिर लगाउदै आएकी अनमी नेहालाई गुजर स्वास्थ्य चौकीमा काम गर्न भनिएको भएपनि उनले आनाकानी गर्दा त्यहाको स्वास्थ्य सेवा प्रभावित बन्न पुगेको छ ।
गुजर स्वास्थ्य चौकीमा सुत्केरी हुन आएका महिलाहरु समस्यामा परेका छन् ।
यसअवधिमा दुई महिलाहरुले घरैमा सुत्केरी हुन बाध्य भएका थिए, भने एक महिलालाई डडेल्धुरा लैजानु पर्ने बाध्यता आएको वडा नं ३ का वडा अध्यक्ष करुणाकर भट्टले जानकारी दिए । ‘त्यहाका सेवाग्राही निकै समस्यामा छन्, यहाँबाट खटाइएका अनमीले स्वास्थ्य चौकीमा जान आनाकानी गर्दा सेवा नै प्रभावित भयो, सेवाग्राहीलाई मैले कसरी जवाफ दिने?’ । वडा अध्यक्ष भट्टले भने ।
कार्यापालिका बैठकबाट भएको निर्णय कार्यान्वयन नहुदा स्वास्थ्य सेवा प्रभावित भएको कार्यपालिका सदस्य रमेश कोलीले बताए । प्रमुख प्रशासकीय अधिकृतले कर्मचारी खटाउन कडाइ नगर्दा समस्या आएको उनको गुनासो छ ।
कार्यपालिकाबाट निर्णय हुदाहुदै कार्यान्वयनमा नजादा सेवा प्रवाहमा समस्या भएको वडा नं ३ का वडा सदस्य भीम भट्टले बताए ।
बुधबार नगर उपप्रमुख कमल सिंह बोहरासहितका जनप्रतिनिधिहरुले कार्यालय प्रमुख, अम्मरराज जोशीसँग छलफल गरेका थिए । उपप्रमुख बोहराले कर्मचारी खटनपठनमा कडाईका साथ लागु गर्न भनेका थिए । ‘कार्यपालिकाबाट भएको निर्णय कार्यान्वयन गर्नुप¥यो, केही समस्या भए पुनः छलफल गरौँला, तर सेवा प्रभावित हुनेगरी समस्या आउनु भएन,’ उपप्रमुख बोहराले भने ।
कर्मचारी व्यवस्थापनमा नियमानुसार अघि बढ्न सामाजिक विकास समिति संयोजक हरिश बिष्टले आग्रह गरे । अन्य कर्मचारीहरुको मनोबलमा समेत असर पर्ने भएकाले सबै कर्मचारीहरुको लागि नियम बराबर भएको अवगत गराए ।
एक जना कर्मचारीको कारणले समग्र कर्मचारी प्रर्णालीमा असर पर्ने भएकाले प्रक्रिया अनुसार अघि बढ्न वडा नं १ का वडा अध्यक्ष तर्क सिंह ठगुन्नाले आग्रह गरे । कार्यपालिकाको निर्णयको अवज्ञा गर्नु नियमसंगत नभएको उनको भनाइ थियो । आगामी कार्यपालिकामा यस विषयमा पनि ठोस निर्णय गर्नुपर्ने उनको भनाइ थियो ।
प्रमुख प्रशासकीय अधिकृत जोशीले अनमी भट्ट गुजर स्वास्थ्य चौकीमा नभई अन्य स्वास्थ्य संस्थामा जान तयार रहेको बताउने गरेको जानकारी गराए । गुजर स्वास्थ्य चौकीमा नजानुको कारण सहितको स्पष्टिकरण समेत सोधिएको उनले बताए ।
