बैतडी,
बैतडीको पाटनमा जग्गा विवादका कारण पाटन र मेलौली सबस्टेसनको सञ्चालन प्रक्रियामा बाधा पुगेको छ ।
पाटन नगरपालिका–६ को सुर्नया गाड विद्युत गृहदेखि पाटन सबस्टेसनसम्मको ३३ केभी प्रशारण लाईन तान्नको लागि स्थानीयहरुले जग्गा नदिएपछि पाटन र मेलौली सबस्टेसन सञ्चालनमा आउन नसकेको हो ।
स्थानीय पदम सिंह ऐर, कृष्ण सिंह ऐर, मन्दिर सिंह बिष्ट, हरिश बिष्ट, लाल सिंह बिष्ट, करन सिंह भण्डारी, धर्मेन्द्र सिंह बिष्ट, नन्दसिंह बिष्ट लगायतको खेतियोज्ञ जमिन रहेको र उनिहरुले उक्त जमिन नदिने बताउदै आएपछि ३३केभी लाइनको सब स्टेसन सञ्चालनमा आउन नसकेको हो ।
स्थानीयहरुसँग पटक पटक सहमतीको लागि छलफल भएपनि ठोस सहमती नजुटेको विद्युत वितरण केन्द्र बैतडीका प्रमुख जनार्दन पौडेलले जानकारी दिए । ‘स्थानीयको गाउँ र खेत हुदै लाईन तान्ने योजना थियो, सहमती दिदैनन्, पुनः छलफल गर्दैछौँ’ वितरण केन्द्र प्रमुख पौडेलले भने । यसअघि पनि स्थानीय जग्गाधनी र जनप्रतिनिधिहरुबीच छलफल भएको तर सहमती नजुट्दा काम अघि बढ्न नसकेको वितरण केन्द्र बैतडीले जनाएको छ ।
सुर्नया गाडको विद्युत गृहदेखि, बेताल मन्दीर, सिराडी खेत, कैलपाल मन्दीर हुदै पाटनको सबस्टेसनमा जोड्ने लाईनमा स्थानीयहरुको विवाद छ । त्यहाका स्थानीयहरुले जमिन नदिने र अर्काे ठाउँबाट घुमाएर विद्युत लाईन विस्तार गर्न भन्दै आएका छन् ।
स्थानीयहरुले लाईन सर्भेका बखत कुनै समन्वय नगरेको हुनाले अहिले लाईन विस्तारको लागि जग्गा दिन नसकिने बताइरहेको वडा नं ६ का वडा अध्यक्ष राजेन्द्र सिंह बिष्टले बताए ।
मेलौली र पाटन सबस्टेसनको भौतिक निर्माण सम्पन्न भएको वितरण केन्द्र बैतडीले बताएको छ । सबस्टेसनमा राखिने केही राख्ने डिभाईस लगायतका उपकरणहरु ल्याउन बाँकी रहेको वितरण केन्द्रका प्रमुख पौडेलले बताए । ‘केही समाग्रीहरु भन्सारमा अड्किएका छन्, ल्याउनेबारे पहल भइरहको छ, भौतिक प्रगति भने भइसकेको हो,’ उनले भने ।
पाटन र मेलौलीको सबस्टेसनको ठेक्का अर.के.इन्टरनेस्नल कम्पनीले पाएको थियो ।
