बैतडी,
बैतडीको पाटन नगरपालिकाले जारी गरेको शिक्षा मापदण्ड कार्यान्वयन गरिने भएको छ । बुधबार बसेको कार्यपालिका बैठकले नयाँ मापदण्ड कार्यान्वयन गर्ने निर्णय गरेको हो ।
उक्त मापदण्डको परिधिभित्र नरहेका विद्यालयहरुमा नगर शिक्षक अनुदान कटौती गरिने र थप व्यायभार यही चैत्र मसान्तपछि सम्बन्धित विद्यालयहरुले नै व्यहोर्नुपर्ने निर्णय गरिएको छ ।
नगरपालिकाले जारी गरेको मापदण्डको परिधिभित्र नरहेका विद्यालयको नगर शिक्षक अनुदान कटौती गरिने र त्यसपछिको व्यावभार सम्बन्धित विद्यालयले नै व्यहोर्नुपर्ने निर्णय गरिएको हो ।
विद्यालय समायोजन र शिक्षक दरबन्दी मिलान गर्नको लागि यस सम्बन्धी विस्तृत अध्यायन गर्न कार्यदल गठन गरिएको छ । वडा नं ८ का वडा अध्यक्ष एवं सामाजिक विकास समिति संयोजक हरिश बिष्टको संयोजकत्वमा कार्यदल गठन गर्ने निर्णय गरिएको हो । यस कार्यदलले लगत्तै सबै विद्यालयहरुको स्थलगत अनुगमन गर्ने र सम्बन्धित विव्यस तथा अभिभावकसँग वृहत छलफल गरि नगरपालिकामा राय पेश गर्ने बताइएको छ । त्यसपछि नयाँ शैक्षिकसत्रदेखि विद्यालय समायोजन र दरबन्दी मिलान पूर्णरुपमा कार्यान्वयनमा जाने छ ।
सामाजिक विकास समिति संयोजक बिष्टको संयोजकत्वमा रहेको कार्यदलमा वडा नं ४ का वडा अध्यक्ष दिपक बिष्ट, वडा नं ७ का वडा अध्यक्ष ललित बहादुर चन्द, वडा नं १० का वडा अध्यक्ष धन बहादुर कुवँर, वडा नं ६ का वडा अध्यक्ष राजेन्द्र सिंह बिष्ट, वडा नं ९ का वडा अध्यक्ष कालु सिंह भाट, कार्यपलिका सदस्य रमेशराम कोली र शिक्षा शाखा प्रमुख ललित कुमार पाण्डेय रहेका छन् ।
यो कार्यदलले लगत्तै विद्यालय अनुगमनको काम थाल्ने छ ।
शिक्षाका विषयमा कार्यपालिका सदस्यहरुबीच व्यापक छलफल भएको र सबैको सहमतीमा शिक्षा सम्बन्धीको नयाँ मापदण्डको निर्णय कार्यान्वयनको चरणमा लैजाने सहमती भएको वडा नं ८ का वडा अध्यक्ष एवं सामाजिक विकास समितिका संयोजक हरिश बिष्टले जानकारी दिए ।
“आज सबै कार्यपालिका सदस्यहरुले आ–आफ्नो राय राखे, व्यापक र घनिभूत वृहत छलफलबाट नै यो निर्णय गरिएको हो,” नयाँ कार्यदलका संयोजक समेत रहेका बिष्टले भने ।
विद्यार्थी संख्या, भौगोलिक अवस्थालाई मध्यनजर गर्दै विद्यालय समायोजन र दरबन्दी मिलानको बाटोमा जाने सहमती भएको उनले बताए । पालिकामा रहेका ६४ वटै विद्यालयहरुका बारेमा व्यापक छलफल गरिएको र नयाँ मापदण्डका विषयमा सबै कार्यपालिका सदस्यहरु सहमत भएको उनले बताए ।
यसैगरी नगरपालिकाले संघीय अनुदान कोटा पनि वितरण गरेको छ । अंग्रेजी, गणित र विज्ञान विषयको शिक्षण सिकाइ अनुदान कोटा वितरण गरेको छ ।
जस अन्तरगत कालिका मावि मटे, भुमेश्वर मावि ठाड, गुजर मावि गुजर, त्रिपुरेश्वर मावि द्धाकुलडा, निल्पालेश्वर मावि डैसीली, जनता मावि आरुबाटा र शिवशक्ति आवि बगाउ रहेका छन् ।
मापदण्ड अनुसार नै वितरण गरिएको नगरपालिकाले जनाएको छ ।
आजकै निर्णयबाट पटक पटक नगरपालिकाले खटाएको ठाउँमा नजाने कर्मचारीहरुलाई प्रशासनिक कारवाही गर्ने निर्णय पनि गरिएको छ ।
