बैतडी,
बैतडीमा बालकको शंकास्पद मृत्यु भएको घटनाका विषयमा ठोस अनुसन्धान गर्ने र उचित क्षतिपुर्ती दिने विषयमा सहमती भएको छ । डिलासैनी गाउँपालिका वडा नं २ छेपट्टाका मुकेश रानाका दुई महिने छोरा आदर्शको बुधबार शंकास्पद मृत्यु भएपछि स्थानीयहरु आन्दोलनमा उत्रिएका थिए ।
घटनाको विषयमा सबै पक्षबाट अनुसन्धान गरिने र पालिकाको तर्फबाट उचित क्षतिपुर्ती दिने विषयमा सहमती गाउँपालिका उपाध्यक्ष बगिरथ सिंह बोहराले जानकारी दिए ।
गाउँपालिकाले ५ लाख क्षतिपुर्ती र थप किरिया खर्च उपलब्ध गराउने सहमती जुटेको स्थानीय ध्रुब रानाले बताए । यसैगरी शवको पोष्टमाटम गरी छानबिन गरिने सहमती भएको छ । सहमती जुटेपछि गोकुलेश्वर–गन्ना–लटिनाथ सडकखण्ड पनि खुलेको छ । मृतक बालकको पोष्टमाटम गर्न शवलाई गोकुलेश्वर अस्पतालतर्फ लगिएको छ ।
गाउँपालिकाको तर्फबाट उपाध्यक्ष भगिरथ बोहरा, गाउँपालिकाका प्रशासकीय अधिकृत गणेश सिंह बोहरा, वडा नं २ का वडा अध्यक्ष नवराज घरडी तथा वडा नं ३ का वडा अध्यक्ष रघुबिर बोहरा र आफन्तबीच सहमती जुटेको हो ।
बुधबार दिउँसो १२ बजेको समयमा डिलासैनी –३ स्थित सिमार वर्थिङ सेन्टरमा खोप लगाएका आदर्श बिरामी भएपछि उपचारको लागि डडेल्धुरा अस्पताल लैजाने क्रममा बाटोमै मृत्यु भएको हो ।
नियमित खोप कार्यक्रम अन्तरगत आदर्शलाई सिमार वर्थिङ सेन्टरमा डिपिटी दोश्रो डोज र पिसिभीको पहिलो डोज लगाइएको थियो ।
त्यसैगरी ओपीभी र रोटा डोज खुवाइएको थियो । त्यसपछि दिउँसो ३ बजेदेखि जरु आएको र राती ¥याल फाल्न थालेपछि उपचारको लागि गोकुलेश्वर लगिएको थियो । त्यहा उपचार नभएपछि डडेल्धुरा अस्पताल लैजाने क्रममा बाटोमै मृत्यु भएको मृतकका आफन्त ध्रुब रानाले जानकारी दिए ।
त्यसपछि बिहिबार दिउँसोदेखि स्थानीयहरु आन्दोलित बनेका थिए । खोप लगाएपछि बालकको स्वास्थ्यमा समस्या देखिएको र त्यसपछि उक्त घटना घटेको भन्दै दोषीमाथि कारवाही हुनुपर्ने र उचित क्षेतिपुर्ती दिनुपर्ने मागसहित गोकुलेश्वर–गन्ना–लटिनाथ सडकखण्ड अबरुद्ध पारेका थिए ।
सहमती जुटेपछि सडकपनि खुलेको छ । घटनाका विषयमा थप अनुसन्धान प्रक्रिया पनि अघि बढेको स्वास्थ्य कार्यालय बैतडीले जनाएको छ ।
