नेपाल विद्यार्थी संघ बैतडीका १० पदाधिकारीद्वारा सामूहिक राजीनामा
बैतडी नेपाल विद्यार्थी संघ (नेविसंघ) बैतडीका प्रमुख पदाधिकारीहरूले संगठन सुधारको माग गर्दै सामूहिक राजीनामा दिएका छन्। उनीहरूले नेतृत्व तहमा पारदर्शिता नहुँदा र विद्यार्थीमुखी नीति लागू गर्न असहयोग भएपछि संगठन छोड्ने निर्णय गरेको बताएका छन्।
यसअघि नेविसंघको केन्द्रीय महाधिवेशन प्रतिनिधि समेत रहेका उमेश भट्टले लामो समयदेखि संगठन सुधारको माग गर्दै आवाज उठाइरहेका थिए। विद्यार्थी संगठनलाई पुनः विद्यार्थीमुखी बनाउने अभियानमा संलग्न रहे पनि नेतृत्व तहको उदासीनताले उनी संगठनबाट अलग भएको बताएका छन्।
त्यसैगरी, संगठनका प्रवक्ता राजेन्द्र जोशी, जो पहिले जिल्ला सदस्यको भूमिकामा पनि थिए, निर्णय प्रक्रियालाई पारदर्शी बनाउन विशेष पहल गर्दै आएका थिए। तर, नेतृत्वले उनको मागलाई बेवास्ता गरेको उनको आरोप छ।
राजीनामा दिने पदाधिकारीहरूको सूची:
१. राजेन्द्र जोशी – प्रवक्ता (पूर्व जिल्ला सदस्य)
2. गणेश साउद – जिल्ला सदस्य
3. उमेश भट्ट – दोगडाकेदार गाउँपालिका संयोजक (पूर्व केन्द्रीय महाधिवेशन प्रतिनिधि)
4. राजेन्द्र सिंह धामी – डीलासैनी गाउँपालिका संयोजक
5. दिनेश घरेडी – जिल्ला सदस्य
6. लक्ष्मी जोशी – जिल्ला सदस्य
7. सुरेन्द्र प्रसाद जोशी – जिल्ला सदस्य
8. रमेश भट्ट – दोगडाकेदार गाउँपालिका सदस्य
9. निशा भट्ट – दोगडाकेदार गाउँपालिका सदस्य
10. कलावती भट्ट – दोगडाकेदार गाउँपालिका सदस्य
संगठन सुधारका लागि प्रतिबद्धता
राजीनामा दिएका पदाधिकारीहरूले संगठन छोडेपनि विद्यार्थीको हकहितका लागि निरन्तर क्रियाशील रहने प्रतिबद्धता जनाएका छन्।
“हाम्रो उद्देश्य संगठन छोड्ने होइन, संगठनलाई सुधार्ने हो। तर, जब नेतृत्व तहले संवादको वातावरण नै बन्द गरिदिन्छ, पारदर्शिता मेटिन्छ र विद्यार्थीका वास्तविक मुद्दा प्राथमिकतामा पर्दैनन्, तब संगठनको मूल्यमान्यता रक्षा गर्न त्यहाँ रहनु असम्भव बन्छ,” नेता राजेन्द्र जोशीले भने।
नेविसंघ नेतृत्वको आगामी निर्णय प्रतीक्षा गर्दै विद्यार्थीहरू
संगठनका पदाधिकारीहरूले राजीनामा दिएपछि अब नेतृत्व तहले के निर्णय लिन्छ भन्ने चासो बढेको छ। संगठनभित्र देखिएका समस्याहरू समाधान गर्दै विद्यार्थीहरूको विश्वास जित्ने गरी नेतृत्व तहले कदम चाल्नेछ वा पुरानै शैलीलाई निरन्तरता दिनेछ भन्ने प्रश्नले नेविसंघ बैतडीको भविष्य निर्धारण गर्नेछ।
विद्यार्थी तथा संगठन सुधारको माग गर्ने अन्य सदस्यहरूले अब नेविसंघ नेतृत्वले कस्तो प्रतिक्रिया दिन्छ भन्ने कुरालाई नजिकबाट नियालिरहेका छन्।
