क्षयरोगका बिरामी खोज्दै स्वास्थ्य कार्यालय बैतडी

प्रदेश समाचार

Home
प्रदेश समाचार
क्षयरोगका बिरामी खोज्दै स्वास्थ्य कार्यालय बैतडी

क्षयरोगका बिरामी खोज्दै स्वास्थ्य कार्यालय बैतडी

स्वास्थ्य कार्यालय बैतडीले क्षयरोगका बिरामी खोज्न थालेको छ। जिल्लाका ग्रामीण तथा दुर्गम क्षेत्रमा स्वास्थ्य संथाको पुहँच बाहिर रहेका क्षयरोगका बिरामी खोज्न थालिएको ल्याब टेक्निसियन निरीक्षक जयसिंह बडालले बताए।

कार्यालयले स्थानीय तहसँग समन्वय गरी सम्भावित बिरामी भएका तथा दुर्गम क्षेत्रमा घुम्ती शिविर आयोजना गरिरहेको उनले बताए। घुम्ती शिविरमार्फत सम्भावित व्यक्तिको खकारको नमुना सङ्कलन गरी परीक्षण गरिने निरीक्षक बडालले बताए। दश स्थानीय तहमध्ये यहाँका पाँच तहमा घुम्ती शिविर सम्पन्न भइसकेका छन्। बजेट पुगेसम्म सबै स्थानीय तहमा शिविर सञ्चालन गर्ने योजना रहेको कार्यालयले जनाएको छ।

हालसम्म डिलाशैनीको ब्रह्म आधारभूत स्वास्थ्य केन्द्र, दोगडाकेदारको न्वाली स्वास्थ्य केन्द्र, पञ्चेश्वर गाउँपालिकाको आमचौरा स्वास्थ्य चौकीअन्तर्गत विनायकमा घुम्ती शिविर सम्पन्न भएको छ ।। यस्तै, शिवनाथ गाउँपालिकाको नागार्जुन आधारभूत स्वास्थ्य केन्द्र र सिगास गाउँपालिकाको कान्धार आधारभूत स्वास्थ्य केन्द्रमा घुम्ती शिविर सम्पन्न भएका स्वास्थ्य कार्यालय बैतडीले जनाएको छ।

यस क्रममा दुई सय २३ को नमुना परीक्षण गर्दा चार जनामा क्षयरोग पुष्टि भएको छ। कान्धारमा ७१ जनाको नमुना सङ्कलन गरिएकामा रिपोर्ट आउन बाँकी छ। निरीक्षक बडालका अनुसार जिल्लामा ९८ जना क्षयरोगका बिरामीले औषधि सेवन गरिरहेका छन्। यो संगै क्षयरोगका बिरामीको संख्या १०२ पुगेको छ ।

सन् २०३० सम्ममा क्षयरोग महामारीको अन्त्य र २०५० सम्ममा क्षयरोग मुक्त नेपाल हासिल गर्ने लक्ष्यका साथ सरकारले विभिन्न कार्यक्रम गर्दै आएको छ ।
तीन हप्ता वा सो भन्दा बढी समयदेखि लगातार खोकी लागेमा, खकारमा रगत देखिएमा, श्वास फेर्न गाह्रो भएमा वा छाती भारी भइरहेमा, अकास्मात धेरै तौल घटेमा यस रोग लागेको हुन सक्छ । त्यस्तै पसिना आउने धेरै भएर थकान बढी महसुस भएमा नजिकैको स्वास्थ चौकी गएर परीक्षण गर्नुपर्दछ । शारिरीक अवस्था कमजोर भई रोग प्रतिरोधात्मक क्षमता कम भएकामा यो रोगको संक्रमण हुन सक्छ । यो रोगसँग डराउनु नपर्ने र यसको निःशुल्क उपचारको प्रबन्ध गरिएको छ ।

रोग प्रतिरोधात्मक क्षमता कमजोर भएका मान्छेमा, चुरोट रक्सी या लागुऔषध सेवन गर्नेमा र क्षयरोगको औषधिको पूर्ण मात्रा सेवन नगरेमा उक्त रोगको पुनः संक्रमण फेरि देखिन सक्ने भएकाले उपचारमा विशेष ध्यान दिनु आवश्यक हुने जनाइएको छ । औषधिको नियमित सेवनले क्षयरोग निको हुने चिकित्सकहरुको भनाइ छ ।

प्रकाशित मिति: सोमबार, चैत ११, २०८१ १४:०४

प्रतिक्रिया दिनुहोस्