बैतडी ।
उद्योग, वाणिज्य तथा आपूर्ति मन्त्री दामोदर भण्डारीले ६ घण्टासम्म कृतिम श्वास दिई नवजात शिशुको ज्यान जोगाउने बैतडीको सिगासकी अनमी जानकी पुजारा साउदसँग फोन संवाद गर्नुभएको छ ।
संवादका क्रममा मन्त्री भण्डारीले सिगास जस्तो दुर्गम क्षेत्रमा स्वास्थ्य सेवा प्रदान गर्ने क्रममा आफ्ना जिम्मेवारीहरू अत्यन्त निष्ठापूर्वक र प्रभावकारी रूपमा निर्वाह गरी राज्यको ध्यान आकर्षित गर्न सफल भएकोमा पुजाराको कामको उच्च प्रशंसा गर्दै धन्यवाद व्यक्त गर्नुभयो । उहाँले पुजारालाई उत्कृष्ट स्वास्थ्यकर्मीको रूपमा परिचित हुन सफल भएकोमा बधाई दिँदै, आगामी दिनमा पनि आफ्नो जिम्मेवारी प्रभावकारी रूपमा निर्वाह गर्न आग्रह गर्नुभयो ।
उहाँले भन्नुभयो, “तपाईंलगायत अरू पनि स्वास्थ्यकर्मीहरूले काम गर्ने सिलसिलामा कुनै अप्ठ्यारो परेमा वा मेरो तर्फबाट गर्नुपर्ने कुनैपनि कामका लागि जुनसुकै बेला फोन गर्न सक्नुहुन्छ, म तत्कालै समस्या समाधानका लागि पहल गर्नेछु ।”
फोन संवादकै क्रममा स्वास्थ्यकर्मी पुजाराले आफ्नो कार्यक्षेत्रमा भौतिक पूर्वाधार र स्वास्थ्य सामग्रीको अभाव रहेको भन्दै पहल गरिदिन आग्रह गर्नुभयो । जवाफमा मन्त्री भण्डारीले विगतमा सिगासमा तीनवटा स्वास्थ्य संस्था निर्माणका लागि पहल गरिएको स्मरण गराउँदै, आगामी दिनमा पनि आवश्यक भौतिक पूर्वाधार र स्वास्थ्य सामग्री उपलब्ध गराउन सरोकारवाला निकायसँग समन्वय गर्ने प्रतिबद्धता व्यक्त गर्नुभयो । उहाँले स्वास्थ्य सेवा प्रणाली सुदृढ बनाउन आवश्यक उपकरण र सुविधाहरूको सूची आफूलाई उपलब्ध गराउन पनि अनुरोध गर्नुभयो ।
यसैबीच, मन्त्री भण्डारीले सिगास स्वास्थ्य चौकीमा खानेपानीको समस्या आएको गुनासोप्रति ध्यान दिँदै, सो समस्या समाधानका लागि कार्यान्वयनको चरणमा रहेको हल्काशैनी लिफ्ट खानेपानी योजनाको स्कीम थप गरी स्वास्थ्य चौकी, भुवन भाष्कर मावि र आसपासका बस्तीमा खानेपानी पु¥याउने गरी सम्बन्धित निकायलाई निर्देशन दिने जानकारी दिनुभयो ।
गत बिहीबार ६ घण्टा मुखबाटै अक्सिजन दिएर अनमी पुजारा सिगास–४की लक्ष्मी धामीले जन्मदिएको शिशुको ज्यान बचाउन सफल भएकी थिइन् । राति २० वर्षीया धामीले शिशुलाई जन्म दिएकी थिइन् । शिशुको श्वास निकै सुस्त चल्न थालेपछि स्थलमार्ग र हवाइमार्गबाट समेत उद्धारको अवस्था नभएको अवस्थामा अनमी पुजाराले शिशुलाई मुखबाटै श्वास दिएर ज्यान जोगाएकी हुन् । उनको कामको अहिले चैतर्फी प्रशंसा भैरहेको छ ।
