बैतडी ।
नेकपा एमालेले शनिबार बैतडी सदरमुकाममा भव्य ¥यालीसहित जनसभा सम्पन्न गरेको छ । जिल्ला कमिटी बैतडीको आयोजनामा भएको कार्यक्रममा हजारौँ नेता–कार्यकर्ता तथा शुभेच्छुकहरूको सहभागिता थियो । कार्यक्रमको मूल उदेश्य विघटित प्रतिनिधिसभाको पुनःस्थापना, संविधान र लोकतन्त्रको रक्षा तथा वर्तमान सरकारमा विदेशी प्रभाव र असंवैधानिक गठन प्रक्रियाविरुद्ध जनमत निर्माण गर्नु रहेको एमालेले जनाएको छ ।
जनसभामा पार्टीका केन्द्रीय सदस्य तथा पूर्व उद्योग, वाणिज्य तथा आपूर्ति मन्त्री दामोदर भण्डारी, केन्द्रीय सदस्य लिलाधर भट्ट, सुदूरपश्चिम प्रदेश सरकारका भौतिक पूर्वाधार मन्त्री सुरेन्द्र पाल, जिल्ला कमिटी अध्यक्ष नरेश विकलगायत विभिन्न तहका नेता–कार्यकर्ताको उपस्थिति थियो। जिल्लाका १० पालिका तथा ८४ वडाबाट कार्यकर्ताहरू सहभागी भएका थिए ।
नारा, ब्यानर र पार्टीको झण्डासहित सदरमुकामको छेलाबाट निस्किएको ¥याली गोठलापानी बजारमा पुगेर कोणसभामा परिणत भएको थियो ।
विशाल जनसभालाई सम्बोधन गर्दै नेताहरूले जेनजी आन्दोलनपछि बनेको वर्तमान सरकार विदेशी शक्तिबाट प्रभावित र निर्देशित भएको बताएका छन् । पार्टी केन्द्रीय सदस्य भण्डारीले जेनजी आन्दोलनका नाममा देशभर भएको तोडफोड र आगजनी योजनाबद्ध रूपमा गरिएको दाबी गर्दै वर्तमान सरकार गठन प्रक्रिया नै संविधानविपरीत रहेको बताए । उनले भने, “देशको जनादेशलाई बिर्सेर विदेशी इसारामा सरकार चलाइएको छ । यस्तो सरकारले देशलाई दिशाहीन बनाएको छ ।” उनले बैतडीमा एमालेले जितेका सुर्नया गाउँपालिका र दशरथचन्द नगरपालिकामा योजनाबद्ध रूपमा समस्या खडा गर्न खोजिएको टिप्पणी गरे । “तालाबन्दी गरेर, धम्की दिएर एमालेलाई रोक्न सकिँदैन,” भण्डारीले भने, “एमाले जागृत भइसकेको छ, जनताले शक्ति कसमा छ भनेर देखाइसकेका छन् ।”
एमालेको नेतृत्व पुनः केपी ओलीकै हातमा रहने बताउँदै उनले बैतडी जिल्ला ओली नेतृत्वका पक्षमा एकमत रहेको दोहोर्याए । भदौ २३–२४ का घटनालाई स्मरण गर्दै उनले मुलुकलाई बर्बादीतर्फ धकेल्ने तत्व जेनजी आन्दोलनको आवरणमा हाबी भएको टिप्पणी गरे ।
पार्टीका अर्का केन्द्रीय सदस्य लिलाधर भट्टले जनताको मनमनमा एमाले रहेको बताउँदै एमाले संविधानको रक्षाकर्ता, स्थिरता र विकासको पक्षधर पार्टी भएको उल्लेख गरे । उनले आगामी निर्वाचनमा एमालेले अझ मजबुत जनसमर्थन पाउने दाबी गरे ।
नेताहरूले संघीय संसद पुनःस्थापना गरी निर्वाचनको वातावरण निर्माण गर्नु समयको आवश्यकता भएको बताएका छन् । अहिलेको सरकारले निर्वाचनमैत्री वातावरण बनाउन नसकेको दाबी गर्दै उनीहरूले स्थिरता र संवैधानिक मार्ग कायम गर्न संसद पुनःस्थापनामा जोड दिए ।
