बैतडी
नयाँ जनप्रतिनिधिले विभिन्न प्रकारका कार्यक्रम मार्फत आफ्ना योजना सार्वजनिक गर्ने गरेपनि कार्यकाल समाप्त भएका व्यक्तिले भने आफुले गरेका कामबारे जनतालाई खासै जानकारी दिने गरेको पाइदैन् । तर बैतडीको पाटन नगरपालिकाका निवर्तमान नगर प्रमुख केशव बहादुर चन्दले आफ्नो वितेको कार्यकालमा गरेका कामहरुको विवरण सार्वजनिक गरेकाछन् ।
निवर्तमान नगर प्रमुख चन्दले आफ्नो वितेको ५बर्षे कार्यकालको समिक्षा गरेका हुन् । उनले सोमबार पत्रकार र केहि स्थानियबासीहरुको उपस्थीतिमा आफ्नो कार्यकालमा गरेका कामहरुको सार्वजनिकिकरण गरेका हुन् ।
भु.पु. सहायक मन्त्री समेत रहेका चन्दले आफु मेयर हुदाँ ५बर्ष सम्म पाएको १९लाख तलव मध्ये करिव १४लाख समाजसेवामा खर्च गरेको बताएकाछन् । उनले आफ्नो ५७महिनाको कार्यकालमा तलव मार्फत करिव १९ लाख रकम पाएको बताए ।
उनले सामाजिक क्षेत्रमा गरेका खर्चहरुमा क्याम्पसका विद्यार्थीलाई छात्रवृत्ति प्रदान, स्व.भान बहादुर चन्द स्मृति कोष स्थापना, कोरोना महामारीका बेला राहत तथा निशुल्क एम्बुलेन्स सेवा, मठमन्दीरमा आर्थिक सहयोग तथा आर्यघाट व्यवस्थापन, दर्जनौ बिरामीहरुको औषधी उपचारमा सहयोग लगायत रहेकाछन् ।
चन्दले आफु पैषा कमाउन नभई समाजसेवा गर्न पद धारण गरेको बताए । युवा छदैँ राजनितिमा उदाएका चन्द सांसद तथा सहायक मन्त्री समेत बनेका व्यक्ति हुन् ।
उनले भने, ‘म मेयर हुदाँ मलाई पैषाको लोभ कहिल्यै लागेन् । मेरा छोराछोरी बिदेशमा छन् । उनिहरुले मासिक खर्च पठाइ रहन्छन् । मैले विगतमा निर्माण गरेको एक होटलबाट सवा एक लाख मासिक भाडा आउँछ । त्यसैले सरकारी सेवाबाट आएको पैषा समाजसेवामा लगानी गरेको हुँ ।’
निवर्तमान मेयर चन्दको बिषयमा आगामी मंसिरमा हुने प्रदेश तथा संघको निर्वाचनमा सांसदको चुनाव लड्ने चर्चा समेत चलेको छ ।
उक्त चुनावको तयारीका लागि सक्रियता बढाएको होकी? भन्ने पत्रकारको प्रश्नमा चन्दले आफुलाई पार्टीले टिकट दिएमा चुनाव लड्न तयार रहेको बताए ।
